En il chantun Grischun ha lieu per l'emprima giada in'emna da bibliotecas. Questa emna è ina part da la campagna da reputaziun da "Bibliotecas dal Grischun". 54 bibliotecas grischunas da tut las regiuns linguisticas èn participadas. Cun questa emna vulan las bibliotecas render attent a lur purschida multifara e mussar las prestaziuns ch'ellas furneschan durant l'onn.

Promover la lectura, intermediar la litteratura e las medias sco er promover la cumpetenza d'utilisar ils mediums èn in grond giavisch da "Bibliotecas dal Grischun". Per rinforzar la posiziun da las bibliotecas publicas en il chantun Grischun organiseschan "Bibliotecas dal Grischun" ina campagna da reputaziun. La finamira è quella da palesar la purschida e la rolla da las bibliotecas en l'entir chantun e da renviar a medem temp a lur incumbensas ed a lur prestaziuns multifaras. Per l'ina vegn quai empruvà da cuntanscher cun utilisar in logo cuminaivel e per l'autra cun organisar l'emna da bibliotecas dals 12 fin ils 18 da settember 2011.

Il messadi duai esser quel che las bibliotecas furman ina spessa rait integrala en il chantun triling e ch'ellas porschan ina vasta tscherna da medias e da servetschs a la populaziun; ina tscherna ch'i vala la paina da trair a niz e da promover. Las bibliotecas dal Grischun èn innovativas e progressivas. Ellas èn in element impurtant d'ina vischnanca e surpiglian ina rolla principala, en moda ch'ellas promovan, ultra d'ademplir ina funcziun sociala, la furmaziun e la cultura da las abitantas e dals abitants.

Passa 60 occurrenzas captivantas ed interessantas èn sin il program durant l'emna da las bibliotecas dals 12 fin ils 18 da settember 2011. A Cuira envida per exempel Claudia Lietha, in'autura giuvna cun ragischs grischunas, ils uffants dad 8 fin 11 onns en la biblioteca populara dal Grischun ad ina prelecziun or da ses nov cudesch. Quai è ina istorgia plain aventuras e surpraisas. Istorgias en las trais linguas chantunalas cumbineschan Marco Todisco (chanzuns), Vincenzo Todisco (texts) e Justina Derungs (teater) en la biblioteca chantunala ad in'unitad e piglian il public sin in viadi sur ils munts, tras las linguas fin a la mar. L'entir program cun las bibliotecas participadas da tut las regiuns linguisticas pudais Vus consultar sut www.bibliothekswoche.ch.

Al servetsch da la populaziun
Tut las 54 bibliotecas da scola e communalas en il chantun Grischun gidan a proveder la populaziun cun infurmaziuns e cun litteratura; ellas mettan a disposiziun medias da tut las spartas, permettan l'access mundial ad infurmaziuns relevantas e sustegnan l'emprender per vita duranta. Las bibliotecas enconuschan l'impurtanza da la cumpetenza d'utilisar ils mediums e transmettan quella a las utilisadras ed als utilisaders.

La biblioteca serva al svilup cultural da la societad, a promover la lectura, a proponer in'occupaziun raschunaivla da temp liber, a furmar vinavant mintga singula persuna. Ella è in lieu d'inscunter e da barat suror tut las barrieras linguisticas, culturalas e da las generaziuns ed ella è in lieu, nua ch'il status social na gioga nagina rolla.


Infurmaziuns:
Nelly Däscher, incumbensada da las bibliotecas dal chantun Grischun, tel. 081 257 28 37


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient