La lescha davart ils supplements da famiglia vegn adattada al nov dretg federal. A partir da l'onn 2013 han tut las persunas cun in'activitad da gudogn il medem dretg sin supplements da famiglia. La regenza grischuna ha avert la consultaziun tar la revisiun da la lescha. Ultra da quai ha la regenza prendì in nov conclus davart la taglia sin abitaziuns secundaras a Silvaplauna.

Supplements da famiglia da nov per tut las persunas cun in'activitad da gudogn
A partir da l'onn 2013 survegnan tut las persunas cun in'activitad da gudogn in supplement da famiglia per uffant. Quai prescriva la confederaziun. Ils chantuns ston adattar correspundentamain lur legislaziun. La regenza grischuna ha deliberà ina revisiun parziala da la lescha davart ils supplements da famiglia per la consultaziun che dura fin la fin da favrer 2012.

La lescha federala davart ils supplements da famiglia revedida che entra en vigur il 1. da schaner 2013 regla en moda unitara e cumplessiva ils supplements da famiglia. Nov è che er persunas cun activitad da gudogn independenta ordaifer l'agricultura han il dretg sin supplements da famiglia. Per profitar da quel dretg ston ellas entrar en ina cassa da cumpensaziun per famiglias. Per finanziar las prestaziuns pajan las persunas cun activitad da gudogn independenta contribuziuns calculadas tenor lur entradas ch'èn suttamessas a la AVS. Ellas han il dretg da survegnir las medemas prestaziuns sco las lavurantas ed ils lavurants, per ils quals las patrunas ed ils patruns finanzieschan ils supplements da famiglia.

Tenor il dretg federal pon ils chantuns fixar sezs, sch'i sto u sch'i na sto betg – entaifer ina cassa da cumpensaziun per famiglias – vegnir incassada la medema tariffa da contribuziun sin las entradas da las lavurantas e dals lavurants ch'èn suttamessas a la AVS e sin talas da las persunas cun activitad da gudogn independenta. En il senn da tractar tut las persunas cun in'activitad da gudogn giuridicamain en moda uschè eguala sco pussaivel s'exprima la regenza grischuna per ina tariffa da contribuziun unitara per cassa da cumpensaziun per famiglias. Questa contribuziun importa tar la cassa chantunala actualmain 1,9 pertschient da la summa dals salaris ch'è suttamessa a la AVS. Las cassas da cumpensaziun privatas per famiglias n'èn betg liadas vi da questa tariffa da contribuziun.

Ils supplements minimals importan 220 francs per mais per uffants fin a la cumplenida dal 16avel onn da vegliadetgna e 270 francs per mais per uffants che han cumplenì il 16avel onn da vegliadetgna. La tariffa pli auta vala per giuvenils en scolaziun che n'han betg anc cumplenì il 25avel onn da vegliadetgna. I n'è betg facil da stimar ils custs che vegnan chaschunads, sch'il dretg da survegnir supplements vegn extendì sin uffants da persunas cun activitad da gudogn independenta ordaifer l'agricultura. Per l'onn 2013 fa la cassa chantunala da cumpensaziun per famiglias quint cun ina summa supplementara da supplements da 7,555 milliuns francs. A lavurantas ed a lavurants paja la cassa l'onn 2013 supplements da circa 81,725 milliuns francs. (Link als documents da consultaziun)

L'anteriur tschaler da glatsch da Glion sut protecziun da monuments
L'anteriur tschaler da glatsch da la fatschenta da bavrondas Oswald da Glion vegn mess sut protecziun chantunala da monuments. Quai ha concludì la regenza. L'architectura impressiunanta e nunremplazzabla sco er il stadi da mantegniment fitg bun da tut il stabiliment dattan a l'object ina impurtanza singulara per l'istorgia da cultura e da tecnica.

Il tschaler da glatsch ch'è vegnì duvrà ina giada sco deposit fraid per biera e per bavrondas sa chatta al spartavias da la via da la Lumnezia e da la via veglia da Flond al vest da Glion. La chasa da deposit da dus plauns cun ses sistem da sfradentar e da ventilar raffinà deriva da la segunda mesadad dal 19. tschientaner ed è ina perditga remartgabla dal cumenzament da la producziun commerziala da biera en il Grischun. Cun l'electrificaziun e cun il svilup da la tecnica per sfradentar ha quest stabiliment pers sia funcziun. Mettend quest object sut protecziun vegn il proprietari tranter auter obligà d'al mantegnair en in bun stadi e da prender mesiras per al reparar uschenavant che quai è pretendibel.


Da vischnancas e da regiuns

• Silvaplauna: Pervia d'ina sentenzia da la dretgira administrativa dals 25 d'october 2011 ha la regenza stuì sa fatschentar ina segunda giada cun la taglia sin abitaziuns secundaras che la vischnanca da Silvaplauna aveva concludì. En sia sentenzia ha la dretgira administrativa pretendì che cusseglier guvernativ Mario Cavigelli stoppia da princip prender recusaziun tar questa fatschenta e che cusseglier guvernativ Hansjörg Trachsel stoppia prender recusaziun tar la decisiun concernent la dumonda da recusaziun ch'è stada drizzada cunter el (cun bandunar la sala da sesida). En sias novas decisiuns ha la regenza observà questas directivas formalas da la dretgira administrativa. Concernent la materia sco tala ha ella puspè approvà il project da taglia da la vischnanca e refusà danovamain ils nov recurs ch'èn vegnids fatgs cunter tala. Tenor il project da taglia duain tut las abitaziuns secundaras che na vegnan betg dadas en locaziun professiunalmain vegnir engrevgiadas cun ina taglia da ca. 1500 fin 2000 francs l'onn. 
• Tujetsch: La revisiun parziala da la planisaziun locala, concludida da la vischnanca da Tujetsch ils 15 da matg 2011, vegn approvada. Il project da la planisaziun d'utilisaziun cumpiglia in resort nov tar la staziun da val da las pendicularas en il territori da Dieni cun hotels, cun abitaziuns da vacanzas e da persunal sco er cun interpresas da servetschs. 
• Val Müstair: Als custs supplementars da la 30. etappa da la meglieraziun generala da la vischnanca da Val Müstair vegn garantida ina contribuziun chantunala da maximalmain 50'750 francs, premess che la confederaziun sa participeschia er. 
• Rueun / Siat: Il project d'exposiziun per curreger la via da Siat, traject Sareins Sut – Sareins Sura (kilometer 1,77 fin 2,51), vegn approvà. 
• Braggio: La revisiun parziala da la lescha da taglia da la vischnanca da Braggio dals 22 da matg 2011 vegn approvada.

Contribuziuns chantunalas a differentas instituziuns

• Chasa da persunas attempadas e da tgira Neugut a Landquart: Per midar chombras da dus letgs en chombras d'in letg sco er per stgaffir letgs da tgira supplementars en la chasa da persunas attempadas e da tgira Neugut a Landquart vegn garantida ina contribuziun chantunala d'investiziun da totalmain 2'760'000 francs. 
• Fundaziun "Scola interchantunala da selviculturs Maiavilla": Per planisar e per exequir ina emprima sanaziun cumpletta urgenta dals bains immobigliars dal center da furmaziun per il guaud a Maiavilla vegn garantida a la fundaziun "Scola interchantunala da selviculturs Maiavilla" (SISM) ina contribuziun d'investiziun da 150'000 francs per l'onn 2012. Resalvada resta l'approvaziun dal credit posteriur correspundent tras la cumissiun da gestiun dal cussegl grond.

Gremi: regenza
Funtauna: rg chanzlia chantunala dal Grischun