Il turissem grischun è pertutgà fermamain dal svilup dal curs da stgomi dal franc svizzer. Las stentas da la banca naziunala svizra da tegnair in curs da stgomi d'almain 1.20 francs envers l'euro èn da valitar en moda positiva. Tuttina sa mussa la diminuziun da la dumonda da l'exteriur gia cleramain a maun da la ferma reducziun dal dumber da pernottaziuns. La regenza grischuna metta a disposiziun meds finanzials supplementars per promover la dumonda da purschidas turisticas.

Tenor ils resultats provisorics da l'uffizi federal da statistica (UST) ha il Grischun gì l'avust 2011 – cun in minus da circa 49'500 pernottaziuns (­7,4%) – la reducziun absoluta la pli clera tranter las regiuns turisticas en cumparegliaziun cun las cifras da l'onn precedent. Per promover a curta vista ed a vista mesauna la dumonda vegn perquai il credit da totalmain 2 milliuns francs, ch'era vegnì garantì per la campagna da communicaziun turistica Enavant Grischun II, auzà per ils onns 2011 e 2012 a 4,84 milliuns francs. Ils meds finanzials supplementars pon vegnir mess a disposiziun tras transferiments nà d'autras posiziuns. La cumissiun da gestiun dal cussegl grond ha acceptà ina proposta correspundenta da la regenza a chaschun da sia sesida dals 12 d'october 2011 e permess in'emprima transcha dad 1,7 milliuns francs per l'onn 2011. Davart la segunda transcha dad 1,14 milliuns francs vegn la cumissiun da gestiun a discutar il cumenzament da l'onn 2012.

Cun ils meds finanzials supplementars vul la regenza effectuar ina intensivaziun da las mesiras che Grischun vacanzas ha gia planisà en il rom dad Enavant Grischun II. Finamiras dal project – sco per exempel auzar il grad d'enconuschientscha da la marca graubünden u augmentar la simpatia e la confidenza ch'èn colliadas cun la marca graubünden – pon vegnir persequitadas en moda pli intensiva. Tut en tut duai vegnir prestada ina contribuziun per augmentar la dumonda da purschidas, da servetschs e da products dal Grischun, e questa contribuziun duai sa laschar mesirar. A l'offensiva ed a ses custs supplementars sa participeschan ulteriurs partenaris turistics e betg turistics dal Grischun.


Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01


Gremi: regenza
Funtauna: rg chanzlia chantunala dal Grischun