En sia ultima sesida ha la regenza grischuna decidì ch'il referendum cunter la refurma dal territori è reussì. Plinavant ha ella determinà ina nova purschida en il sectur da la pedagogia speziala ed ha dà ina permissiun per introducir la scolaziun da maturitad bilingua tudestg / englais. 

Il referendum cunter la refurma dal territori è reussì
Il referendum dal pievel ed il referendum da las vischnancas cunter il conclus dal cussegl grond concernent il relasch da la lescha davart la refurma dal territori en il chantun Grischun (lescha generala davart la refurma dal territori) dals 23 d'avrigl 2014 èn reussids cun 1874 suttascripziuns valaivlas resp. cun 18 vischnancas sustegnentas. La votaziun dal pievel davart quest project ha lieu ils 30 da november 2014. La chanzlia chantunala ha verifitgà las suttascripziuns inoltradas sin las glistas da suttascripziuns attestadas; resultada è ina pitschna differenza cun las indicaziuns dal comité da referendum. 

Introducziun d'ina scolaziun da maturitad bilingua tudestg / englais
La Scola media svizra alpina Tavau survegn la permissiun da manar ina scolaziun da maturitad bilingua tudestg / englais. La scolaziun bilingua duai cumenzar l'onn 2015/16. Cun il conclus da la regenza dals 9 da fanadur 2013 è vegnida revedida parzialmain l'ordinaziun davart il gimnasi dals 6 da fanadur 1999. En il rom da questa revisiun parziala è vegnida stgaffida la basa per introducir en las scolas medias dal Grischun – sper las scolaziuns da maturitad bilingua en las duas linguas chantunalas – er ina scolaziun da maturitad bilingua cun englais tenor las directivas da la cumissiun svizra da maturitad (CSM). 

Nova purschida da la pedagogia speziala en il sectur pretensius
La regenza ha fixà la planisaziun da la purschida en il sectur pretensius da la pedagogia speziala per ils onns 2014 e 2015. Las mesiras pretensiusas da la pedagogia speziala servan a promover, scolar ed assister cun metodas da la pedagogia speziala uffants da la vegliadetgna prescolara, scolaras e scolars da scolina e dal temp da scola obligatoric sco er giuvenils che han terminà la scola obligatorica fin ch'els han cumplenì il 20avel onn. Las mesiras pretensiusas da la pedagogia speziala van per regla a favur d'uffants, da scolaras e scolars sco er da giuvenils ch'èn dischavantagiads considerablamain en lur capacitad da furmaziun u ch'èn periclitads bainquant en lur svilup, pervia d'in impediment corporal, spiertal, psichic, linguistic, sensoric u da percepziun ubain pervia da grondas difficultads en il cumportament. In criteri decisiv per la scolaziun speziala è il fatg che las scolaras ed ils scolars pertutgads n'èn a media ed a lunga vista betg buns da suandar l'instrucziun en la scola regulara, malgrà las mesiras simplas. 
Ils svilups ils pli novs sin il champ da la scolaziun speziala han mussà ch'i dat singulas scolaras e singuls scolars cun grevas singularitads dal cumportament e cun problems psichics, per ils quals duai vegnir messa a disposiziun – cun la classa da tscherna da professiun Plus (CTP+) – ina nova purschida, e quai per evitar ch'els bandunian anticipadamain il sistem da furmaziun e per sustegnair lur connexiun cun l'emprima scolaziun professiunala. Questa nova purschida che vegn introducida l'onn da scola 2014/15 cuntenta meglier il basegn spezial da promoziun da questas scolaras e da quests scolars. 

Il lai d'accumulaziun da l'Albigna po vegnir svidà per in project da sanaziun
La regenza ha approvà cun cundiziuns in project da l'ovra electrica da la citad da Turitg (ewz) per sanar il mir da fermada Albigna da l'ovra electrica Löbbia. L'implant tutga tar las ovras electricas da la Bregaglia che vegnan manadas da l'ovra electrica da la citad da Turitg. Sanà vegn il scul al funs dal lai sco er las isolaziuns al pe dal mir da fermada Albigna. Per quest intent sto il lai vegnir svidà cumplettamain. La permissiun da svidar il lai vegn concedida. Il lai sto vegnir svidà dal schaner fin la fin da favrer 2015. La svidada sco er la reemplenida ston vegnir fatgas en enclegientscha cun il survegliader da pestga cumpetent e cun l'uffizi chantunal per la natira e l'ambient. Il project na transfurma betg l'implant d'accumulaziun e n'ha er betg consequenzas per il manaschi futur da l'ovra electrica. 

