La cumissiun dal cussegl grond per sanadad e fatgs socials ha predeliberà la missiva da la regenza tar la revisiun parziala da la lescha davart l'assicuranza da malsauns e la reducziun da las premias e sustegna la proposta da curreger la basa per calcular il dretg da survegnir ina reducziun da las premias.

Sut il presidi da la deputada Gabriela Tomaschett-Berther ed en preschientscha da cusseglier guvernativ Christian Rathgeb ha la cumissiun per sanadad e fatgs socials (CSF) decidì en sia ultima sesida da proponer al cussegl grond d'approvar la revisiun parziala da la lescha davart l'assicuranza da malsauns e la reducziun da las premias (LARP). A la sesida eran er preschents represchentants da l'administraziun da taglia e da l'institut d'assicuranza sociala.

La basa per calcular la reducziun da las premias è actualmain d'ina vart l'entrada suttamessa a la taglia. La consequenza da quai è che deducziuns tenor il dretg fiscal n'han betg mo effects sin las taglias, mabain – perquai che l'entrada suttamessa a la taglia è pli pitschna – er ina influenza directa sin il dretg da survegnir ina reducziun individuala da las premias. Persunas che han il dretg da far deducziuns admessas tenor il dretg fiscal profitan pia dublamain, sch'ellas pon sbassar – cun agid da mesiras per optimar las taglias – lur entradas sut il cunfin ch'è relevant per survegnir ina reducziun da las premias: Quai po vegnir fatg en spezial cun pajar en en instituziuns da prevenziun, cun far donaziuns facultativas e tras custs auts per la proprietad immobigliara.

Per calcular la reducziun da las premias vegnan da l'autra vart mess a quint – ultra da las entradas – er 20 pertschient da la facultad ch'è decisiva per fixar la tariffa. L'ultima revisiun dal dretg fiscal ch'è entrada en vigur il 1. da schaner 2010 cuntegneva in augment dals imports libers da taglia tar la taglia sin la facultad. La reducziun da la facultad suttamessa a la taglia ch'è resultada da quai ha da sia vart puspè gì consequenzas directas per il dretg da survegnir ina reducziun da las premias.

La missiva da la regenza tar la revisiun parziala da la LARP cuntegna ussa mesiras per eliminar questas consequenzas betg giavischadas per il dretg da survegnir ina reducziun da las premias che resulta da l'ultima revisiun da la lescha da taglia. En l'avegnir duain vegnir adidas las deducziuns permessas tenor il dretg fiscal a l'entrada suttamessa a la taglia, sche las deducziuns n'han betg motivs socials u famigliars. Ultra da quai vegn eliminada la consequenza da la revisiun da la lescha da taglia cun resguardar 10 pertschient da la facultad netta e betg pli da la facultad suttamessa a la taglia per calcular il dretg da survegnir ina reducziun da las premias.

La cumissiun sustegna la midada che vegn proponida da la regenza. Ella è entrada unanimamain en la missiva e recumonda er al cussegl grond d'acceptar questa revisiun parziala da la LARP. Ina minoritad da la cumissiun propona da deducir ils imports libers da taglia per uffants da la facultad netta che furma la basa per calcular il dretg da survegnir ina reducziun da las premias. Il cussegl grond vegn a tractar la revisiun parziala da la LARP en la sessiun d'avust 2013. 
 

Infurmaziuns:
presidenta da la cumissiun Gabriela Tomaschett-Berther, tel. 081 920 22 22


Gremi: cumissiun per sanadad e fatgs socials
Funtauna: rg cumissiun per sanadad e fatgs socials