Il nov dretg da protecziun da l'uffant e da creschids entra en vigur il 1. da schaner 2013. La regenza grischuna preschenta ussa sia missiva per la realisaziun dal dretg federal en il chantun Grischun. Il punct central dal project è la furmaziun da 5 autoritads da protecziun da l'uffant e da creschids autonomas che remplazzan las autoritads tutelaras actualas. Las assistenzas professiunalas regiunalas duain remplazzar las avugadias uffizialas. Ils purtaders vertents pon dentant restar en uffizi, fin che la refurma dal territori entra en vigur. Il cussegl grond duai tractar la fatschenta en la sessiun da december 2011, per ch'i stettia a disposiziun avunda temp per furmar las novas autoritads.

Il 1. da schaner 2013 entra en vigur il nov dretg da protecziun da l'uffant e da creschids da la confederaziun. Quest nov dretg tegna quint da las midadas socialas, economicas e giuridicas, concepescha las mesiras uffizialas anc pli fitg tenor il cas singul concret e promova il dretg d'autodeterminaziun e la solidaritad entaifer la famiglia. Il punct central ord vista organisatorica è la furmaziun d'autoritads spezialisadas interdisciplinaras (autoritads da protecziun da l'uffant e da creschids) che duain dumagnar meglier las pretensiuns creschentas. Qua tras vul la confederaziun professiunalisar (vinavant) ils fatgs tutelars.

Furmaziun da 5 autoritads chantunalas da protecziun da l'uffant e da creschids autonomas
Pervia da las prescripziuns stringentas dal dretg federal sto vegnir furmada ina nova organisaziun administrativa en il chantun Grischun. Sin basa dals resultats da la consultaziun propona la regenza da furmar 5 autoritads autonomas cun cumpetenzas territorialas cleramain cunfinadas. Mintga autoritad da protecziun da l'uffant e da creschids (APUC) sa cumpona d'ina manadra u d'in manader en uffizi cumplain sco er d'almain dus ulteriurs commembers da l'autoritad en uffizi cumplain u principal che han las enconuschientschas spezialisadas necessarias en las disciplinas centralas "dretg", "lavur sociala" e "pedagogia/psicologia". Ulteriuras disciplinas impurtantas sco medischina/psichiatria/geriatria e dumondas fiduziarias/administraziun da la facultad pon vegnir cuvridas – sche necessari – tras engaschaments en uffizi accessoric. Envers il sboz da consultaziun vegn adattada er la cumpetenza per sclerir ils fatgs. Quests scleriments duain per regla vegnir fatgs da las autoritads da protecziun da l'uffant e da creschids. Sustegnidas vegnan ellas mintgamai d'in secretariat che ademplescha principalmain incumbensas en ils secturs "scleriments giuridics", "revisurat" ed "administraziun".

Assistenzas professiunalas sco incumbensa regiunala
Pervia da la restructuraziun sin plaun administrativ sto l'organisaziun da las assistenzas professiunalas (fin ussa avugadias uffizialas) medemamain vegnir examinada, cumbain ch'i na resulta betg in basegn d'agir direct tras il dretg federal. La regenza propona da designar la gestiun da las assistenzas professiunalas sco incumbensa regiunala e betg pli sco incumbensa cirquitala. Qua tras tegna ella quint dal conclus da princip dal cussegl grond dal favrer 2011 en il rom da la tractativa davart la refurma da vischnancas e dal territori: il cussegl grond aveva concludì unanimamain da betg pli delegar incumbensas als circuls. Cun ina regulaziun transitorica vul la regenza evitar che las 11 avugadias uffizialas actualas stuessan per part vegnir reorganisadas duas giadas entaifer paucs onns. Tras quai ch'ils purtaders vertents pon vinavant manar las assistenzas professiunalas fin maximalmain 2 onns suenter l'entrada en vigur da la refurma dal territori, sa lascha la reordinaziun dal dretg da protecziun da l'uffant e da creschids coordinar optimalmain cun la refurma dal territori, ch'entra en vigur pir pli tard. Las assistenzas professiunalas duain sa restrenscher a lur incumbensas centralas, numnadamain a l'execuziun da mandats dal dretg da protecziun da l'uffant e da creschids. Pervia da la critica exprimida en la consultaziun desista la regenza da delegar ad ellas er ils scleriments dals fatgs per l'autoritad da protecziun da l'uffant e da creschids.

Il chantun finanziescha la nova autoritad da protecziun da l'uffant e da creschids
Tras il transferiment da las incumbensas dals circuls al chantun surpiglia il chantun en l'avegnir ils custs per las autoritads da protecziun da l'uffant e da creschids. Ils custs importan stgars 8 milliuns francs ad onn. Las assistenzas professiunalas vegnan finanziadas sco fin ussa da las vischnancas. Sin basa da la concepziun proponida na stoi betg vegnir fatg quint cun custs supplementars en quest sectur tenor las enconuschientschas actualas. Tras la realisaziun proponida dal nov dretg da protecziun da l'uffant e da creschids vegnan las vischnancas distgargiadas tut en tut per circa 2 milliuns francs ad onn, perquai che la finanziaziun da las autoritads tutelaras croda davent.

Las novas autoritads ston esser furmadas e prontas fin a l'entrada en vigur dal nov dretg il 1. da schaner 2013. Per avair avunda temp per las lavurs da preparaziun e da furmaziun duai il parlament tractar il project en la sessiun da december 2011.


Infurmaziuns:
cussegliera guvernativa Barbara Janom Steiner, scheffa dal departament da giustia, segirezza e sanadad, 081 257 25 01


Gremi: regenza
Funtauna: rg chanzlia chantunala dal Grischun