La presidenta da la regenza Barbara Janom Steiner realisescha ina seria d'inscunters cun la populaziun grischuna sut il motto "Il Grischun essan nus – la presidenta da la regenza tranter nus". La proxima fin d'emna vegn Janom Steiner a sa trategnair en la Val Puschlav, en la Tumleastga/Val Schons sco er en il Grischun central.

La seria d'inscunters "Il Grischun essan nus" maina Barbara Janom Steiner las proximas emnas en tut las trais regiuns linguisticas dal chantun. Sin il program stattan differentas occurrenzas e scuntradas, ch'èn vegnidas proponidas da la populaziun per ina visita da la presidenta da la regenza.

Sonda, ils 20 d'october 2012, vegn Janom Steiner a dar in'egliada sin ils mulins da glatsch spectaculars da Cavaglia en il Puschlav. Gist en vischinanza da l'iert da glatschers mussa in'exposiziun "Glatschers: ier – oz – damaun", co che la cuntrada dad oz è sa furmada e tge consequenzas che las midadas dal clima han. La visita da la presidenta da la regenza a Cavaglia dura da las 10.00 fin a las 14.00. A las 11.15 è la populaziun envidada cordialmain ad in aperitiv ed ad in inscunter cun Janom Steiner.

Dumengia, ils 21 d'october 2012, persequitescha Janom Steiner il Transviamala Run & Walk. La cursa populara da Tusaun tras la chavorgia da la Viamala fin a Donat na permetta betg mo tensiun, mabain porscha er la pussaivladad per ina baterlada spontana cun la populaziun. Cun ina tiba dat Janom Steiner a las 10.00 a Tusaun il signal da partenza per il Transviamala Run. Sur mezdi è la presidenta da la regenza preschenta a la festa populara a Donat. Là vegn ella a dar a las 13.00 il culp da partenza per la cursa da lumpazis, ina cursa d'obstachels per uffants.

Er dumengia, ils 21 d'october 2012, visita Janom Steiner il museum da viafier a Bravuogn. Il museum a la lingia da l'Alvra da la Viafier retica mussa l'istorgia ed il temp preschent da la construcziun dal la Viafier retica e renda vivibla la fascinaziun per la viafier. Er durant la visita a Bravuogn (a partir da las 15.00) datti la pussaivladad per discurs persunals cun la presidenta da la regenza. A las 17.00 ha lieu in aperitiv popular, accumpagnà musicalmain da la societad da musica da Bravuogn. 
 

Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01 


Gremi: departament da finanzas e vischnancas
Funtauna: rg departament da finanzas e vischnancas