La regenza grischuna ha prendì posiziun davart il sboz da la confederaziun per il futur concept da staziunament da l'armada. Tut en tut vegn beneventà il sboz, perquai ch'el tegna quint dals giavischs e dals basegns dal chantun.

Il sboz per il futur concept da staziunament da l'armada, ch'il departament federal da defensiun, protecziun da la populaziun e sport (DDPS) ha tramess en consultaziun la fin da november 2013, prevesa da terminar l'utilisaziun da differentas plazzas da tir situadas en il chantun, las qualas il militar n'ha betg u strusch pli duvrà ils ultims onns. Medemamain duai vegnir desistì en l'avegnir dal champ da truppas a Breil. Percunter duai il militar duvrar er vinavant las plazzas d'armas a Cuira, al Luziensteig, a Valragn ed a S-chanf. En sia posiziun per mauns dal DDPS ha la regenza menziunà ch'il sboz per il futur concept da staziunament da l'armada tegnia quint dals interess dal chantun Grischun e da las vischnancas da staziunament, er sch'i saja da deplorar ch'il champ da truppas a Breil vegnia serrà.

Fixond ils lieus duvrads en l'avegnir n'ha il DDPS betg mo tegnì quint dal fatg ch'il chantun Grischun è in partenari fidà da l'armada e ch'el dispona da lieus spezialmain adattads per las acziuns da l'armada, mabain ha er resguardà cun dretg ch'il chantun Grischun è stà pertutgà ils ultims 20 onns surproporziunalmain da mesiras da reducziun da l'armada, e quai tras ina stritgada da circa 140 plazzas tar l'armada sco er tras mesiras da sminuziun dal concept da staziunament 2005, en spezial tras la schliaziun da l'arsenal federal e tras la serrada dals lavuratoris da mantegniment a Cuira. Tras quai che las plazzas d'armas en il chantun vegnan duvradas er vinavant, na vegnan betg mo segiradas las 150 plazzas da lavur restantas da l'armada en il chantun Grischun, mabain vegn er rinforzada en general l'economia publica en las regiuns respectivas grazia a las investiziuns essenzialas ed a las expensas periodicas. En quest connex stoi vegnir menziunà ch'il departament responsabel ha contactà las vischnancas da staziunament e ch'er quellas sustegnan il futur concept da staziunament sco ch'el è vegnì preschentà. En sia posiziun ha la regenza exprimì il giavisch da la citad da Cuira e dal chantun ch'i dettia, avant il cumenzament da la fasa da planisaziun per sanar la caserna a Cuira, ina discussiun cun represchentants dad armasuisse e da l'armada. Quai duai garantir in proceder coordinà tranter tut las persunas involvidas. 

Il commando da la brigada mecanisada 11 è en l'avegnir a Cuira
Tras la schliaziun da la brigada d'infantaria da muntogna 12, ch'è previsa en il rom da l'ulteriur svilup da l'armada, vegn er schlià ses commando a Cuira. La regenza deplorescha ch'il DDPS ha decidì da schliar la brigada d'infantaria da muntogna 12 ed uschia er ch'il commando a Cuira va a perder. Tras quai ch'igl è previs da transferir il commando da la brigada mecanisada 11 a Cuira, vegni tegnì quint dal giavisch da la regenza e d'ina gronda part da la populaziun dal chantun da domiciliar er vinavant il commando d'ina gronda furmaziun a Cuira ed uschia en il chantun. A Cuira fissi nunchapibel, sch'ins stuess acceptar la canera da tir, senza ch'ins avess dentant er in commando correspundent. Il staziunament dal commando da la brigada mecanisada 11 ha er – tant ord vista militara sco er civila – avantatgs considerabels en connex cun la realisaziun dal Forum economic mundial (WEF).
Sco quai che la regenza explitgescha en sia posiziun, duai Cuira en mintga cas vegnir mantegnì er en l'avegnir sco lieu da staziunament per l'armada, e quai sco plazza d'armas, ma er sco lieu da commando. En quest connex stoppia er vegnir resguardà il fatg ch'il dumber d'indrizs d'infrastructura, da commandos e da plazzas d'armas saja en il chantun Grischun sut la media cumpareglià cun auters chantuns cun ina topografia militara cumparegliabla. 
 

Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad dal Grischun, tel. 081 257 25 01, e-mail christian.rathgeb@djsg.gr.ch  
 

Gremi: regenza
Funtauna: rg chanzlia chantunala dal Grischun