La regenza grischuna ha fixà las contribuziuns per la gulivaziun da la forza fiscala per l'onn 2015. Ultra da quai ha ella tractà fatschentas da las vischnancas e da las regiuns sco er approvà differents projects da vias. 

Stgars 17 milliuns francs per la gulivaziun da la forza fiscala 2015
La regenza ha fixà las contribuziuns per la gulivaziun da la forza fiscala per l'onn 2015. Las contribuziuns per l'onn 2015 importan tut en tut 16,868 milliuns francs. La gulivaziun da la forza fiscala è in med da la gulivaziun da finanzas intercommunala per sustegnair las vischnancas finanzialmain deblas dal chantun. Sche la refurma da la gulivaziun da finanzas grischuna (refurma da la GF) po vegnir realisada per l'onn 2016, èsi stà l'ultima giada che la regenza ha fixà las contribuziuns per la gulivaziun da la forza fiscala. 

Beneventà ina nova lescha federala davart ils gieus per daners
Il sboz per ina nova lescha federala davart ils gieus per daners vegn beneventà da la regenza grischuna. Cun questa lescha vegnan reglads en l'avegnir tut ils gieus per daners en moda cumplessiva en in'unica lescha. La lescha federala nova realisescha l'artitgel constituziunal davart ils gieus per daners che la populaziun ed ils chantuns han acceptà ils 11 da mars 2012.
En sia posiziun considerescha la regenza il sboz sco equilibrà. La lescha tegna quint dals interess per part divergents da persunas pertutgadas e d'instituziuns. La regenza sustegna la posiziun da la conferenza dals directurs chantunals cumpetents per il martgà da lottarias e per la lescha davart las lottarias che resguarda trais puncts da la lescha sco centrals: Il sboz da la lescha cunfinescha cleramain las cumpetenzas da la confederaziun e dals chantuns e stgaffescha novas definiziuns per differents gieus per daners. Ils gudogns da lottaria e da scumessas da sport na vegnan betg pli suttamess a la taglia. E l'access a purschidas da gieus per daners online betg permess vegn bloccà en l'avegnir. 


Da vischnancas e da regiuns 

• Bever: Il project "Siglientada da lavinas Cho d'Valletta" sin il territori communal da Bever vegn approvà. I vegn concedida ina contribuziun da maximalmain 585 000 francs. Per quest intent vegnan installads quatter pitgas per siglientar lavinas.
• Cuira: A la vischnanca burgaisa da Cuira vegn garantida ina contribuziun da maximalmain 37 400 francs per restaurar e per segirar il Obertor da Cuira, e quai en il rom da la tgira da monuments.
• Tavau: Il project dal rempar da l'aual d'Arelen da la vischnanca da Tavau vegn approvà. Al project per meglierar la protecziun cunter aua gronda vegn garantida ina contribuziun chantunala da totalmain maximalmain 550 000 francs. I vegn construì in collectur da gera cun in volumen tranter 4000 e 7000 meters cubic. Il collectur da gera impedescha che l'aual vegnia emplenì cun material da bova en cas d'aua gronda.

Projects da vias
- Correcziun da la via Val Gronda – S. Martin: Il project d'exposiziun per la correcziun da la via da Val S. Pieder, traject Val Gronda – S. Martin, vegn approvà. Tranter Val Gronda e S. Martin è la via per part stretga e nunsurvesaivla. Ultra da quai ha il vial donns. Il project cuntegna ina renovaziun da la surstructura sco er ina meglieraziun da la geometria da la via.
- Construcziun d'ina nova punt sur la Val Rumein, via da la Lumnezia: Il project d'exposiziun per la correcziun da la via da la Lumnezia, construcziun d'ina nova punt sur la Val Rumein vegn approvà. La punt existenta sur la Val Rumein è en in nausch stadi e vegn perquai remplazzada tras ina construcziun nova.
- Basa per il mantegniment da las vias Valchava, via dal Pass dal Fuorn: Il project d'exposiziun per sanar e per engrondir la basa Valchava da l'uffizi da construcziun bassa che serva al mantegniment da la via dal Pass dal Fuorn vegn approvà. 
 

Gremi: regenza
Funtauna: rg chanzlia chantunala dal Grischun