Il departament da giustia, segirezza e sanadad ha dà per l'emprima giada l'incumbensa d'analisar detagliadamain l'enquista svizra davart la sanadad che vegn organisada periodicamain. Ussa èn avant maun ils resultats da questa analisa.

Ils resultats da l'evaluaziun detagliada da l'enquista svizra davart la sanadad da l'onn 2012 per il chantun Grischun èn fitg positivs en plirs secturs. Passa 86 pertschient da las Grischunas e dals Grischuns caracteriseschan lur stadi da sanadad sco bun respectivamain fitg bun. Il dumber da persunas che han ina grevezza psichica media fin ferma è significantamain pli bass che la media svizra. Ultra da quai mussa l'analisa che la populaziun dal Grischun è pronta da contribuir sia part per mantegnair la sanadad: Tant la part da las dunnas corporalmain activas sco er la part dals umens corporalmain activs è s'augmentada ils ultims 5 onns. L'onn 2012 eran 76,7 pertschient da la populaziun totala corporalmain activs en il chantun Grischun, quai ch'è sur la media svizra da 72,5 pertschient. Sco corporalmain activa vala ina persuna cun in'activitad corporala moderada d'almain 150 minutas per emna u cun in'activitad corporala intensiva duas giadas l'emna. Da remartgar positivamain èsi che la part da las persunas ch'èn exponidas durant in quart dal temp da lavur u pli ditg al fim da tubac d'autras persunas è sa reducì considerablamain. L'onn 2007 eran quai anc 13,5 pertschient, l'onn 2012 è questa part sa reducida per in terz a 9,2 pertschient. 

Main consultaziuns da prevenziun
Il rapport da sanadad mussa nua ch'i dat deficits. Uschia fai surstar che la part da las persunas che han laschà mesirar lur pressiun dal sang durant ils 12 mais avant l'enquista è sa reducida dad 80,5 pertschient l'onn 2002 a 73,1 pertschient l'onn 2012. Medemamain è la part da las persunas cun ina controlla da la valur da colesterin sa reducida durant ils ultims 12 mais avant l'enquista da 52,4 pertschient l'onn 2002 a 43,1 pertschient l'onn 2012. Da pensar dat er che la part da las persunas cun surpais è s'augmentada significantamain ils ultims 20 onns tant en Svizra sco er en il chantun Grischun.
Ils posts cumpetents dal chantun èn ussa dumandads d'eliminar u d'almain reducir ils deficits constatads cun ils programs existents, ma er cun novs programs en il sectur da la promoziun da la sanadad e da la prevenziun, e da spargnar uschia directamain custs da sanadad.
Il "Rapport da sanadad dal chantun Grischun" po vegnir consultà u chargià giu sin la pagina d'internet da l'uffizi da sanadad (www.gesundheitsamt.gr.ch). 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
 

Gremi: departament da giustia, segirezza e sanadad
Funtauna: rg departament da giustia, segirezza e sanadad