Cun la strategia da proprietari per la Repower SA ha la regenza – ord vista dal chantun Grischun sco in dals acziunaris principals – deliberà finamiras individualas da proprietari per ils onns 2014 fin 2017. La regenza vul stgaffir premissas optimalas per che la Repower SA possia exister vinavant cun success sco interpresa grischuna ch'è integrada verticalmain en il martgà d'electricitad chantunal, naziunal ed europeic.

Sco interpresa d'energia independenta grischuna che s'orientescha cun sias activitads vers l'entira Svizra ed il mund presta la Repower SA ina contribuziun essenziala en l'interess da la politica d'electricitad grischuna. Ella ha perquai ina gronda impurtanza per l'economia publica, per la politica regiunala e per l'economia da finanzas. Questa situaziun favuraivla per il chantun e per las vischnancas sto vegnir garantida er en il futur uschè bain sco pussaivel. En quest connex duain vegnir resguardads er ils svilups actuals da l'interpresa e dals conturns dal martgà.

Per quest intent ha la regenza concludì sia strategia da proprietari per la Repower SA per ils onns 2014 fin 2017. En quella ha la regenza fixà finamiras individualas da proprietari ord la posiziun dal chantun sco in dals acziunaris principals. Ella ademplescha tras quai sias incumbensas e sia responsabladad en l'interess dal chantun en il rom da sias cumpetenzas sco er en accordanza cun ses dretgs e sias obligaziuns tenor il contract d'acziunaris vertent tranter il chantun e l'Axpo Holding SA e resguardond ils dretgs da terzs acziunaris e da participants.

Sin fundament dals puncts centrals e da las finamiras strategicas fixadas vul la regenza porscher – ord vista dal chantun – premissas optimalas per che la Repower SA possia avair er vinavant success en l'economia d'energia e stgaffir ina plivalur per las proprietarias ed ils proprietaris. La strategia da proprietari rinforza la qualitad particulara da la Repower SA sco uschenumnada interpresa d'energia ch'è integrada verticalmain en il martgà. Tenor quella duai la Repower SA pudair esser activa vinavant en tut ils secturs da la chadaina da valurisaziun da l'economia d'electricitad, da la producziun d'electricitad sur il commerzi e la distribuziun fin e cun il provediment d'electricitad.

Per consequenza da la votaziun dal pievel dals 22 da settember 2013, nua che l'iniziativa da charvun è vegnida acceptada, spetga la regenza dentant er da la Repower SA ch'ella na sa participeschia betg pli vi da societads cun ovras electricas a charvun. Ultra da quai duai l'interpresa sortir en moda ordinada e lianta dal project concret per l'ovra electrica a charvun Saline Joniche en Calabria. Tenor l'opiniun da la regenza ston las stentas correspundentas vegnir prendidas per mauns immediatamain e seriusamain. Uschia vegn realisada la voluntad exprimida dal pievel. 
 
 
Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch  
 

Gremi: regenza
Funtauna: rg chanzlia chantunala dal Grischun