Per la votaziun chantunala dal pievel da dumengia, ils 22 da settember 2013, che cuntegneva ina dumonda decisiva, èn las vuschs vegnidas verifitgadas d'uffizi. Tenor la verificaziun è la dumonda decisiva vegnida decidida cun ina differenza da 137 vuschs a favur da l'iniziativa dal pievel "Gea ad electricitad netta senza forza electrica da charvun".

La dumengia da votaziun dals 22 settember 2013 èn vegnidas acceptadas cleramain tant l'iniziativa chantunala dal pievel "Gea ad electricitad netta senza forza electrica da charvun" sco er la cuntraproposta dal cussegl grond "Naginas novas investiziuns en ovras electricas a charvun, sche l'emissiun da CO2 na po betg vegnir reducida considerablamain". Tenor il resultat provisoric da la dumengia da votaziun era la dumonda decisiva – "En cas che tant l'iniziativa dal pievel sco er la cuntraproposta vegnan acceptadas: Duai l'iniziativa dal pievel u la cuntraproposta entrar en vigur?" – vegnida decidida a favur da l'iniziativa dal pievel.

Ils 24 da settember 2013 ha la regenza ordinà ina verificaziun da las vuschs da la dumonda decisiva. Quai sa basond sin la lescha davart ils dretgs politics en il chantun Grischun, tenor la quala il resultat total provisoric eruì a chaschun d'ina votaziun sto vegnir verifitgà d'uffizi, sche la differenza tranter las vuschs affirmativas e las vuschs negativas è pli pitschna che 0,3 pertschient dals cedels da votar consegnads valaivels. Questa premissa era ademplida, damai ch'il resultat total provisoric dal chantun mussava ina differenza da mo 124 vuschs tranter l'iniziativa (24 650 vuschs) e la cuntraproposta (24 526 vuschs).
Correcturas posteriuras da resultats communals han purtà tar la dumonda decisiva ina differenza da 125 vuschs a favur da l'iniziativa. Quest resultat è vegnì publitgà en il fegl uffizial dal chantun dals 26 da settember 2013.

Suenter ch'il material da votar da tut las 158 vischnancas grischunas è stà avant maun, ha la chanzlia chantunala dumbrà anc ina giada las vuschs per incumbensa da la regenza, e quai ils 30 da settember 2013 en las localitads da la Chasa grischa a Cuira. Represchentantas e represchentants dal comité d'iniziativa èn stads preschents. La verificaziun ha gì lieu tenor ina procedura cleramain structurada e cun agid da controllas, uschia che la correctadad da la verificaziun è stada garantida.

En 64 da 158 vischnancas èn sa mussadas midadas relevantas envers il resultat ch'è stà publitgà ils 26 da settember 2013. Las midadas constatadas han principalmain ils suandants motivs:
- sbagls d'interpretaziun tar l'attribuziun d'ina vusch
- sbagls en connex cun registrar las vuschs en il sistem da votaziun (scumbigl)
- emblidà per sbagl da resguardar vuschs da vote électronique da las Svizras e dals Svizzers a l'exteriur
- sbagls en connex cun giuditgar la valaivladad d'in cedel da votar
- betg resguardà vuschs nunvalaivlas inoltradas per posta

Sin fundament da la verificaziun da la dumonda decisiva resulta – envers il resultat publitgà ils 26 da settember 2013 – il suandant nov resultat total chantunal:

Vuschs a favur da l'iniziativa dal pievel: 24 659
Vuschs a favur da la cuntraproposta: 24 522
Differenza: 137

La regenza ha prendì enconuschientscha dal resultat da la verificaziun. Il resultat da la verificaziun dals 30 da settember 2013 vegn publitgà uffizialmain en il fegl uffizial dal chantun Grischun dals 3 d'october 2013. Il medem di vegn il resultat detaglià da la verificaziun publitgà en l'internet sut www.gr.ch. 
 

Infurmaziuns:
Walter Frizzoni, vicechancelier, tel. 081 257 22 22


Gremi: regenza
Funtauna: rg chanzlia chantunala dal Grischun