La conferenza da las scheffas e dals schefs da las regenzas da la cuminanza da lavur da las regiuns alpinas (ARGE ALP) ha discutà oz a Galtür en il Tirol davart il svilup da la strategia europeica per il territori alpin. La finamira è quella da stgaffir ina basa per schliar cuminaivlamain problems actuals en il territori alpin. Sco commember da la ARGE ALP s'engascha il chantun Grischun en il process da svilup sin plaun internaziunal.
Il zercladur 2012 è vegnì deliberà a chaschun d'ina conferenza da las regiuns alpinas a Bogn Ragaz in document d'iniziativa per ina strategia macroregiunala per il territori alpin. Ensemen cun ses partenaris da la ARGE ALP è il chantun Grischun stà participà vi da l'elavuraziun dal document. Ussa – in onn pli tard – ha la conferenza da las scheffas e dals schefs da las regenzas da la ARGE ALP a Galtür en il Tirol pudì prender enconuschientscha cun plaschair dal fatg che sia iniziativa è vegnida recepida en moda positiva sin il plaun dals stadis naziunals, da la cumissiun europeica e dal parlament europeic. Uschia è il parlament europeic s'exprimì il matg passà a favur da l'elavuraziun d'ina strategia europeica macroregiunala per il territori alpin.
L'october vegnint è previsa a Grenoble (Frantscha) ina conferenza internaziunala, nua ch'i duai vegnir deliberà in document cuminaivel dals stadis alpins e da las regiuns alpinas davart ils puncts centrals essenzials da la strategia per il territori alpin. Il Grischun fa part dal team da redacziun che prepara actualmain quest document. Il document duai vegnir preschentà il december 2013 al cussegl da l'Uniun europeica a Brüssel. Per la cussegliera guvernativa grischuna Barbara Janom Steiner è ina strategia per las Alps ina schanza da prender per mauns en moda pli effectiva e sin basa colleghiala las sfidas cuminaivlas ensemen cun autras regiuns alpinas e cun auters stadis alpins e da nizzegiar meglier ils potenzials dal territori alpin. Gist en connex cun ils temas energia, aua, clima e traffic sajan dumandadas strategias cun in grond sustegn, sco quai che Janom Steiner ha ditg oz a Galtür.
Lavur da project impurtanta en il territori alpin
Sco uniun transcunfinala da diesch stadis federativs, regiuns e chantuns or da quatter pajais sa distingua la ARGE ALP en spezial tras sia lavur da project cuminaivla. Uschia han ins tratg ina bilantscha intermediara davart ils projects currents. Sco project da success sut la direcziun grischuna po vegnir numnà "ARGE ALP sport". Las concurrenzas sportivas en tut il territori da la ARGE ALP vegnan cuntinuadas fin l'onn 2017. En connex cun il segund project grischun actual – che s'occupa da l'influenza da la schelira permanenta sin bovas e sin crudadas da grips – èn previsas questa stad lavurs da perscrutaziun champestras en il massiv da la Bregaglia. La finamira è quella da sviluppar in sistem per localisar e per survegliar instabilitads dals grips sin grondas surfatschas.
A Galtür èn er vegnids lantschads projects novs. Uschia vegnan expertas ed experts a sa fatschentar en il rom d'ina dieta speziala en il Tirol dal sid cun la cultivaziun dad ervas en il territori alpin.
Presidiada vegn la ARGE ALP da nov da la provinza autonoma Trento. Sco usità è il presidi vegnì surdà suenter in onn en il rom da la conferenza da las scheffas e dals schefs da las regenzas – questa giada dal Tirol.
Maletg:
Fotografia da gruppa da la 44. conferenza da las scheffas e dals schefs da las regenzas da la ARGE ALP a Galtür, Tirol (da sanestra): Heinrich Marckhgott (Salzburg), Giampiero Gianella (Tessin), Willi Haag (Son Gagl), Karlheinz Rüdisser (Vorarlberg), Tiziano Mellarini (Trentino), Barbara Janom Steiner (Grischun), Günther Platter (Tirol), Emilia Müller (Baviera), Luis Durnwalder (Tirol dal sid), Ugo Parolo (Lumbardia).
Infurmaziuns:
Cussegliera guvernativa Barbara Janom Steiner, scheffa dal departament da finanzas e vischnancas dal Grischun, e-mail
barbara.janom@dfg.gr.ch (ella telefona lura enavos)
Dumondas da las medias per telefon: Luzi Bürkli, incumbensà per l'infurmaziun dal chantun Grischun, tel. 079 938 93 33
Gremi: ARGE ALP / regenza dal chantun Grischun
Funtauna: rg chanzlia chantunala dal Grischun