La cumissiun deliberescha la missiva da la regenza davart la legislaziun executiva tar la refurma dal territori per mauns da la sessiun d'avrigl 2014 dal cussegl grond.

La cumissiun per politica da stadi e strategia dal cussegl grond ha predeliberà la missiva da la regenza davart la legislaziun executiva tar la refurma dal territori en preschientscha da la cussegliera guvernativa Barbara Janom Steiner, sco scheffa dal departament da finanzas e vischnancas, ed en preschientscha da represchentantas e represchentants da l'administraziun. La cumissiun ha salvà pliras sesidas. Il cussegl grond vegn a tractar il project en la sessiun d'avrigl 2014.

Cun quest project vegn concretisada la revisiun parziala da la constituziun chantunala ch'è vegnida acceptada cleramain dal pievel grischun ils 23 da settember 2012. Uschia èn vegnids realisads ils puncts centrals da las intenziuns strategicas dal cussegl grond areguard il plaun d'amez (corporaziuns regiunalas, districts, circuls), en spezial la fusiun territoriala da las 14 corporaziuns regiunalas e dals 11 districts ad 11 regiuns.

Tenor il project èn las regiuns concepidas sco corporaziuns da dretg public e duain servir – a partir da l'onn 2015 – ad ademplir incumbensas administrativas e quasi-giudizialas da las vischnancas e dal chantun. Ils circuls vegnan abolids sco corporaziuns dal dretg public, servan dentant vinavant sco secziuns electoralas per nominar il cussegl grond. La refurma dal territori areguard ils districts/las dretgiras districtualas vegn realisada en in project separà.

La legislaziun executiva qua avant maun cuntegna l'attribuziun da las vischnancas a las 11 regiuns, la concepziun organisatorica da las regiuns sco er numerusas adattaziuns formalas en consequenza da l'aboliziun dals circuls e da las corporaziuns regiunalas.

La cumissiun predeliberanta ha concludì unanimamain d'acceptar il project. En la tractativa detagliada ha la cumissiun acceptà da princip las propostas da la regenza. L'organisaziun satiglia da las regiuns che vegn proponida da la regenza ha chattà per gronda part il consentiment da la cumissiun. Er la cumissiun è da l'avis che l'organisaziun da las regiuns duai restar concisa, senza atgna suveranitad legislativa e fiscala. Medemamain duai vegnir desistì da parlaments regiunals. Las regiuns duain stgaffir in plaun executiv per las incumbensas che las vegnan surdadas dal chantun u da las vischnancas. La finala ha il concept da las regiuns – tenor l'avis da la cumissiun – er la finamira da rinforzar las vischnancas.

Propostas divergentas da la missiva hai dà concernent l'organ "cumissiun regiunala". Entant ch'ina maioritad da la cumissiun beneventa la proposta da la regenza, tenor la quala la cumissiun regiunala po vegnir elegida unicamain or dal ravugl da la conferenza da las presidentas e dals presidents, è ina minoritad da la cumissiun da l'avis ch'il circul da las persunas elegiblas per la cumissiun regiunala duaja vegnir extendì. Unanimitad regia en la cumissiun pertutgant il fatg ch'i duai vegnir desistì da la cumissiun regiunala là, nua che las relaziuns giustifitgeschan quai. La cumissiun vuless introducir da nov la decisiun da tagl tras la presidenta u il president en las elecziuns ed en las votaziuns che han lieu en la cumissiun regiunala. La cumissiun propona midadas er en connex cun la cumposiziun persunala da la cumissiun da gestiun ed en connex cun la publicaziun dal rapport d'examinaziun en las vischnancas da las regiuns. Il cunfin per far valair ils dretgs politics ha la cumissiun reducì en cumparegliaziun cun la missiva d'in quart ad in dieschavel da las votantas e dals votants. Menziunar ston ins la finala il fatg che – en il rom da la revisiun parziala da la lescha davart las lottarias – duai la vischnanca e betg la regiun vegnir fixada sco autoritad da permissiun tenor l'avis da la cumissiun. Dal rest è la cumissiun ida d'accord cun las propostas da la regenza. 


Infurmaziuns:
Bruno W. Claus, president da la cumissiun per politica da stadi e strategia, tel. 081 300 33 70


Gremi: cumissiun per politica da stadi e strategia
Funtauna: rg chanzlia chantunala dal Grischun