La regenza grischuna ha approvà il med d'instrucziun da rumantsch grischun per il terz stgalim superiur ed è sa fatschentada cun la promoziun da la vendita d'animals da niz. Plinavant ha la regenza approvà differents projects da vias. 
 
Promover vinavant la vendita da muvel
Il chantun promova la vendita d'animals da niz cun sustegnair activitads da reclama sco er mesiras per distgargiar las fieras da muvel. La realisaziun da questas mesiras po vegnir surdada ad in'organisaziun agricula. En il Grischun procura la graubündenVIEH SA per ina vendita optimala dal muvel. Sco indemnisaziun pauschala survegn ella per quai 106 000 francs per l'onn current. Per l'organisaziun dals martgads publics da muvel da maz vegn pajada ina contribuziun da basa da 140 000 francs. Vitiers vegnan contribuziuns per chau per arments, per nursas e per chauras. Ultra da quai vegn il martgà da nursas e da chauras promovì er quest onn cun ina contribuziun da 6 francs per animal commerzialisà. Tar stimads 20 000 animals resulta da quai ina contribuziun totala da 120 000 francs per onn. Per nursas che vegnan vendidas e transportadas davent en las vals dal sid vegn pajada ina contribuziun da transport da 4 francs per animal.
La politica agrara federala 2014 – 2017 ch'è entrada en vigur il 1. da schaner 2014 e che cuntegna il nov sistem da pajament direct surlascha la tratga d'animals cumplettamain a las reglas dal martgà liber, perquai ch'ils pajaments directs che sa refereschan a l'animal crodan davent. En quest senn conceda il chantun ina contribuziun da 90 000 francs a l'amortisaziun dal center da commerzialisaziun da muvel a Cazas. Uschia duain vegnir realisadas cundiziuns generalas favuraivlas per la commerzialisaziun da muvel en il Grischun. 
 
Il med d'instrucziun da rumantsch grischun per il terz stgalim superiur è vegnì permess
A partir da l'onn da scola 2015/16 vegn a star a disposiziun il med d'instrucziun da lingua en rumantsch grischun per il terz stgalim superiur. La regenza ha approvà l'elavuraziun dal med d'instrucziun da lingua "Siador" per il terz stgalim superiur. Ils custs dal project importan maximalmain 422 500 francs. Il med d'instrucziun da lingua consista d'in cudesch da lectura e da lavur, da quatter carnets da lavur, da quatter commentaris per las persunas d'instrucziun, dad in fin dus discs cumpacts sco er da materialias supplementaras sin basa da l'internet. Il med d'instrucziun per l'emprim stgalim superiur ("Vi e nà") vegn gia duvrà en las scolas. Il med d'instrucziun per il segund stgalim superiur ("Qua e là") vegn anc elavurà. 
 

Da vischnancas e da regiuns 

• Avras: La lescha da construcziun, concludida da la vischnanca dad Avras ils 24 d'october 2013, vegn approvada. En il rom da la revisiun parziala da la planisaziun locala ha la vischnanca dad Avras revedì sia lescha da construcziun, coordinond quella cun la legislaziun chantunala davart la planisaziun dal territori (LPTGR ed OPTGR). La cunvegna interchantunala davart l'armonisaziun da la terminologia da construcziun (CIAC) è medemamain vegnida resguardada. Uschia dispona la vischnanca d'ina lescha da construcziun moderna.
• Churwalden: La revisiun parziala da la constituziun, concludida da la vischnanca da Churwalden ils 13 da settember 2013, vegn approvada. Il motiv da la revisiun è stada in'excorporaziun da l'ovra electrica da la vischnanca en in institut autonom da dretg public (Rabiosa Energie). Perquai ha la constituziun stuì vegnir adattada.
• Malögia: La fusiun dals circuls da register funsil da l'Engiadin'ota e da la Bregaglia al circul da register funsil Malögia cun sedia a San Murezzan vegn approvada retroactivamain per il 1. da schaner 2014. 

Projects da vias
Plinavant ha la regenza approvà ils suandants projects da vias:
- via dal Lucmagn: Il project per sanar la via dal Lucmagn, traject Caschlatsch – Plaun da Fravia, vegn approvà cun in pèr cundiziuns e permissiuns spezialas. La via dal Lucmagn ha la funcziun d'ina via principala che maina da la Surselva tras la Val Medel fin al cunfin cun il Tessin. Il traject Caschlatsch – Plaun da Fravia da la via dal Lucmagn cun diversas construcziuns artifizialas è en in nausch stadi architectonic. Il traject che sto vegnir sanà ha ina lunghezza da ca. 900 meters. Il trassà existent da la via vegn mantegnì. I n'è betg previs d'engrondir la via.
- via sursilvana: Il project per curreger la via sursilvana, allontanament da las galarias da l'Alpsu, vegn approvà cun in pèr cundiziuns e permissiuns spezialas. La via sursilvana è ina part integrala da l'axa ost/vest da la rait federala da vias principalas e furma l'avertura da basa per la Surselva. Las galarias Alpsu Pardé 1 e 2 tranter Tschamut e l'Alpsu èn en in nausch stadi architectonic e stuessan vegnir renovadas. Suenter differents scleriments èsi vegnì decidì – resguardond il privel da crudada da grippa e da lavinas, cun il qual i sto vegnir fatg quint – d'allontanar las galarias Pardé 1 e 2 che stuessan vegnir sanadas. 


Gremi: regenza
Funtauna: rg chanzlia chantunala dal Grischun