La cumissiun predeliberanta dal cussegl grond ha predeliberà la missiva da la regenza tar la revisiun totala da la lescha davart la cassa da pensiun chantunala dal Grischun e recumonda al cussegl grond d'approvar il project.

La missiva da la regenza tar la revisiun totala da la lescha davart la cassa da pensiun chantunala dal Grischun tracta novas prescripziuns dal dretg federal. Schebain ch'il chantun Grischun ha gia ademplì premissas decisivas cun dar a la cassa da pensiun l'independenza sco er cun exequir la finanziaziun restanta da la cassa da pensiun chantunala dal Grischun, sto el anc realisar ulteriurs puncts: la tscherna dal sistem da chapitalisaziun, la concepziun da la garanzia chantunala, la definiziun da las contribuziuns u da las prestaziuns sin il stgalim da la lescha e la procedura electorala da l'organ paritetic (cumissiun administrativa).

Sut il presidi da la deputada Angela Casanova-Maron ed en preschientscha da cussegliera guvernativa Barbara Janom Steiner sco er dal directur da la cassa da pensiun chantunala dal Grischun, Willi Berger, ha la cumissiun predeliberanta dal cussegl grond tractà quest project e predeliberà il sboz da lescha per mauns dal cussegl grond. Suenter ina discussiun detagliada è la cumissiun arrivada a la conclusiun da sustegnair las soluziuns proponidas da la regenza. Ella beneventa unanimamain il sistem da la chapitalisaziun cumplaina sco er la regulaziun da las contribuziuns sin il stgalim da la lescha tras il cussegl grond. Uschia fiss la cumissiun administrativa cumpetenta per reglar las prestaziuns. La cumissiun predeliberanta sustegna plinavant er la proposta da la regenza da stritgar senza cumpensaziun la garanzia chantunala. Tenor il dretg vertent fiss quella tuttavia scadida la fin da l'onn 2015.

Ultra da quai duai la cassa da pensiun chantunala dal Grischun sa numnar da nov mo pli cassa da pensiun dal Grischun.

Correspundentamain è la cumissiun entrada unanimamain en il project e recumonda al cussegl grond er da l'approvar. Il cussegl grond vegn a tractar la revisiun totala da la lescha davart la cassa da pensiun chantunala dal Grischun en la sessiun d'avrigl 2013. 
 

Infurmaziuns:
presidenta da la cumissiun Angela Casanova-Maron, tel. 079 417 47 64


Gremi: cumissiun predeliberanta per la revisiun totala da la lescha davart la cassa da pensiun chantunala dal Grischun
Funtauna: rg cumissiun predeliberanta per la revisiun totala da la lescha davart la cassa da pensiun chantunala dal Grischun