La regenza grischuna ha deliberà il program da la regenza ed il plan da finanzas per ils onns 2013 fin 2016. La finamira principala è quella da promover la creschientscha da l'economia e d'augmentar uschia l'attractivitad dal Grischun sco lieu d'economia, da lavur e da domicil. Perquai ch'ils meds finanzials daventan pli stgars èsi necessari da far sforzs spezials.

En il program da la regenza per ils onns 2013 fin 2016 ha la regenza attribuì las sfidas actualas e futuras a 7 champs d'acziun e fixà sin basa da quai 25 puncts centrals da svilup e mesiras concretas per tut ils secturs politics. Il program sa basa sin maximas ch'il cussegl grond aveva deliberà ordavant.
La basa dal program è vegnida elavurada en collavuraziun cun la cumissiun per politica da stadi e strategia dal cussegl grond. Per l'emprima giada è vegnida integrada en il giudicament da la situaziun in'examinaziun da las incumbensas tenor la constituziun chantunala. Ensemen cun il plan da finanzas è il program da la regenza l'instrument central da la gestiun politica en il chantun Grischun.

Augmentar la creschientscha da l'economia en conturns attractivs
Il tema central dal program ch'è fixà per quatter onns è la promoziun da l'economia. La creschientscha da l'economia è la premissa per in svilup positiv dal chantun ed en il chantun. Creschientscha po il Grischun cuntanscher oravant tut en la branscha d'export e cun mobilisar novs potenzials en tut sias regiuns. Per quai ston vegnir stgaffidas vastas cundiziuns generalas ch'èn attractivas per las interpresas e che stimuleschan a far investiziuns. Ultra d'ina revisiun totala da la lescha per il svilup economic èn vegnids integrads en il program ina promoziun pli intensiva dals manaschis industrials orientads a l'export, dal turissem sco sectur d'export e dal svilup regiunal. La cussegliaziun e l'assistenza da persunas e d'organisaziuns che vulan far investiziuns duai vegnir meglierada ultra da quai cun ina qualitad pli auta dals servetschs e cun ina coordinaziun da las proceduras.

L'economia po sa sviluppar mo, sch'ella survegn la plazza correspundenta. Il program da la regenza pretenda ina strategia per realisar il concept dal territori per la Svizra, elavurà cuminaivlamain da la confederaziun, dals chantuns e da las vischnancas. Per l'ina ston vegnir messas a disposiziun surfatschas per il svilup da l'economia, per l'autra èsi fitg impurtant da promover il svilup dals abitadis a lieus centrals. Grazia a grondas spessezzas da l'urbanisaziun duai il medem mument vegnir protegì il terren cultivà prezius.

La mobilitad, la furmaziun e la cooperaziun sco facturs da success
In spazi da lavurar e d'abitar attractiv dovra ina infrastructura da traffic moderna. Basegns da mobilitad che creschan d'in cuntin pretendan plinavant in svilup sistematic dal traffic public. Tenor il program da la regenza ston las infrastructuras da la viafier e la rait da vias vegnir mantegnidas en lur substanza, renovadas ed engrondidas sistematicamain. Ils puncts centrals da svilup cuntegnan pervia da quai er volumens finanzials ch'èn correspundentamain gronds en il sectur dal traffic. La finala duai il traffic supplementar, en spezial il traffic pesant, che resulta da la sanaziun dal tunnel da via dal Gottard vegnir reducì ad in minimum sin l'axa dal San Bernardin.

In giavisch impurtant da la regenza è la finala quel da stgaffir per ils giuvenils purschidas da furmaziun modernas che tegnan quint dals interess da l'economia e da la societad. Mesiras en quest sectur pertutgan ina quota d'admissiun stabila a scolas medias, ina enconuschientscha pli gronda da la maturitad professiunala, in sustegn dals instituts da perscrutaziun domiciliads en il Grischun collià cun in posiziunament naziunal da la purschida da scolaziun grischuna.

Per cuntanscher questas finamiras dependa il chantun da buns partenadis. Tant en cas da la collavuraziun transcunfinala sco er interchantunala sto il chantun far diever cumplainamain da la libertad d'agir e trair a niz las schanzas che sa preschentan. In punct central da svilup dal program da la regenza prevesa per exempel da posiziunar il Grischun sco chantun il pli impurtant da la Svizra orientala en connex cun l'execuziun penala.

Exaurir la libertad finanziala d'agir
Las finanzas dal chantun sa chattan actualmain anc en in bun stadi. Ils resultats dal plan da finanzas mussan percunter – malgrà supposiziuns optimisticas – gronds deficits per ils onns 2013 fin 2016. Tenor la directiva da la politica da finanzas importa il surpli d'expensas maximalmain 50 milliuns francs. Questa valur directiva è decisiva per far il preventiv annual. Las investiziuns totalas planisadas ha la regenza però gia reducì ad in volumen supportabel.

La creschientscha da las atgnas contribuziuns a terzas persunas, en spezial en ils secturs da la sanada e dals fatgs socials cuntinuescha. En quests champs d'incumbensa dinamics sto l'augment da las expensas vegnir reducì cleramain cun agid d'ina revisiun da las basas legalas. Ils proxims onns ston ultra da quai vegnir realisads gronds projects structurals che chaschunan gronds custs. Latiers tutgan la realisaziun dal nov dretg da protecziun da l'uffant e da creschids, las refurmas da vischnancas e dal territori sco er la revisiun totala da la lescha da scola. Ulteriurs spustaments da las grevezzas tranter il chantun e las vischnancas ston vegnir evitads. Pervia da questa situaziun da partenza è la libertad finanziala dal chantun gia exaurida per gronda part en la nova perioda da planisaziun. En il rom dal preventiv annual ston vegnir fatgas ulteriuras correcturas per stgaffir spazi per la realisaziun dals puncts centrals da svilup.


Infurmaziuns:
- cussegliera guvernativa Barbara Janom Steiner, scheffa dal departament da giustia, segirezza e sanadad, tel. 081 257 25 01
- chancelier Claudio Riesen, chanzlia chantunala dal Grischun, tel. 081 257 22 21


Gremi: regenza
Funtauna: rg chanzlia chantunala dal Grischun