La regenza grischuna ha approvà ina participaziun al nov program d'interreg "Italia-Svizra", 2014 fin 2020. Plinavant ha la regenza fixà las contribuziuns dal chantun per las purschidas da la tgira d'uffants cumplementara a la famiglia per l'onn 2015. 

Il Grischun sa participescha puspè al program d'interreg "Italia-Svizra"
Il chantun Grischun sa participescha er vinavant al program d'interreg "Italia-Svizra". La regenza ha prendì enconuschientscha dal program per la perioda da promoziun V, 2014 fin 2020. Per la collavuraziun tranter la confederaziun ed ils chantuns Tessin, Vallais e Grischun è vegnida fatga ina cunvegna da program che vegn suttascritta la fin da l'onn 2014. La quota dal chantun Grischun per contribuziuns a projects importa 1,68 milliuns francs per la perioda da 7 onns. Temas dal program d'interreg "Italia-Svizra", 2014 fin 2020, èn la cumpetitivitad da las interpresas, l'augment da la valur dal patrimoni cultural e natiral, la mobilitad integrada e duraivla, l'integraziun sociala sco er la collavuraziun administrativa.
Il chantun è dependent da ferms partenadis transcunfinals. Ina impurtanza speziala en il program d'interreg "Italia-Svizra" han las colliaziuns dal Grischun cun il Tirol dal sid, cun la provinza da Sondrio e cun lur territoris cunfinants. 

Fixà il sustegn per las purschidas da la tgira d'uffants cumplementara a la famiglia
La regenza ha fixà ils custs normads e la tariffa da contribuziun dal chantun per las purschidas da la tgira d'uffants cumplementara a la famiglia per l'onn 2015. Ils custs normads importan 9.05 francs per ura da tgira ed uffant. Per purschidas novas importa la tariffa da contribuziun 25 pertschient dals custs normads durant ils emprims 3 onns. Per tut las ulteriuras purschidas èn quai 20 pertschient. Uschia resulta in sustegn finanzial dal chantun da totalmain circa 2,7 milliuns francs per la tgira d'uffants cumplementara a la famiglia per l'onn 2015. Betg cuntegnidas n'èn las contribuziuns dal chantun per las ulteriuras structuras dal di. 

Las restricziuns dal commerzi han er consequenzas per il turissem
En Svizra vala dapi l'onn 2010 l'uschenumnà princip da "Cassis-de-Dijon". Uschia pon tscherts products, che dastgan vegnir vendids legalmain en in stadi commember da l'uniun europeica u dal spazi economic europeic, vegnir vendids senza cundiziuns supplementaras er sin il martgà svizzer. En il sectur da las victualias vala ina regulaziun speziala, tenor la quala i dovra ina permissiun per applitgar il princip da "Cassis-de-Dijon". La cumissiun per economia e taxas dal cussegl naziunal ha tramess en consultaziun il matg passà ina revisiun da la lescha federala davart las barrieras tecnicas per il commerzi. Per il sectur da las victualias vul il sboz returnar al sistem vegl e vul uschia excluder las victualias dal champ d'applicaziun dal princip da "Cassis-de-Dijon". Uschia duai vegnir evità ch'i vegnian sminuidas las autas pretensiuns da qualitad svizras en il sectur da las victualias.
La regenza grischuna renconuscha ils motivs per abolir il princip da "Cassis-de-Dijon" en il sectur da las victualias. En sia posiziun renda ella dentant attent ch'er il turissem saja pertutgà da quest princip. Ord vista da l'economia da turissem n'è quai betg in pass bainvegnì. Tenor l'avis da la regenza èsi perquai impurtant che la confederaziun s'engaschia vinavant per sbassar ils pretschs auts da la Svizra. En spezial duai vegnir armonisà il dretg. 
 

Da vischnancas e da regiuns 

• Castaneda: La revisiun parziala da la planisaziun locala, concludida da la vischnanca da Castaneda ils 12 da matg 2014, vegn approvada. Tras la revisiun parziala vegnan stgaffidas en la planisaziun dal territori las premissas per engrondir la clinica existenta Paracelsus al Ronch.
• Cuira: A la citad da Cuira vegn garantida ina contribuziun chantunala da maximalmain 132 000 francs per construir ina nova via da velos e da peduns.
• Laax, Falera: Ils statuts dal "Consorzi da scoletta e scola primara scolaviva dallas vischnauncas da Laax e Falera" vegnan approvads.
• Laax, Falera, Sagogn, Schluein: Ils statuts dal "Consorzi da scola superiura scolaviva dallas vischnauncas da Laax, Falera, Sagogn e Schluein" vegnan approvads.
• Sedrun: En connex cun la colliaziun dals territoris da skis d'Andermatt e Sedrun vegn la regiun da recreaziun intensiva vertenta Tgombras fixada da nov sco territori per la protecziun da la cuntrada. La regenza ha approvà ina midada correspundenta dal plan directiv chantunal.

Contribuziuns chantunalas a differentas instituziuns 

• Fundaziun "Convivenza": A la fundaziun "Convivenza", Mustér, vegnan concedidas contribuziuns da maximalmain 75 000 francs a projects per ils onns 2014/2015.

Project da vias
- Correcziun da la via Trin Mulin: Il project d'exposiziun per la correcziun da la via sursilvana, traject Trin Mulin, vegn approvà. Tar il traject da Trin Mulin ston vegnir renovads il trassé da la via e la punt sur la Val Turnigla. Ina part integrala considerabla dal project è la construcziun d'in nov access Las Palas cun in vial per sviar a sanestra. Uschia vegn la ristga d'accidents reducida fermamain e l'access al quartier Ruegna vegn meglierà. Il passape da la vart da la val per lung da la via sursilvana vegn a permetter a las abitantas ed als abitants da cuntanscher en moda segira las fermadas existentas da l'auto da posta.

Ultra da quai ha la regenza approvà 1,545 milliuns francs per lavurs da construcziun sin il suandant traject:
- via da Schuders: lavurs d'impressari e da cuvrida, punts a spunda Stütz 1 e 2 
 

Gremi: regenza
Funtauna: rg chanzlia chantunala dal Grischun