Maschinas da pista ed ulteriurs vehichels a motor da lavur duain en l'avegnir vegnir liberads da la taglia da traffic. La regenza grischuna suttametta al cussegl grond ina missiva correspundenta davart la revisiun parziala da la lescha introductiva tar la lescha federala davart il traffic sin via.

Cun il sboz per mauns dal parlament ademplescha la regenza ina incumbensa dal cussegl grond. En sia sessiun da zercladur 2012 ha il cussegl grond acceptà ina incumbensa concernent la liberaziun da la taglia da traffic per maschinas da pista. Cunquai ch'i na vegn betg charrà cun maschinas da pista sin las vias, na duain lur possessurs er betg pajar ina contribuziun per cuvrir las grevezzas stradalas generalas. En sia missiva tar la revisiun parziala correspundenta da la lescha introductiva tar la lescha federala davart il traffic sin via fa la regenza dentant in pass enavant consequent. Cunquai ch'i na vegn er betg charrà cun auters vehichels a motor da lavur – sco per exempel ina splattitscha u ina maschina da catramar – sin vias en il vair senn dal pled, duain er quests vehichels vegnir liberads da la taglia da traffic. La regenza ha proponì la suandanta formulaziun: Liberads da la taglia da traffic èn "vehichels a motor da lavur che ston per regla vegnir transportads al lieu, nua ch'els vegnan duvrads". Las perditas tar la taglia da traffic che resultan tras la regulaziun vegnan calculadas a totalmain circa 120 000 francs per onn.

Il cussegl grond vegn a tractar la fatschenta en la sessiun d'avust 2013. La revisiun da la lescha duai entrar en vigur il 1. da schaner 2014. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  
 

Gremi: regenza
Funtauna: rg chanzlia chantunala dal Grischun