Las collavuraturas ed ils collavuraturs dal chantun Grischun duain pudair profitar da cundiziuns d'engaschament e da lavur modernas. Il chantun duai pudair sa cumprovar sco patrun cumpetitiv. La regenza grischuna ha lantschà la consultaziun tar ina revisiun totala da la lescha dal persunal.

La lescha davart la relaziun da lavur da las collavuraturas e dals collavuraturs dal chantun Grischun (lescha dal persunal) duai vegnir midada en dus reguards. Materialmain vegnan integradas da nov en la lescha cundiziuns d'engaschament e da lavur modernas per singuls secturs. Formalmain vegn repassada la sistematica da la lescha: Las disposiziuns reglan ils princips da la relaziun da lavur; ils dretgs e las obligaziuns vegnan concretisads pli fitg sin il stgalim da l'ordinaziun. Uschia duain las relaziuns d'engaschament e da lavur pudair vegnir adattadas en il futur pli svelt a las relaziuns ed als basegns che sa midan.

La regenza ha deliberà la revisiun totala da la lescha dal persunal per la consultaziun che dura fin ils 10 da matg 2013. La lescha vala sco enfin ussa per tut las collavuraturas ed ils collavuraturs da l'administraziun chantunala, da las dretgiras chantunals sco er dals instituts autonoms da dretg public. Exceptadas da quai èn unicamain las relaziuns da lavur tar la banca chantunala grischuna. 

Nov dretg da vacanzas, extensiun dal congedi da maternitad e vegliadetgna da renta flexibla fin a 67 onns
Las collavuraturas ed ils collavuraturs pon profitar d'intginas meglieraziuns. Il dretg minimal da vacanzas da las collavuraturas e dals collavuraturs vegn auzà da 20 a da nov 23 dis. Il congedi da maternitad vegn extendì a 16 emnas, entant ch'il salari vegn pajà vinavant a 100 pertschient durant quest temp (enfin ussa 14 emnas a 90 pertschient). Da nov vegn il congedi da paternitad fixà explicitamain en la lescha. La regenza regla la concepziun.

Resguardond il svilup demografic e la finanziaziun da la prevenziun per la vegliadetgna duain las collavuraturas ed ils collavuraturs pudair vegnir occupads vinavant pli ditg che la vegliadetgna ordinaria da pensiun da 65 onns, fin a la nova vegliadetgna maximala da 67 onns. In pensiunament flexibel a partir da 60 onns resta pussaivel. In nov artitgel cuntegna ils princips dal svilup dal persunal. Il chantun promova e sustegna las collavuraturas ed ils collavuraturs en lur carriera professiunala.

L'incumpatibilitad d'in engaschament tar il chantun cun l'execuziun da tscherts uffizis politics daventa pli rigurusa. La regulaziun davart l'execuziun d'activitads accessoricas vegn cumplettada cun in'obligaziun d'annunzia. Plinavant vegnan creadas da nov las basas legalas per manar sistems electronics d'infurmaziun dal persunal. Quai vegn fatg en enclegientscha cun la protecziun da datas. 
 

Remartga:
La consultaziun dura fin ils 10 da matg 2013. Dals documents da consultaziun poi vegnir prendì invista en l'internet sut www.gr.ch (consultaziuns currentas). 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01


Gremi: regenza
Funtauna: rg chanzlia chantunala dal Grischun