En sia ultima sesida ha la regenza grischuna tractà diversas fatschentas communalas e regiunalas. 

Promover vinavant la vendita da muvel
Il chantun promova la vendita d'animals da niz cun sustegnair activitads da reclama sco er mesiras per dischimpegnar las fieras da muvel. La realisaziun da questas mesiras po vegnir surdada ad in'organisaziun agricula. En il Grischun procura la graubündenVIEH SA per ina vendita optimala dal muvel. Sco indemnisaziun pauschala survegn ella per quai 106 000 francs per l'onn current. Per l'organisaziun dals martgads publics da muvel da maz vegn pajada ina contribuziun da basa da 140 000 francs. Vitiers vegnan contribuziuns per chau per arments, per nursas e per chauras. Ultra da quai vegn il martgà da nursas promovì er quest onn cun ina contribuziun da 6 francs per animal commerzialisà. Tar stimads 20 000 animals resulta da quai ina contribuziun totala da 120 000 francs per onn. Per nursas che vegnan vendidas e transportadas davent en las vals dal sid vegn pajada ina contribuziun da transport da 4 francs per animal. 

Contribuziun a la midada d'unitads d'abitar en la chasa da persunas attempadas e da tgira a Schiers
Per midar trais chombras da dus letgs en sis chombras d'in letg en la chasa da persunas attempadas e da tgira a Schiers vegn garantida ina contribuziun chantunala d'investiziun pauschala da totalmain 75 000 francs. Premess vegn che las vischnancas da la regiun da planisaziun Partenz pajan il medem import.
Las chombras da dus letgs eran da lur temp vegnidas construidas sco abitaziuns per persunas attempadas, mintgamai cun in spazi d'abitar, cun ina stanza, cun in local sanitar sco er cun ina pitschna cuschina. Dapi l'avertura èn questas abitaziuns dentant adina vegnidas duvradas – pervia da la fitg gronda dumonda – sco chombras da dus letgs per persunas che basegnan tgira. 

Fixà las finamiras dal proprietari per l'assicuranza d'edifizis e per la cassa per donns elementars
La regenza ha fixà las finamiras dal chantun sco proprietari envers l'assicuranza d'edifizis dal chantun Grischun ed envers la cassa per donns elementars dal chantun Grischun. Las finamiras dal proprietari concretiseschan las incumbensas e las directivas prescrittas da la lescha. Ellas cuntegnan tranter auter indicaziuns davart la premia media da l'assicuranza d'edifizis, davart ils custs d'administraziun, davart la cuntentientscha da la clientella sco er davart la furmaziun da reservas. 
 

Da vischnancas e da regiuns

• Puschlav: Il project "deposit da laina Abrüsù" da la vischnanca da Puschlav vegn approvà. Als custs vegn garantida ina contribuziun da maximalmain 131 840 francs. Cun il project vegn il deposit da laina ch'exista en il territori Abrüsù gist vi da la via chantunala extendì ad ina grondezza da 3000 meters quadrat.
• St. Antönien: La revisiun parziala da la planisaziun locala, concludida da la vischnanca da St. Antönien ils 20 da zercladur 2012, vegn approvada. Cun la revisiun parziala vegni fatg frunt al parcar nuncontrollà en la cuntrada. Las plazzas da parcar futuras en ils territoris "Matta", "Wang" e "Vordersäss" cumpiglian 15, 10 e 12 plazzas. La vischnanca sto garantir che las plazzas da parcar publicas na vegnan betg duvradas en cas da privel da lavinas.

Gremi: regenza
Funtauna: rg chanzlia chantunala dal Grischun