La regenza grischuna ha concludì ina revisiun parziala da l'ordinaziun davart il gimnasi che propona d'abolir ils examens da cumparegliaziun. Ultra da quai ha ella mess enavos per part la correctura da la via d'Engiadina tranter Giarsun ed Ardez vest.

Puspè abolì ils examens da cumparegliaziun
Las scolaras ed ils scolars da la segunda classa gimnasiala na ston en il futur betg pli far in examen da cumparegliaziun sco part da lur promoziun per la terza classa da las scolas medias grischunas. En quest senn ha la regenza grischuna revedì parzialmain l'ordinaziun davart il gimnasi.
Ils examens da cumparegliaziun sin il stgalim da la segunda classa dal gimnasi han gì lieu per l'emprima giada questa primavaira. Ils cuntegns eran identics cun ils cuntegns da l'examen d'admissiun a la terza classa dal gimnasi ed a l'emprima classa da la scola media spezialisada u da la scola media commerziala. La finala èsi sa mussà ch'ina evaluaziun dals resultats, respectivamain ina cumparegliaziun da las prestaziuns furnidas, è problematica per ils suandants motivs:

• Las scolaras ed ils scolars che absolvan l'examen d'admissiun san ch'els vegnan admess al gimnasi mo sch'els reusseschan l'examen. Perquai èn els per regla motivads da cuntanscher uschè bunas prestaziuns sco pussaivel. Per las scolaras e per ils scolars da las segundas classas gimnasialas ha il resultat cuntanschì en ils examens da cumparegliaziun ina impurtanza bainquant pli pitschna. La nota dals examens da cumparegliaziun è mo ina da las en total 13 notas d'attestat che han in effect sin la promoziun. La motivaziun d'obtegnair in bun resultat da l'examen è perquai pli pitschna tar las gimnasiastas e tar ils gimnasiasts da las segundas classas. 
• Ils cuntegns da l'examen per ils examens d'admissiun sa basan sin ils plans d'instrucziun e sin ils cuntegns d'instrucziun da l'emprima e da la segunda classa secundara sco er sin ils meds d'instrucziun che vegnan utilisads là. Ils meds d'instrucziun ed ils cuntegns d'instrucziun da l'emprima e da la segunda classa gimnasiala n'èn betg identics cun quels da la scola secundara. Da quai resultan enconuschientschas preliminaras differentas.

Per resumar pon ins constatar che las differentas cundiziuns generalas na permettan betg da cumparegliar las prestaziuns als examens.

Il project da la via d'Engiadina è vegnì mess enavos per part
Il project per ina correctura da la via d'Engiadina tranter Giarsun ed Ardez vest en Engiadina bassa vegn approvà mo per part da la regenza. Sin fundament da las protestas da la vischnanca da Guarda e dals proprietaris da bains immobigliars pertutgads sto la regenza metter enavos l'emprim traject dal project (kilometers 50,98 fin 52,46) per far ulteriurs scleriments.
L'object da las protestas da Guarda èn il schlargiament dals vials ed en spezial l'amplificaziun previsa per il vitg da Giarsun. Refusadas vegnan las scarpas che vegnan mantunadas da la vart da la val e che han ina funcziun da sustegn per il schlargiament da la via e per la concepziun da la cuntrada. La regenza approvescha percunter il segund traject dal project (kilometers 52,46 fin 54,82) che sa chatta per gronda part sin il territori dad Ardez.

Il stadi general da la via d'Engiadina tranter Giarsun ed Ardez vest na correspunda betg pli a las pretensiuns d'ozendi, ed ils vials stretgs han subì donns considerabels. Quests donns ston vegnir attribuids cunzunt ad effects da schelira, a la capacitad da chargia insuffizienta, a las grevezzas augmentadas dal traffic sco er a l'allontanament d'aua che manca per part. Il trassé actual n'è ultra da quai betg omogen ed en plirs lieus n'è la survista betg suffizienta.

La regenza beneventa la diagnostica preimplantatorica
En sia resposta da consultaziun a la confederaziun beneventa la regenza grischuna la midada da l'artitgel constituziunal 119 davart la medischina da reproducziun e la tecnologia da gens sco er la revisiun da la lescha davart la medischina da reproducziun. La midada da la constituziun e da la lescha duai pussibilitar la diagnostica preimplantatorica en Svizra. Resguardond il princip da la dignitad umana definescha il project cundiziuns generalas severas, sut las qualas la diagnostica preimplantatorica duai esser averta per pèrs pertutgads. En sia posiziun intimescha la regenza grischuna da prevair che las permissiuns per tut las activitads colliadas cun quai stoppian vegnir dumandadas a la confederaziun, e quai per pudair garantir in'execuziun unitara da la lescha.


Da vischnancas e da regiuns

• Tavau: La revisiun parziala da la planisaziun locala concludida da las votantas e dals votants da la vischnanca da Tavau a la votaziun communala dals 13 da favrer 2011 vegn approvada. 
• Scuol: La revisiun parziala da la planisaziun locala da la vischnanca da Scuol dals 12 da december 2010 vegn approvada. 
• Valragn: Ils novs statuts dal "consorzi da scola dal circul da Valragn" (inoltraziun dals 29 d'avust 2011) vegnan approvads.

Projects da vias
La regenza ha approvà 1'100'000 francs per construir e per sanar il suandant traject da via:
- via da Calanca: lavurs d'impressari, Ponte Calancasca, Arvigo sid


Gremi: regenza
Funtauna: rg chanzlia chantunala dal Grischun