La regenza grischuna ha concludì per l'onn 2011 ina summa totala da var 25,5 milliuns francs per contribuziuns da la gulivaziun da finanzas. Plinavant s'exprima ella envers la confederaziun a favur dal project surchantunal per ina pendiculara Val d'Ursera / Alpsu.

Contribuziuns da gulivaziun da passa 25 milliuns francs
Las vischnancas grischunas survegnan quest onn contribuziuns da la gulivaziun da finanzas da var 25,5 milliuns francs. Quai ha concludì la regenza. La summa sa cumpona sco suonda: Per gulivar la forza fiscala vegnan pajadas contribuziuns da totalmain 18'053'199 francs a 73 vischnancas. Als custs da las vischnancas finanzialmain deblas per ovras publicas vegnan concedidas contribuziuns da 4'858'100 francs. En il rom da la gulivaziun dal basegn spezial survegnan ultra da quai 10 vischnancas cun dretg da survegnir contribuziuns totalmain 2,6 milliuns francs. Il dretg da survegnir contribuziuns per gulivar il basegn spezial han tenor la regenza las vischnancas cun relaziuns e grevezzas spezialas pervia da lur posiziun geografica e/u pervia da lur topografia.

Plinavant cuntegna la finanziaziun speziala "gulivaziun da finanzas intercommunala" contribuziuns per promover fusiuns da vischnancas. Per l'onn 2011 importan quellas totalmain 4'075'000 francs.

La regenza beneventa il project per ina pendiculara Val d'Ursera / Alpsu
La regenza grischuna sustegna la dumonda da la Andermatt-Surselva Sport SA da dar la concessiun tenor il dretg davart las telefericas e d'approvar ils plans per renovar respectivamain per amplifitgar l'implant d'infrastructura da skis Val d'Usera / Alpsu. En sia posiziun tramessa a l'uffizi federal da traffic propona la regenza da dar la concessiun a la Andermatt-Surselva Sport SA e d'approvar ils plans respectivs.

L'object da la dumonda furman en tut 17 implants da transport turistics tranter Andermatt e l'Alpsu sco er al Gemsstock. Da quels sa chatta sulettamain in implant en il chantun Grischun, numnadamain sin il territori da la vischnanca da Tujetsch. Cun l'amplificaziun planisada duai vegnir cuntanschida la finamira da porscher in turissem persistent en la regiun da la Val d'Ursera e da la part sura da la Surselva. La regenza grischuna è da l'avis ch'il project permettia a la part sura da la Surselva da stgaffir in svilup dal territori cun avegnir.

La surfatscha dal guaud da protecziun vegn considerada tenor criteris unitars
La surfatscha dal guaud da protecziun en il chantun Grischun è vegnida determinada da nov. La regenza grischuna ha mess en vigur per il 1. da schaner 2012 ina nova moda da determinar il guaud da protecziun che l'uffizi da guaud e da privels da la natira ha sviluppà. Questa nova moda è vegnida sviluppada tenor criteris determinads unitars per cuntanscher in'armonisaziun naziunala. Tar la determinaziun dal guaud da protecziun devi fin ussa numnadamain grondas differenzas tranter ils chantuns.

L'uffizi da guaud e privels da la natira ha armonisà la determinaziun, che sa basava fin ussa sin expertisas, cun la modellaziun unitara da la confederaziun a basa dal computer. Ultra da quai ha el verifitgà la determinaziun en las regiuns e cunfinà quella al lieu en enconuschientscha da las relaziuns localas. Quai ha dà ina nova surfatscha dal guaud da protecziun pli gronda, numnadamain da totalmain var 122'000 hectaras (fin ussa 90'000 hectaras). Partind da la nova determinaziun dal guaud da protecziun vegnan ils meds finanzials repartids confurm als basegns a las regiuns ed a las vischnancas respectivamain als reviers forestals. La quota dals meds finanzials federals per il Grischun per la perioda 2012 fin 2015 importa circa 23 pertschient dals meds finanzials totals che la confederaziun paja per il guaud da protecziun.

Las controllas da products chaschunan gronds custs
Cun prescripziuns per las indicaziuns areguard la quantitad da products vegnan las consumentas ed ils consuments protegids cunter donns economics tras la cumpra da pachets betg emplenids u da quantitads betg correctas en la vendita da rauba averta. Ina nova ordinaziun federala planisada vul rinforzar supplementarmain las consumentas ed ils consuments. La regenza grischuna beneventa quai da princip en sia resposta da consultaziun. Ins stoppia dentant far quint che las disposiziuns previsas en connex cun las controllas, cun las reclamaziuns ed en general cun l'execuziun chaschunian dapli lavur. Tenor la regenza na dastga l'execuziun da l'ordinaziun betg chaschunar dapli expensas dals chantuns.


Da vischnancas e da regiuns

• Scuol: La revisiun parziala da la planisaziun locala, concludida da la vischnanca da Scuol ils 25 d'avrigl 2010, vegn approvada cun cundiziuns e cun resalvas. La planisaziun d'utilisaziun che sa referescha al project cuntegna per gronda part l'ulteriur svilup dal bain da chavals "San Jon".

Gremi: regenza
Funtauna: rg chanzlia chantunala dal Grischun