La cumissiun per furmaziun e cultura dal cussegl grond ha predeliberà las missivas da la regenza tar la lescha davart la promoziun dal sport e dal moviment (lescha da promoziun dal sport) e tar la cunvegna interchantunala davart il sectur da las scolas autas svizras (concordat da scola auta) e propona al cussegl grond d'acceptar tuts dus projects.

En sias ultimas duas sesidas ha la cumissiun per furmaziun e cultura dal cussegl grond – sut la direcziun da la presidenta da la cumissiun Sandra Locher Benguerel ed en preschientscha da cusseglier guvernativ Martin Jäger – tractà e deliberà per mauns dal cussegl grond las missivas da la regenza tar il relasch d'ina lescha davart la promoziun dal sport e dal moviment (lescha da promoziun dal sport) e tar la cunvegna interchantunala davart il sectur da las scolas autas svizras (concordat da scola auta). 

La lescha per promover il sport vegn da princip acceptada
La basa existenta concernent la promoziun dal sport en il chantun Grischun è francada sin il stgalim d'ina ordinaziun e datescha da l'onn 1974. Cun la nova lescha da promoziun dal sport duai pia vegnir stgaffida per l'emprima giada ina basa legala per il sport. En quest connex sa basa la nova lescha sin l'artitgel 91 da la constituziun chantunala, tenor il qual il chantun e las vischnancas sustegnan il sport. Ultra da quai è entrada en vigur l'onn 2012 la nova lescha federala per promover il sport. Cun la nova lescha chantunala duai vegnir stgaffida ina lescha generala per la promoziun dal sport che serva sco fundament per ils ulteriurs svilups dal sport. Sin basa da questa lescha vegn elavurà en in proxim pass – entaifer in onn suenter l'entrada en vigur da la lescha – in concept per promover il sport.
La cumissiun è arrivada a la conclusiun che la promoziun dal sport dovria ozendi ina basa legala pervia da la constituziun e pervia da l'impurtanza da la promoziun dal sport e dal moviment per il chantun Grischun. Perquai è ella er entrada unanimamain sin il project.

En reguard a la materia n'è il sboz da la lescha betg vegnì confruntà cun in'opposiziun fundamentala. Il relasch concis cun las basas centralas da la promoziun dal sport dal chantun vegn beneventà explicitamain. Ma la cumissiun dat particularmain gronda paisa al fatg che la promoziun dal sport cuntegnia er la pretensiun che la scolaziun en scola ed en la professiun sto esser cumpatibla sin tut ils stgalims cun il sport da prestaziun da la generaziun giuvna. Perquai propona ella da cumplettar la lescha correspundentamain. Ultra da quai vuless ina minoritad da la cumissiun che l'artitgel davart l'intent cuntegnia er la promoziun dal sport en tut las stresas da la populaziun e ch'il concept per promover il sport e sia controlla dals effects vegnian fatgs enconuschents al cussegl grond. La finala duai – tenor ina proposta da minoritad – vegnir deditgà en la nova lescha er in artitgel al sport da scola obligatoric. 

Il concordat da scola auta è incontestà
Sco segunda fatschenta ha la cumissiun predeliberà il concordat da scola auta. Ella è arrivada unanimamain a la conclusiun d'entrar sin la missiva e da proponer al cussegl grond da consentir a la participaziun. L'intent dal concordat da scola auta è quel da reglar la collavuraziun dals chantuns da cunvegna tranter els e cun la confederaziun en connex cun la coordinaziun en il sectur da las scolas autas svizras.

Il cussegl grond vegn a tractar quests dus projects en la sessiun da zercladur 2014. 
 

Infurmaziuns:
presidenta da la cumissiun Sandra Locher Benguerel, tel. 079 658 13 53 


Gremi: cumissiun per furmaziun e cultura
Funtauna: rg cumissiun per furmaziun e cultura