Per sanar il Center da furmaziun per il guaud a Maiavilla è vegnida concedida ina incumbensa da planisaziun en l'autezza da 6,3 milliuns francs.

Il Center da furmaziun per il guaud a Maiavilla (l'anteriura Scola interchantunala da selviculturas e selviculturs) è vegnì installà tranter ils onns 1974 e 2007. L'edifizi principal è vegnì construì da l'architect Andres Liesch, Cuira, ed engrondì trais giadas fin ussa. Ils singuls edifizis demussan in basegn da sanaziun che correspunda a lur vegliadetgna.
Per la sanaziun integrala dal stabiliment ha la Fundaziun "Scola interchantunala da selviculturas e selviculturs Maiavilla" sco patruna da construcziun laschà far ina incumbensa da studi en la procedura selectiva la stad 2012. La finamira era ina sanaziun persistenta che tegna quint da la substanza e che sa distingua cun soluziuns pragmaticas. In eventual engrondiment dueva vegnir preschentà ed integrà tant funcziunalmain sco er architectonicamain. In'ulteriura exigenza era il concept d'energia modern cun in implant fotovoltaic integrà.
Gudagnà l'incumbensa da studi ch'è vegnida fatga en moda anonima ha il team "Bovel" sut la direcziun dals architects Rudolf Fontana & partenaris SA, Domat. Ils custs dal project vegnan stimads a 6,3 milliuns francs. Detagls davart l'incumbensa da studi ch'è vegnida dada pli baud e las infurmaziuns davart il resultat pon vegnir chargiads giu da la pagina d'internet www.hochbauamt.gr.ch. Ils projects pon vegnir contemplads fin ils 8 da mars 2013 en la halla d'entrada dal Center da furmaziun per il guaud a Maiavilla, mintgamai tranter las 8.00 e las 17.00.

En il rom d'in concordat è vegnida fundada ils 11 d'october 1972 la Fundaziun "Scola interchantunala da selviculturas e selviculturs Maiavilla" (SISM). Ils fundaturs èn ils chantuns Uri, Sviz, Sursilvania, Sutsilvania, Glaruna, Zug, Schaffusa, Appenzell dadens, Appenzell dador, Son Gagl, Grischun, Turgovia, Tessin ed il principadi da Liechtenstein. L'intent da la fundaziun è d'instituir e da manar ina scola spezialisada per selviculturas e per selviculturs. En questa scola pon vegnir organisads er auters curs ed autras occurrenzas.
Per incumbensa da la Fundaziun SISM porscha la Scola spezialisada superiura da la Svizra sidorientala (IFSP) al Center da furmaziun per il guaud (BZWM) a Maiavilla ils studis selvicultura/selvicultur dipl. SSS sco er ils studis capobostgera/capobostger e manadra/manader d'acziuns cun crana a cabel sco er differents curs spezialisads en connex cun il guaud. Il BZWM garantescha che la furmaziun forestala a Maiavilla tegna quint da las pretensiuns e dal svilup en la branscha forestala e ch'ella vegn rinforzada uschia cuntinuadamain. Ultra da quai garantescha el ch'i stat a disposiziun als chantuns da fundaziun ed al principadi da Liechtenstein in center da cumpetenza per la scolaziun, per il perfecziunament e per la furmaziun supplementara da lur persunal forestal. Ultra da las localitads da scola e d'instrucziun, d'in guaud instructiv sco er d'indrizs tecnics e da maschinas dispona il BZWM da l'infrastructura necessaria per l'alimentaziun e per l'alloschament da las emprendistas e dals emprendists sco er da las studentas e dals students che derivan dals chantuns fundaturs e dal principadi da Liechtenstein.


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, president dal cussegl da fundaziun BZWM, tel. 081 257 36 01


Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun