Davart il program da turissem dal Grischun 2014–2021 è cumparida ina broschura d'infurmaziun cumplessiva. En quella vegn descrit detagliadamain il program da promoziun e vegnan preschentads ils criteris per promover projects. Per realisar il program pon vegnir inoltradas a partir d'immediat dumondas da contribuziun per ideas da project innovativas. Il program d'innovaziun è dotà cun tut en tut 21 milliuns francs.

Ad in'occurrenza d'infurmaziun dad oz a Cuira ha l'uffizi per economia e turissem preschentà en detagl il nov "program da cooperaziun en il turissem grischun 2014–2021". Ultra dals cuntegns dal program èn er vegnids preschentads per l'emprima giada ils criteris per promover projects. Ils criteris èn vegnids fixads sapientivamain sin in aut nivel. Cun ideas da project innovativas duai vegnir fatg frunt cun success a las sfidas en il turissem grischun. La finamira dal program è quella da porscher in'aventura unica al giast. Per quest intent stoppia il turissem drizzar sias stentas anc pli fitg tenor ils basegns dals differents giasts, sco ch'il cusseglier guvernativ Hansjörg Trachsel ha ditg a l'occurrenza. 

Innovaziun ed iniziativa tenor princips d'interpresa
Las pretensiuns envers ils products ed envers ils servetschs s'augmentan. Per pudair sa far valair envers la concurrenza internaziunala èsi necessari da manifestar dapli cumpetitivitad e dapli innovaziun. Novas cooperaziuns pon promover quai. I nascha in barat da savida, e novas ideas sviluppan gronds projects. Il program da promoziun ha ina clera finamira: En cumparegliaziun cun autras destinaziuns en il territori alpin duai il turissem grischun vegnir rinforzà sin il nivel d'ina cumpetitivitad internaziunala. En emprima lingia sa tracti dals facturs decisivs sco concepziun da las purschidas, innovaziun, collavuraziun, savida, sinergias e cooperaziuns che cumpiglian pliras destinaziuns. La refurma da las structuras d'enfin ussa en las destinaziuns turisticas furma la basa per quai. 

La directiva da promoziun mussa la direcziun
En il rom dal program dad 8 onns pon vegnir promovids projects che han in grad d'innovaziun uschè aut sco pussaivel e che fan effect en il Grischun. Il project duai gidar a rinforzar il sistem general dal turissem grischun e duai esser accordà – tras sia orientaziun strategica – cun la destinaziun turistica. Ils criteris da promoziun èn:
• Il project realisescha ina idea novissima, q.v.d. i na dat anc nagut cumparegliabel en il Grischun.
• Il project gida ad augmentar la creaziun da valurs ed a meglierar la posiziun en la concurrenza.
• Il project rinforza il svilup da cumpetenzas professiunalas.
• Il petent è avert per cooperar cun auters acturs.

Ils acturs en il turissem grischun èn appellads d'inoltrar bunas ideas e projects efficazis per ch'il turissem grischun possia sa sviluppar vinavant en la concurrenza globala.

Il formular da dumonda, la directiva da promoziun sco er la broschura da program pon ins consultar en l'internet sut www.awt.gr.ch > Themen/Projekte > Tourismusprogramm Graubünden 2014–2021. 
 

Infurmaziuns:
- cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, Hansjoerg.Trachsel@dvs.gr.ch  
- Eugen Arpagaus, manader da l'uffizi per economia e turissem, tel. 081 257 23 77, natel 079 256 93 94, Eugen.Arpagaus@awt.gr.ch  
 

Gremi: uffizi per economia e turissem
Funtauna: rg uffizi per economia e turissem