Prendì enconuschientscha da la petiziun "Viva M25"
La regenza prenda enconuschientscha che l'inoltraziun dal WWF Svizra dals 24 da zercladur 2014, designada sco petiziun a favur da l'urs M25, è entrada. Il matg 2014 ha il WWF Svizra lantschà sin sia pagina d'internet in'acziun, designada sco petiziun, cun il titel "Viva M25". Cun questa acziun ha el cumbinà l'appel a la publicitad da dar ina schanza a l'urs M25, cun sustegnair vastamain la via instradada da las autoritads cumpetentas, quai vul dir las stentas da protecziun (protecziun suffizienta da las muntaneras, avieulers segirads e sadellas da rument segiras cunter l'urs). Il text da la petiziun ch'è vegnì inoltrà posteriuramain è vegnì cumplettà cun ina glista da nums voluminusa che na cuntegna dentant naginas suttascripziuns e che na permetta betg d'identifitgar persunas, cun excepziun dal WWF sco speditur.
A la regenza n'èn dentant differents giavischs da la petiziun betg nunenconuschents. Ella n'è er betg cunter la pretensiun da proseguir sin la via instradada, numnadamain da prender mesiras da protecziun a favur da l'urs M25. Ma i vala er da resguardar ils giavischs, las pretensiuns ed ils quitads da la populaziun pertutgada cun sias ideas e cun ses interess socials, economics ed ecologics. La regenza vegn perquai ad examinar ed eventualmain a prender ulteriuras mesiras respectivas er en il cas da l'urs M25 cun quità e cun responsabladad sco er ponderond las schanzas e las ristgas. 

Il dretg d'utilisaziun per l'Expo Milaun 2015 è garantì
La regenza ha deliberà la contribuziun dal chantun Grischun en l'import da 525 000 francs per il "Padiglione Svizzero Expo Milano 2015" a favur dal departament federal d'affars exteriurs (DFAE). Tras quai vegn garantì definitivamain il dretg d'utilisaziun ch'è gia reglà per contract per in agen local d'exposiziun en il Padiglione Svizzero durant l'exposiziun che dura dal matg fin l'october 2015. Il chantun Grischun sa participescha ensemen cun ils chantuns Tessin, Uri e Vallais a l'Expo Milaun 2015. Il contract cun la confederaziun, represchentada tras il DFAE, è vegnì sutsegnà cuminaivlamain gia l'avrigl 2014 a Milaun. 

La regenza grischuna beneventa la revisiun parziala da l'ordinaziun davart radio e televisiun
La regenza grischuna ha prendì posiziun tar la revisiun parziala da l'ordinaziun davart radio e televisiun (ORTV) e tar la midada da la concessiun a la SRG. En il project sa tracti spezialmain da tschentar il rom legal per introducir la televisiun ibrida e per midar da la tecnologia da radio analoga UKW a quella digitala DAB+. La regenza ha ina tenuta positiva envers las midadas proponidas. Ma ella constatescha ch'i sto esser garantì er en il futur che las prestaziuns d'infurmaziun dals organisaturs locals-regiunals concessiunads vegnian furnidas en la medema qualitad sco enfin ussa. Quai sut l'aspect che las prestaziuns d'infurmaziun regiunalas duain vegnir divulgadas da nov en il program principal e betg pli en il format da fanestras da program separadas. 
 

