La regenza ha classifitgà da nov las vischnancas grischunas per ils onns 2012 e 2013 tenor lur forza finanziala.

Dapi l'ultima classificaziun da la forza finanziala per ils onns 2010 e 2011 hai dà ina fusiun da vischnancas, duas ulteriuras èn previsas per il 1. da schaner 2012. Il dumber da vischnancas sa reducescha pervia da quai da 180 a 176; correspundentamain sa mida er la repartiziun en las singulas gruppas da forza finanziala. Senza resguardar las midadas da classa ch'èn resultadas pervia da las fusiuns menziunadas, midan 24 vischnancas la gruppa da forza finanziala cumpareglià cun la classificaziun vertenta. Avant 2 onns, tar l'ultima classificaziun, èn anc 22 vischnancas stadas pertutgadas d'ina midada. Pervia dal svilup da lur retgavs da taglia midan 11 vischnancas la gruppa da forza finanziala. Tar 6 vischnancas resulta ina nova classificaziun tras l'adattaziun da lur pe da taglia. Tar 3 vischnancas è l'attribuziun dal dretg sin gulivaziun da finanzas la raschun per ina midada. La finala appartegnan 2 vischnancas ad ina nova gruppa da forza finanziala pervia d'ina nova situaziun da partenza tar lur basegn finanzial.

17 vischnancas cun 9'407 abitantas ed abitants midan en in gruppa da forza finanziala pli ferma, entant che 7 vischnancas cun 38'376 abitantas ed abitants èn classifitgadas da nov en ina gruppa da forza finanziala pli debla. Uschia vegn la nova classificaziun ad engrevgiar las finanzas dal chantun Grischun in pau pli ferm en il sectur da la gulivaziun da finanzas indirecta.

Da las vischnancas cun passa 1'000 abitantas ed abitants vegnan Flem e Mesauc ad appartegnair ad ina gruppa pli ferma. Percunter midan las vischnancas da Cuira, da Schiers e da Val S. Pieder en ina gruppa pli debla.


Infurmaziuns:
- Thomas Kollegger, schef da l'uffizi da vischnancas, tel. 081 257 23 81,
e­mail: thomas.kollegger@afg.gr.ch  
- Armin Blumenthal, revisur/cussegliader da vischnancas da l'uffizi da vischnancas,
tel. 081 257 23 88, e­mail: armin.blumenthal@afg.gr.ch  

Agiunta:
Nova classificaziun da las vischnancas en gruppas da forza finanziala tenor la publicaziun en il fegl uffizial dals 18 d'avust 2011


Gremi: regenza
Funtauna: rg chanzlia chantunala dal Grischun