Sco numer 1 da las gasettas svizras per uffants e per giuvenils promova SPICK cun divertiment dapi quasi 30 onns la furbaria dals uffants e s'engascha adina puspè gugent per interess da la Svizra. A partir dal settember hai num «Il SPICK en rumantsch», perquai che l'emprima ediziun en lingua rumantscha vegn lantschada. Il nov product na duai betg mo svegliar il plaschair da leger e da far scuvertas, mabain a medem temp er il gust per la lingua rumantscha.

Il magazin SPICK sa drizza dapi sia fundaziun l'onn 1982 ad in public giuven en la vegliadetgna dad 8 fin 15 onns. El sa basa sapientivamain sin temas svizzers e sin in'optica svizra. Contribuziuns interessantas, divertentas e garmadias – repartidas en rubricas e munidas cun codes da vegliadetgna – cuvran in vast champ tematic. Ultra da reportaschas e da contribuziuns scientificas cuntegna SPICK er paginas che las lecturas e ch'ils lecturs pon concepir sezs, sco er comics, engiavineras, instrucziuns per zambregiar e recepts da cuschinar. Uschia promova il magazin d'ina vart la furmaziun generala, e la preschentaziun divertenta sveglia da l'autra vart il plaschair da leger.

Il project «SPICK rumantsch»
Fin ussa è il SPICK cumparì mo per tudestg. A partir da l'atun 2011 va la chasa editura da Son Gagl KünzlerBachmann novas vias e lantscha il magazin er per rumantsch. Uffants e giuvenils en il Grischun rumantsch sco er persunas da lingua rumantscha che vivan ordaifer il territori tradiziunal duain pudair giudair en il futur il SPICK en lur lingua materna. Svegliar il gust da las lecturas e dals lecturs per la quarta lingua naziunala e pia pudair gidar a promover la lingua è in giavisch ed in plaschair da l'editur.

Gist tuttina variada sco la cuntrada linguistica dal Grischun rumantsch sa preschenta er l'ediziun rumantscha dal SPICK. Il magazin cuntegna contribuziuns tant en rumantsch grischun sco er en tut ils 5 idioms. Ultra da las parts generalas e da las singulas reportaschas en rumantsch grischun sco er ultra da las paginas maschadadas, sa chattan en il «SPICK rumantsch» 3 grondas fanestras linguisticas da mintgamai var 6 paginas cun reportaschas e cun contribuziuns scientificas en ils idioms da l'Engiadina (vallader, puter), dal Grischun central (surmiran, sutsilvan) e da la Surselva (sursilvan). La clav da repartiziun garantescha che mintga lectura e mintga lectur ha in lev access linguistic ad almain dus terzs dal magazin.

Per la translaziun dals texts è responsabla la Lia Rumantscha che gida uschia en moda decisiva a far reussir il project. L'ediziun rumantscha dal SPICK vegn pussibilitada la finala grazia al sustegn finanzial tras la Promoziun da linguas dal chantun Grischun che chapescha il «SPICK rumantsch» sco in bun instrument per promover la lingua, in instrument che serra ina largia en la purschida rumantscha e che permetta ad in public giuven da viver la lingua en ina furma attractiva.

Cun SPICK en il nov onn da scola
Il culp da partenza per il project «SPICK rumantsch» vegn dà oz: Cun il numer dal mais settember cumpara l’emprima ediziun rumantscha sco ediziun gronda. Tut las scolaras e tut ils scolars da la vegliadetgna da scola che frequentan ina scola rumantscha pon prender a chasa in exemplar gratuit dal «SPICK rumantsch». Las iniziantas ed ils iniziants èn persvadids che la purschida attractiva vegnia a plaschair a blers geniturs. Sa chapescha che er tut las autras persunas che han interess per il SPICK pon retrair in exemplar gratuit. Quai vala en spezial per famiglias rumantschas che vivan ordaifer il territori linguistic. L'abunament annual (11 ediziuns) per il SPCK rumantsch po vegnir fatg a partir dal numer da november.


Ulteriuras infurmaziuns:
In exemplar d'emprova gratuit sco er in'offerta speziala d'abunament annual pon vegnir retratgs sut: www.spick.ch/rumantsch.
Il frontispizi actual da SPICK sco er duas paginas dublas dal cuntegn metta la chasa editura gugent a disposiziun per stampar. Las datotecas da stampa pon vegnir dumandadas sut: medien@spick.ch.  


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01
- Roger Grolimund, schefeditur dal SPICK, tel. 079 410 13 93, e-mail: roger@spick.ch. 


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient