En la Tumleastga ston vegnir terrads tieus da guaud ch'èn infestads cun la malsogna da bindels cotschens. Quai per evitar che la malsogna da plantas sa derasia vinavant.

Ensemen cun represchentants dal servetsch forestal chantunal han spezialists dal servetsch federal da protecziun da las plantas (SFPP) e da l'institut federal per la perscrutaziun da guaud, naiv e cuntrada (WSL) constatà il cumenzament da questa stad en il sectur da l'access a l'autostrada A13 Tusaun sid che tieus da guaud èn infestads considerablamain cun l'uschenumnada malsogna da bindels cotschens (dothistroma septosporum, teleomorf scirrhia pini). La malsogna da bindels cotschens vegn chaschunada dal bulieu scirrhia pini. Quest bulieu deriva probablamain da l'America centrala ed è vegnì observà en Svizra per l'emprima giada l'onn 1989. Pertutgads èn cunzunt tieus en culturas da bostgs, en parcs e sin santeris. Quest onn è la malsogna da bindels cotschens cumparida en Svizra per l'emprima giada libramain en il guaud. Tieus infestads cun la malsogna pireschan entaifer paucs onns, quai che po chaschunar perditas massivas.
En l'ordinaziun federala davart la protecziun da las plantas figurescha la malsogna da bindels cotschens sco organissem nuschaivel spezialmain privlus. Tenor questa ordinaziun èn organissems nuschaivels spezialmain privlus suttamess a l'obligaziun d'annunzia. Plinavant ston l'uffizi chantunal cumpetent resp. ils proprietaris u cultivaturs da la parcella respectiva prender las mesiras che vegnan ordinadas da l'uffizi federal cumpetent per eliminar fuainas singulas.
Sin basa da questa obligaziun d'eliminaziun ed en il senn da mesiras immediatas per limitar resp. impedir in'ulteriura derasaziun da l'infestiun ston exclusivamain ils tieus giuvens infestads vegnir terrads e dismess las proximas emnas en il sectur da l'access a l'autostrada A13 Tusaun sid. L'uffizi da guaud e privels da la natira supplitgescha per chapientscha. 

Servetsch federal da protecziun da las plantas (SFPP)
L'incumbensa prioritara da la protecziun da las plantas è quella d'impedir l'import e la derasaziun da parasits e da malsognas spezialmain privlusas da plantas e da products vegetals. Il servetsch federal da protecziun da las plantas (SFPP), ch'è responsabel per l'adempliment da questa incumbensa, vegn manà cuminaivlamain da l'uffizi federal d'agricultura (UFAG) e da l'uffizi federal d'ambient (UFAM). El collavura cun autoritads svizras ed estras, cun organisaziuns internaziunalas sco er cun federaziuns e cun interpresas en Svizra. La basa legala per mesiras fitosanitaras en Svizra è l'ordinaziun federala davart la protecziun da las plantas. 
 

Infurmaziuns:
- Lukas Kobler, uffizi da guaud e privels da la natira, inschigner forestal regiunal, tel. 081 659 00 72
- Richard Walder, uffizi da guaud e privels da la natira, manader dal sectur "servetschs centrals", tel. 081 257 38 54, e-mail richard.walder@awn.gr.ch  
 

Gremi: uffizi da guaud e privels da la natira
Funtauna: rg uffizi da guaud e privels da la natira