Cun l'occurrenza finala tar las trais exposiziuns "Heiner Kielholz", "Leitlinien" e "Giro Annen" ils 31 d'avust 2014 serra il museum d'art dal Grischun sias portas per in temp pli lung. Fin mez da l'onn 2016 vegn sanada la Villa Planta e finì l'edifizi d'engrondiment. Cun ina festa da stad publica vuless il museum d'art dal Grischun dir a la populaziun da Cuira "Grazia fitg ed a revair l'onn 2016".

Dapi il schaner 2014 vegn construì en moda instancabla vi dal museum d'art dal Grischun. La fin d'avust serra er la Villa Planta sias portas. Ella vegn sanada en moda cumplessiva. La reavertura è planisada per il zercladur 2016. Durant il temp da construcziun vegnan las activitads dal museum d'art dal Grischun ad avair lieu en autras instituziuns ospitantas. Cun la festa publica dals 31 d'avust vuless il museum d'art engraziar a la populaziun, a las visitadras ed als visitaders per il sustegn fin ussa e per l'interess cuntinuant.

Ils giasts vegnan beneventads a partir da las 11.00 en l'ustaria da festa e bar. Las collavuraturas ed ils collavuraturs dal museum d'art dal Grischun sco er las commembras ed ils commembers da la suprastanza da l'uniun grischuna d'art èn davos la bar. Visitas guidadas publicas tras tut las trais exposiziuns vegnan accumpagnadas da sequenzas musicalas cun Franco Mettler. Famiglias pon scuvrir la Villa Planta sut l'instrucziun da l'intermediatura d'art ed èn silsuenter envidadas da transfurmar lur scuvertas en moda artistica en la tenda d'atelier. Là sviluppa er la dissegnadra professiunala Frida Bünzli sias istorgias illustradas davant ils egls smirveglius da las visitadras e dals visitaders. Las participantas ed ils participants da l'ultima academia per giuvenils davart la fotografia analoga ed ulteriuras persunas interessadas èn envidadas a las 16.00 da passar cun l'artist Giro Annen tras sia exposiziun. Quest di è l'entrada en il museum libra.

Per la gronda finiziun a las 17.00 fan il cussegl guvernativ Martin Jäger, il president da l'uniun grischuna d'art Dieter Jüngling sco er il directur Stephan Kunz in pled. Ils pleds da cumià temporar vegnan accumpagnads musicalmain da gufo reale. Per il rom culinaric procuran Renato Giovanoli da Malögia ed ils viticulturs grischuns von Salis cun in buffet d'apero varià.

Finissascha e festa da cumià dal museum d'art dal Grischun a Cuira, ils 31 d'avust, a partir da las 11.00. Ulteriuras infurmaziuns: Link.
 

Remartga:
Davart quest tema stat a disposiziun in video sut www.gr.ch.


Infurmaziuns:
- Stephan Kunz, directur, tel. 081 257 28 61, e-mail stephan.kunz@bkm.gr.ch
- Katharina Ammann, conservatura, tel. 081 257 28 62, e-mail katharina.ammann@bkm.gr.ch


Gremi: museum d'art dal Grischun
Funtauna: rg museum d'art dal Grischun