Interreg, l'iniziativa cuminaivla per promover la collavuraziun transcunfinala, stat avant la midada en ina nova perioda da promoziun. Vi da las preparativas per il nov program "Interreg V" vegni lavurà cun tutta forza. Il chantun Grischun na sa participescha betg mo al program d'interreg "Italia-Svizra", mabain er al program d'interreg "Rain alpin-Lai da Constanza-Rain aut". Il program operaziunal da tal per la perioda 2014–2020 è en consultaziun per tut las persunas interessadas fin ils 15 da matg 2014 sin www.interreg.org.
 
Interreg è in program che ha l'intent da sustegnair la collavuraziun transcunfinala. El promova per exempel acziuns cuminaivlas d'interpresas, la collavuraziun d'interpresas da provediment publicas u cooperaziuns en il sectur da la protecziun da l'ambient, da la furmaziun, da la planisaziun dal territori u da la cultura. La Svizra sa participescha als programs en il rom da la nova politica regiunala da la confederaziun (NPR). 

Il chantun Grischun na sa participescha betg mo al program d'interreg "Italia-Svizra", mabain er al program d'interreg "Rain alpin-Lai da Constanza-Rain aut". Cunquai che la perioda da program 2007–2013 (interreg IV) va a fin, vegn actualmain elavurà il program per la nova perioda da promoziun 2014–2020 (interreg V) en accordanza cun tut las parts participadas, numnadamain ils chantuns Turitg, Glaruna, Schaffusa, Appenzell Dador, Appenzell Dadens, Son Gagl, Grischun, Argovia e Turgovia, ils pajais federativs tudestgs Baden-Württemberg e Baviera, il pajais federativ austriac Vorarlberg ed il Principadi da Liechtenstein.

Il sboz dal program operaziunal è ussa avant maun. Medemamain è vegnì elavurà in rapport davart l'ambient, en il qual èn vegnidas retschertgadas las consequenzas ecologicas dal program. Ils dus documents pon vegnir consultads sin la pagina d'internet dal program d'interreg "Rain alpin-Lai da Constanza-Rain aut" (www.interreg.org, rubrica "Aktuelles"). Là stat er a disposiziun in formular da resposta. Tut tgi ch'è interessà, è numnadamain envidà da prender part a la consultaziun fin ils 15 da matg 2014. 
 

Infurmaziuns:
Ulrich Rechsteiner, uffizi per economia e turissem, svilup regiunal / interreg, tel. 081 257 23 71, e-mail: ulrich.rechsteiner@awt.gr.ch  
 

Gremi: uffizi per economia e turissem dal Grischun
Funtauna: rg uffizi per economia e turissem dal Grischun