Da vischnancas e da regiuns 

• Alvra: La revisiun parziala dals statuts dal "consorzi da scola per classas pitschnas Alvra / CSCPA" vegn approvada. Il motiv da revisiun è l'adattaziun dals statuts dal CSCPA a las mesiras da la pedagogia speziala ch'èn vegnidas formuladas da nov en la nova lescha chantunala da scola. Il consorzi da scola survegn il nov num "consorzi integraziun Alvra / CIA".
• Arvigo, Braggio, Cauco e Selma: La cunvegna ch'è vegnida concludida ils 11 da fanadur 2014 da las vischnancas dad Arvigo, Braggio, Cauco e Selma per fusiunar las vischnancas per il 1. da schaner 2015 a la nova vischnanca da Calanca vegn approvada. Questa fusiun sto anc vegnir approvada dal cussegl grond.
• Bregaglia: Il project per la correcziun dal curs d'aua da la vischnanca da Bregaglia che concerna il rempar da la Bondasca vegn approvà cun cundiziuns sco er cumplettà cun midadas dal project pervia da decisiuns da protesta. Als custs da circa 7 milliuns francs vegn garantida ina contribuziun chantunala da totalmain maximalmain 2 890 500 francs. Il project da construcziun cuntegna in schlargiament dal flum. I vegn stgaffì in letg supplementar da 50 000 meters cubic. Quest letg serva al deposit da glera e da grava en cas d'auas grondas d'ina dimensiun pli extendida da la Bondasca. El permetta da reducir considerablamain il privel d'aua gronda per il territori d'abitadi da Bondo. Suenter la gronda crudada da grippa al Piz Cengalo la fin da l'onn 2011 han deflussiuns d'aua gronda chaschunà ferms moviments e deposits da glera en la val.
• Jenins: La revisiun parziala da la constituziun communala, concludida da la vischnanca da Jenins ils 18 da zercladur 2014 vegn approvada. Il motiv da revisiun è il nov urden da scola cun las incumbensas supplementaras dal cussegl da scola.
• Lostallo: Il project "amplificaziun da la via da guaud – Alp de Montogn" da la vischnanca da Lostallo vegn approvà. Al project vegn garantida ina contribuziun da maximalmain 2 448 000 francs. L'amplificaziun previsa permetta en l'avegnir d'applitgar metodas da far laina modernas ed effizientas sco er da transportar la laina en moda segira. Ultra da quai vegn meglierà l'access a pliras surfatschas agriculas d'utilisaziun e d'alpegiada.
• Puschlav: A la vischnanca da Puschlav vegn garantida ina contribuziun chantunala da maximalmain 62 370 francs cun resalva d'ina contribuziun federala als custs supplementars da la reparatura dals donns vi da la via champestra Clüs-Campel, traject Vestac da Capitul.
• Ziràn-Reschen: La revisiun parziala da la planisaziun locala, concludida da la vischnanca da Ziràn-Reschen ils 24 da schaner 2014, vegn approvada. La revisiun cumpiglia la revisiun parziala da la lescha da construcziun, il plan da zonas e plan general da furmaziun 1:1000 Reschen, Zarnos sco er il plan general d'avertura 1:1000 Reschen, Zarnos. L'idea fundamentala dal project da planisaziun d'utilisaziun è l'intenziun da la vischnanca da Ziràn-Reschen da concentrar il futur svilup da construcziuns d'abitar sin il vitg principal da Ziràn, nua ch'è localisà il provediment social e material e nua ch'igl exista ina dumonda correspundentamain gronda per zonas d'edifizis d'abitar.
• Zernez: La nova constituziun communala dals 23 da zercladur 2014 da la vischnanca da Zernez, resultada tras la fusiun da las anteriuras vischnancas da Lavin, Susch e Zernez, vegn approvada.

 
Contribuziuns chantunalas a differentas instituziuns 

• Zodiac Pictures: Per realisar il film cinematografic "Heidi" vegn garantida a la firma Zodiac Pictures ina contribuziun da 150 000 francs.

Projects da via
Ultra da quai ha la regenza approvà 3,71 milliuns francs per lavurs da construcziun sin ils suandants trajects:
- H27 via d'Engiadina: reparatura da la cuvrida – traject Brail - Punt Nova
- H28a, via dal Partenz: sanaziun da la cuvrida – traject Seehorn - galaria da Salez
- A28, via naziunala Partenz: producziun da software per automatisar la ventilaziun, l'illuminaziun, il traffic ed ils indrizs accessorics sco il sistem directiv – sviament da Küblis
- via da l'Alvra: lavurs da cuvrida – traject Pass da l'Alvra, Ervedi 


Gremi: regenza
Funtauna: rg chanzlia chantunala dal Grischun