La regenza grischuna ha deliberà la missiva tar ina revisiun totala da la lescha davart la relaziun da lavur da las collavuraturas e dals collavuraturs dal chantun Grischun per mauns dal cussegl grond. Sco enfin ussa vala la lescha per tut las collavuraturas e tut ils collavuraturs da l'administraziun chantunala, da las dretgiras sco er dals instituts chantunals autonoms da dretg public. Exceptadas da quai èn unicamain las relaziuns da lavur tar la banca chantunala grischuna.

La lescha dal persunal è vegnida suttamessa ad ina revisiun totala en dus reguards: Materialmain vegnan integradas da nov en la lescha cundiziuns d'engaschament e da lavur modernas per singuls secturs. Formalmain vegn repassada la sistematica da la lescha: Las disposiziuns reglan ils princips da la relaziun da lavur; ils dretgs e las obligaziuns vegnan concretisads pli fitg sin il stgalim da l'ordinaziun. Tras la revisiun totala duai il chantun sco patrun survegnir las libertads necessarias d'agir e da decider, per restar flexibel e per pudair reagir a temp sin midadas sin il martgà da lavur. 

Midadas materialas
Las collavuraturas ed ils collavuraturs pon profitar d'intginas meglieraziuns. Il dretg minimal da vacanzas vegn auzà da 20 a da nov 23 dis. Il congedi da gravidanza vegn abolì. Percunter vegn il congedi da maternitad extendì per 2 emnas a 16 emnas, ed il salari vegn pajà vinavant a 100 pertschient. Da nov vegn il congedi da paternitad fixà explicitamain en la lescha, ed en l'ordinaziun duai el vegnir extendì da 3 a 5 dis.

Ademplind il program da la regenza 2013-2016 vegnan abolids ils automatissems en il sectur dal svilup dals salaris. Decisivs per la dumonda, sche la summa dals salaris duai vegnir auzada per svilups dals salaris, n'èn betg mo la situaziun finanziala ed economica e las relaziuns sin il martgà da lavur, mabain er las finamiras da la politica da persunal ed il svilup dals salaris en autras administraziuns publicas ed en l'economia privata.

En vista al svilup demografic ed a la finanziaziun da la prevenziun per la vegliadetgna duain las collavuraturas ed ils collavuraturs pudair vegnir occupads vinavant pli ditg che fin a la vegliadetgna ordinaria da pensiun da 65 onns, numnadamain fin a la nova vegliadetgna maximala da 67 onns. In pensiunament flexibel a partir da 60 onns resta pussaivel. Ina nova disposiziun cuntegna ils princips dal svilup dal persunal. Il chantun promova e sustegna las collavuraturas ed ils collavuraturs en lur carriera professiunala.

La regulaziun davart l'execuziun d'occupaziuns accessoricas vegn cumplettada cun in'obligaziun d'annunzia. Reglads da nov vegnan la consegna d'eventualas entradas accessoricas sco er il diever da temp da lavur. Plinavant vegn extendida l'incumpatibilitad d'in engaschament tar il chantun cun in mandat en il cussegl grond: Ina collavuratura u in collavuratur dal chantun na duai en l'avegnir betg pli pudair far part a medem temp dal cussegl grond.

Resguardond las prescripziuns davart la protecziun da datas vegnan creadas las basas legalas per manar sistems electronics d'infurmaziun dal persunal resp. per administrar las datas en moda electronica.

La finala vegn la protecziun giuridica en cas da dispitas dal dretg da persunal concepida confurm a la constituziun e francada sin il stgalim da la lescha, resguardond la garanzia da la via giudiziala ch'è fixada en la constituziun federala.

Il cussegl grond vegn a tractar questa fatschenta en la sessiun d'avrigl 2014. La revisiun da la lescha duai entrar en vigur il 1. da schaner 2015. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas (DFV), tel. 081 257 32 01, e-mail: barbara.janom@dfg.gr.ch  
 

Gremi: regenza
Funtauna: rg chanzlia chantunala dal Grischun