Il chantun Grischun ha envidà 18 biros d'architectura ch'èn vegnids tschernids da la giuria d'inoltrar fin la fin da schaner 2012 in project da concurrenza per l'engrondiment dal museum d'art dal Grischun. La giuria ha tschernì ils biros ch'èn domiciliads en il Grischun, en il rest da la Svizra ed a l'exteriur or da passa 80 candidats.
 
L'engrondiment cumpiglia novas localitads per exposiziuns temporaras, in "cabinet grafic", in post da transtgargiada segirà e protegì per ovras d'art, in'entrada ed in local d'occurrenzas, ina cafetaria sco er lavuratoris e locals per la tecnica da chasa.
 
La mancanza da plazza en il museum d'art dal Grischun è enconuschenta dapi decennis. Gia il concept dal museum dals onns 1970 ha mussà ch'i basegna ina surfatscha d'exposiziun duas giadas uschè gronda sco l'existenta. Entant che per tut ils auters museums chantunals e per tut las instituziuns culturalas a Cuira èn vegnidas messas a disposiziun las localitads necessarias, ha il museum d'art stuì sa cuntentar cun la Villa Planta restaurada ensemen cun l'anteriur museum da la natira (edifizi Sulser).

Il nov edifizi d'engrondiment vegn a custar circa 30 milliuns francs. Cun ina donaziun liada da 20 milliuns francs ha la planisaziun che ha cumenzà l'onn 2007 survegnì il stausch necessari. Uschia vegni ad esser pussaivel da realisar bainbaud l'edifizi nov d'engrondiment.

Ensemen cun la concurrenza da project vegn elavurada la missiva da construcziun. Quella vegn suttamessa la primavaira 2012 al cussegl grond per prender la decisiun. Sch'i na dat nagins retards, pon ins quintar che las lavurs da construcziun cumenzan a partir da la mesadad da l'onn 2013.


Infurmaziuns:
Markus Dünner, architect chantunal, uffizi da construcziun auta, tel. 081 257 36 31


Gremi: uffizi da construcziun auta dal Grischun
Funtauna: rg uffizi da construcziun auta dal Grischun