La regenza ha nominà il cussegl turistic dal Grischun. Il cussegl turistic cusseglia la regenza ed ils acturs turistics davart temas strategics, cunzunt davart l'ulteriur svilup da las destinaziuns. El dat novs impuls per la cumpetitivitad internaziunala e promova per quest intent il svilup da projects innovativs. El procura per ina perspectiva externa critica e creativa e per in dialog progressiv cun ils acturs turistics. Cun la convocaziun dal cussegl turistic dal Grischun cumenza il nov program da turissem 2014 fin 2021. L'emprim president daventa prof. dr. Ernst A. Brugger.

La refurma dal turissem grischun 2006 fin 2013 ha procurà per structuras pli concisas en il turissem e per ina forza da persvader pli gronda. Ussa hai num da sa distinguer da la concurrenza internaziunala sin il martgà tras purschidas unicas, d'auta qualitad ed unidas e da porscher als giasts in'aventura cumplessiva unica. Exactamain qua è il punct da partenza dal program da turissem grischun 2014 fin 2021. Projects ch'integreschan en moda cooperativa ils differents offerents d'ina regiun turistica u dal chantun e che han ina strategia cuminaivla pon vegnir sustegnids en il rom d'in credit d'impegn da 21 milliuns francs durant ils proxims otg onns. La confederaziun ed il chantun sa participeschan mintgamai per la mesadad cun 10,5 milliuns francs. En il rom dals projects sustegnids duain ultra da quai vegnir acquirids ulteriurs meds finanzials.

Il turissem grischun stat pli e pli en la concurrenza internaziunala. In'analisa e strategia progressiva, critica e creativa è pli impurtanta che mai. Il sustegn da projects innovativs e progressivs duai mussar vias empermettentas. Per quest intent sco er per la direcziun strategica dal program da turissem grischun 2014 fin 2021 nominescha la regenza in cussegl turistic che consista da set fin indesch persunalitads. Il cussegl turistic duai sa sviluppar a "l'instanza turistica" per propi dal Grischun. El cusseglia, senza avair la cumpetenza da decider directa. Sia incumbensa è quella da sviluppar vinavant il sistem turistic general "turissem grischun". Per la cumposiziun dal cussegl turistic èn en emprima lingia decisivas las cumpetenzas professiunalas che vegnan giuditgadas sco necessarias per sviluppar a lunga vista il turissem grischun. Plinavant è impurtanta la relaziun da las singulas persunalitads cun il Grischun. A medem temp ston talas er cumprovar ina independenza uschè gronda sco pussaivel.

Ultra da l'orientaziun strategica è decisiva natiralmain er la realisaziun. Il cussegl turistic n'è pia betg mo in gremi consultativ da la regenza, mabain el cusseglia, motivescha e sustegna ils acturs turistics a sviluppar projects ed a realisar quels cun success. D'impurtanza centrala è qua in'orientaziun consequenta a projects innovativs, cumpetitivs sin plaun internaziunal e marcads tenor princips d'interpresa. En il cussegl turistic na sa tracti pia betg da represchentanzas politicas u da represchentanzas dals interess da las destinaziuns. Il barat activ tranter il cussegl turistic e las represchentanzas da las destinaziuns sco er da las branschas è dentant a medem temp fitg impurtant. Previs è perquai in dialog regular tranter il cussegl turistic e las represchentanzas da l'economia turistica sco er da las destinaziuns. 

Unì differentas cumpetenzas
Cun prof. dr. Ernst A. Brugger han ins gudagnà ina persunalitad per la funcziun da president dal cussegl turistic. Brugger è s'occupà durant sia entira carriera vertenta cun dumondas dal svilup regiunal, da la persistenza e dal svilup da strategias. Sco expert cumprovà lavura el per differentas interpresas, dentant er per differents posts federals e per organisaziuns senza finamira da profit ed ha ina vasta rait internaziunala da contacts. Ultra da quai ha el in bun dun da contractar, da colliar, da motivar, da provocar e da communitgar.

Il cussegl turistic sto disponer ultra da quai d'ina cumpetenza en ils secturs manaschament dal lieu e da las destinaziuns, svilup da las destinaziuns, organisaziun da viadis, da congress e da furmaziun supplementara, martgads e pievels esters, concepziun e commerzialisaziun da las purschidas, logistica e sistems da transport sco er d'enconuschientschas dal Grischun, dal turissem grischun e da l'economia grischuna. Questas cumpetenzas vegnan furnidas da las suandantas persunalitads: 

• Martin Candrian, Candrian Catering SA, Turitg
• Jeannine Pilloud, direcziun dal concern da las VFF, manadra dal traffic da persunas, Berna
• Jürg Schmid, CEO Svizra turissem, Turitg
• Alois Zwinggi, managing director dal forum economic mundial, Cologny (Genevra)

D'uffizi èn participads al cussegl turistic il schef dal departament d'economia publica e fatgs socials sco er il president da Grischun vacanzas. Questa cumposiziun duai vegnir cumplettada cun nominaziuns sistematicas tras la regenza, cunzunt dals secturs da cumpetenza organisaziun da viadis, marketing e tecnologia d'infurmaziun.

Il cussegl turistic sa raduna per regla quatter giadas per onn. El infurmescha regularmain davart sias activitads. La commembra ed ils commembers èn vegnids elegids per ina perioda d'uffizi da quatter onns. La reelecziun è pussaivla in'unica giada. 

Cussegl turistic dal Grischun (perioda electorala dal 1. da schaner 2014 fin ils 31 da december 2017)

• prof. dr. Ernst A. Brugger (president) (fotografia agiuntada)
• Martin Candrian
• Marcel Friberg
• Jeannine Pilloud
• Jürg Schmid
• Hansjörg Trachsel
• Alois Zwinggi

Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
- prof. dr. Ernst A. Brugger, president dal cussegl turistic dal Grischun, tel. 044 299 95 95, e-mail: Ernst.Brugger@bruggerconsulting.ch  
 

Gremi: regenza
Funtauna: rg chanzlia chantunala dal Grischun