La regenza grischuna ha prendì enconuschientscha dal quint final dal project per ils gieus olimpics d'enviern 2022. Plinavant ha ella deliberà contribuziuns – tranter auter per la protecziun da la lingia da viafier d'Arosa cunter crudada da crappa. 

Rendaquint tar il project per ils gieus olimpics d'enviern 2022
La regenza grischuna ha prendì enconuschientscha dal quint final da l'uniun "XXIV. Gieus olimpics d'enviern Grischun 2022". Tenor il quint final èn resultads – sco gia enconuschent – custs en l'autezza da circa 5,1 milliuns francs dals partenaris participads al project. Tenor la garanzia da survegnir contribuziuns che la regenza grischuna aveva dà sto il chantun Grischun surpigliar ina part da maximalmain in sisavel, quai che correspunda ad 855 537 francs. Ils auters custs vegnan pajads dals partenaris, pia da la confederaziun e da Swiss olympic (mintgamai 2/6), sco er da las vischnancas da San Murezzan e da Tavau (ensemen 1/6). 

Sanaziuns d'ovras electricas: verifitgar la calculaziun dals custs
L'intent da las disposiziuns da la lescha federala davart la protecziun da las auas che concernan la renatiralisaziun da las auas è tranter auter quel da reducir las consequenzas negativas per las auas currentas che derivan da l'utilisaziun da la forza idraulica. Possessurs d'ovras idraulicas che ston far lavurs da sanaziun survegnan indemnisads ils custs cumplains imputabels. Ina nova ordinaziun federala regla ils detagls per calcular ils custs da mesiras manaschialas. Perquai che la finanziaziun da la sanaziun da las ovras idraulicas è d'impurtanza centrala per ils chantuns alpins, han ils chantuns ch'èn s'associads en la Conferenza da las regenzas dals chantuns alpins (CRCA) – als quals appartegna er il Grischun – decidì d'inoltrar ina posiziun cuminaivla tar il sboz da l'ordinaziun. La regenza grischuna sustegna cumplainamain la posiziun da la CRCA. En quella vegn tranter auter dumandà da verifitgar cun quints da model, sche la calculaziun dals custs imputabels per mesiras manaschialas saja realisabla. Pir sin basa da talas calculaziuns da model possian vegnir giuditgadas las consequenzas da l'ordinaziun. Plinavant duai la confederaziun metter a disposiziun als chantuns meds d'agid per ina calculaziun unitara e per in giudicament en connex cun la finanziaziun da mesiras.


Da vischnancas e da regiuns

• Arosa: Il project "Segiraziun da grippa en il Verbrunnenwald" che l'uffizi da guaud e privels da la natira ha inoltrà per incumbensa da la Viafier retica (VR) vegn approvà. I vegn garantida ina contribuziun da maximalmain 1,95 milliuns francs. Il project ha la finamira da proteger tar Lüen la lingia da viafier d'Arosa. Per quai vegnan installadas raits da protecziun cunter crudada da crappa d'ina lunghezza totala da 94 meters sco er in rempar da protecziun cunter crudada da crappa d'ina lunghezza totala da 95 meters. Crudadas da crappa tar Lüen ils 29 da mars 2013 ed ils 16 d'october 2013 avevan chaschunà interrupziuns pli lungas da la lingia da la VR Cuira-Arosa.
• Churwalden: Per las lavurs da detagl e la concretisaziun dal "Portal Churwalden" (fasa 2) vegn garantida a la vischnanca da Churwalden ina contribuziun da totalmain 150 000 francs en il rom da la nova politica regiunala (NPR) (mintgamai per la mesadad a quint da la confederaziun e dal chantun). Il project rinforza l'attractivitad da la purschida turistica totala da la regiun. Latiers tutga la construcziun d'ina teleferica d'apport da Churwalden en il territori da skis da Lai-Arosa. L'avertura da questa teleferica è previsa per l'enviern 2015/16.
• Zernez: La revisiun parziala da la lescha da construcziun, concludida da la vischnanca da Zernez ils 30 d'avust 2013, vegn approvada. La revisiun cuntegna tranter auter novas disposiziuns davart l'autezza da la culmaina e davart la lunghezza d'edifizis.
• Circul da Bravuogn: La revisiun parziala da la constituziun cirquitala dal circul da Bravuogn dals 24 da november 2013 vegn approvada. Cun la revisiun parziala vegn abolì il cumin ed introducida la votaziun a l'urna sco cumpensaziun.

Contribuziuns chantunalas a differentas instituziuns ed occurrenzas

• Festival svizzer da chors d'uffants e da giuvenils: Il 5avel festival svizzer da chors d'uffants e da giuvenils che ha lieu dals 14 fin ils 17 da matg 2015 a Mustér vegn sustegnì cun ina garanzia da deficit da maximalmain 100 000 francs.
• Opera San Murezzan: A l'Opera San Murezzan vegn concedida ina garanzia da deficit da maximalmain 80 000 francs per dar l'opera "La Gazzetta" da Gioacchino Rossini il zercladur/fanadur 2014 en l'hotel Kulm a San Murezzan.

Projects da vias
Ultra da quai ha la regenza approvà 6 101 000 francs per lavurs da construcziun sin il suandant traject:
- via sursilvana: lavurs d'impressari en connex cun la construcziun da la punt dal Rain a Glion vest 
 

Gremi: regenza
Funtauna: rg chanzlia chantunala dal Grischun