Er questa primavaira s'engaschan bleras chatschadras e blers chatschaders ensemen cun ils guardiaselvaschina da preservar ils ansiels-chavriel da vegnir mazzads da las maschinas da segar. La cumissiun per la protecziun da la selvaschina da l'uniun grischuna da chatschadras e da chatschaders da patenta (UGCP) e l'uffizi da chatscha e pestga dal Grischun vegnan sustegnids en lur stentas er da l'uniun purila grischuna.

Tut tenor il stgalim d'autezza da las Alps fan las chavrolas lur chavrielins tranter il cumenzament da matg e la fin da zercladur. En quest connex prefereschan ellas ils uschenumnads prads grass, perquai che quels porschan ina buna protecziun ed in bun camuflagi cunter ils inimis natirals. Ma durant questa perioda vegnan las surfatschas menziunadas er segadas per far silascha u fain. Da quai resulta in conflict d'utilisaziun da questas surfatschas tranter l'animal e l'uman, tar il qual ils chavrielins èn ils perdiders potenzials gia durant lur emprima fasa da vita.

Mesiras salvantas
Per mitigiar quest conflict e per minimar las perditas d'ansiels-chavriel uschè bain sco pussaivel ha la cumissiun chantunala per la protecziun da la selvaschina elavurà en collavuraziun cun l'uffizi da chatscha e pestga e cun ils guardiaselvaschina in concept da mesiras e d'acziun per las organisaziuns da protecziun localas sco er in fegl d'infurmaziun (info!) per ils purs. Il info! vegn d'ina vart consegnà a las organisaziuns da protecziun localas e da l'autra vart a tut ils purs sco agiunta da la revista "Bündner Bauer". Ultra da quai ha la cumissiun chantunala per la protecziun da la selvaschina concepì ina preschentaziun da powerpoint davart questa tematica, ch'ella ha consegnà a tut las secziuns da protecziun. Quella vegn mussada a bleras radunanzas da primavaira da la UGCP per sensibilisar ils commembers per questa problematica e per intimar els da collavurar activamain.

Cuntanscher ensemen la finamira
L'idea da questa acziun vegn purtada da las organisaziuns chantunalas da protecziun, da l'uffizi da chatscha e pestga sco er da l'uniun purila grischuna. Las secziuns da protecziun localas èn vegnidas instruidas da la cumissiun chantunala per la protecziun da la selvaschina da s'organisar concernent il persunal sco er concernent il material per questas acziuns che servan a proteger ils chavrielins e da publitgar en ina furma adattada almain in'adressa da contact per ils purs al lieu. Per cuntanscher las finamiras fixadas èn er appellads ils purs da sa participar a questa acziun e da surpigliar activamain lur part da la responsabladad cun realisar mesiras efficazias. 


Agiunta:
fegl d'infurmaziun (info!) 


Infurmaziuns:
- Hansruedi Andreoli, president da la cumissiun chantunala per la protecziun da la selvaschina, tel. 081 651 37 23, e-mail hansruedi.andreoli@bluewin.ch  
- Hannes Jenny, biolog da selvaschina, uffizi da chatscha e pestga dal Grischun, tel. 081 257 38 93, e-mail hannes.jenny@ajf.gr.ch  


Gremi: uffizi da chatscha e pestga
Funtauna: rg uffizi da chatscha e pestga