Il departament da giustia, segirezza e sanadad ha fixà sias ideas en in model directiv che descriva, co che las structuras dal provediment da la sanadad da noss chantun ston vegnir concepidas per ch'il Grischun disponia er en l'avegnir d'in sistem da sanadad che resguarda tut las regiuns e ch'è economicamain supportabel. 

Il provediment cun ospitals regiunals duai vegnir mantegnì
En il model directiv concernent il provediment da la sanadad en il chantun Grischun qua avant maun parta il departament da giustia, segirezza e sanadad dal fatg, ch'il sistem da provediment actual cun ospitals regiunals vegnia mantegnì er en l'avegnir pervia da las relaziuns topograficas dal Grischun.
Il departament da giustia, segirezza e sanadad spetga che l'ospital chantunal dal Grischun sustegnia ils ospitals regiunals – sin basa d'ina collavuraziun colleghiala – tar l'adempliment da lur incaricas da prestaziun. Ils ospitals regiunals da lur vart duessan sa stentar che las pazientas ed ils pazients dal Grischun sa laschian tractar cun preferenza – malgrà la libra tscherna da l'ospital – en l'ospital chantunal dal Grischun ed en las clinicas privatas en il Grischun. Cunvegnas da cooperaziun cun l'ospital chantunal dal Grischun stuessan vegnir fatgas dals ospitals regiunals en l'interess da rinforzar il Grischun sco plazza d'ospitals, premess che quel saja en cas da satisfar als basegns dals ospitals regiunals. Mo in Grischun cun ina ferma plazza d'ospitals è en cas da garantir a la populaziun sco er als giasts da vacanzas er en l'avegnir in vast provediment medicinal che correspunda al progress medicinal. 

Ils ospitals regiunals, las chasas da persunas attempadas e da tgira ed ils servetschs da spitex duain s'unir a centers da sanadad
Per ch'ils ospitals regiunals, las chasas da persunas attempadas e da tgira ed ils servetschs da la spitex possian tegnair quint er en il futur da las pretensiuns economicas e qualitativas che creschan ad in crescher, postulescha il departament da giustia, segirezza e sanadad en il model directiv d'ina vart la creaziun da regiuns da sanadad congruentas per ils secturs dals ospitals, da las chasas da persunas attempadas e da tgira sco er dals servetschs da la spitex e da l'autra vart l'adempliment da tut las prestaziuns medicinalas e da tgira en la regiun da sanadad respectiva tras in center da sanadad che cumpiglia tut ils furniturs da prestaziuns instituziunals. 

Pertge è in provediment medicinal da basa impurtant en tut las regiuns dal chantun?
La garanzia dal provediment medicinal da basa en tut il Grischun è ina premissa generala centrala per che l'urbanisaziun decentrala en il chantun Grischun possia vegnir mantegnida. Senza provediment medicinal da basa en l'entir chantun na po l'urbanisaziun decentrala dal Grischun betg vegnir mantegnida. Er il turissem sco sectur economic il pli impurtant dal Grischun premetta in provediment da la sanadad segir en tut las regiuns dal chantun.
Il model directiv resguarda perquai zunt fitg la garanzia dal provediment medical ambulant. Qua èsi chaussa da las vischnancas da sviluppar soluziuns innovativas en cooperaziun cun lur ospitals regiunals. En quest connex sustegna il chantun las vischnancas cun differentas mesiras. 

A tgi sa drizza il model directiv?
Il "Model directiv concernent il provediment da la sanadad en il chantun Grischun" qua avant maun sa drizza a tut las commembras ed a tut ils commembers d'autoritads che sa fatschentan cun dumondas dals fatgs da sanadad sco er a tut las burgaisas ed a tut ils burgais che han in interess vi da dumondas dals fatgs da sanadad.
Cun ina vasta derasaziun da quest document vul il departament da giustia, segirezza e sanadad d'ina vart mussar a la publicitad interessada sias ideas davart las structuras che stuessan vegnir prendidas en mira a vista mesauna per il provediment da la sanadad dal Grischun e da l'autra vart lantschar ina vasta discussiun en chaussa en las regiuns, en il cas ideal natiralmain er iniziar pass activs en direcziun d'ina creaziun da centers da sanadad – nun che quai saja gia capità u gia en planisaziun – sco er promover ina cooperaziun pli stretga tranter ils ospitals en il chantun. 
 
Tge structuras prenda il departament en mira per il provediment da la sanadad en il chantun? 

• Cuntinuaziun dal provediment cun ospitals regiunals 
• Divisiun identica dal chantun per tut ils secturs dal provediment da la sanadad 
• Adempliment da tut las prestaziuns tras in purschider per regiun

Tge mesiras prevesa il departament per cuntanscher las structuras prendidas en mira dal provediment da la sanadad? 

• Indemnisaziun adequata da las prestaziuns d'utilitad publica dals ospitals 
• Furmaziun da regiuns da provediment da la sanadad 
• Attribuziun da las incumbensas a las regiuns da provediment da la sanadad 
• Creaziun d'impuls per furmar in unic purtader per regiun da provediment da la sanadad 
• Garanzia dal provediment medical ambulant 

Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch 
- dr. Rudolf Leuthold, manader da l'uffizi da sanadad, tel. 081 257 26 41, e-mail Rudolf.Leuthold@san.gr.ch 


Gremi: departament da giustia, segirezza e sanadad
Funtauna: rg departament da giustia, segirezza e sanadad