L'engrondiment spezialmain duraivel ed ecologic da la via dal pass dal Güglia ha survegnì il premi d'ensemnada da l'uniun per l'inschigneria biologica e da la gruppa da lavur per l'ensemnada dals auts.

La via ch'è vegnida engrondida durant ils onns 1930 ha stuì vegnir adattada durant ils onns 2009 fin 2012 a las pretensiuns dad oz, e quai areguard la segirezza cunter privels da la natira ed areguard la transiziun per bus e per il traffic pesant. Il project da renovaziun da 3800 meters lunghezza surmunta ina differenza d'autezza da 270 meters cun 13 stortas stretgas. Per part è vegnì adattà il trassé existent e per part èn tscherts trajects vegnids integrads cumplettamain da nov en il territori cun relativamain grondas midadas dal terren. Sch'ins construescha en il territori alpin, signifitga quai per il solit ina intervenziun considerabla en l'ambient ch'è spezialmain sensibel sin questa autezza. Uschia han ins stuì resguardar – ultra dals aspects da la construcziun da vias – spezialmain er ils aspects ecologics. Tut las parts participadas èn perquai vegnidas sensibilisadas per ils interess spezials da l'ambient, e quai cun agid d'in accumpagnament da construcziun cun enconuschientschas dal terren e da l'ecologia. Correspundentamain èn vegnidas applitgadas metodas e proceduras da construcziun duraivlas.

Circa 160 000 meters cubic material han stuì vegnir allontanads, preparads uschenavant sco necessari e puspè integrads al lieu per il trassé da la via e per las mesiras da protecziun cunter lavinas. Las novas scarpas èn vegnidas adattadas consequentamain a la cuntrada e cuvridas cun terren sco er emplantadas cun vegetaziun confurma al lieu. La metoda dal transferiment direct ch'è vegnida applitgada per l'emprima giada ha permess d'utilisar per las novas mantunadas e per las cuvridas dal terren il material e la vegetaziun allontanads, e quai senza far in deposit temporar. Las palids planivas che han stuì vegnir dismessas n'èn per exempel betg vegnidas cumpensadas cun mesiras en auters territoris, mabain novas palids planivas èn vegnidas etablidas cun ils fundatgs da las palids anteriuras. L'aspect natiral dal traject da via construì da nov ed en spezial la distincziun dal project tras l'uniun per l'inschigneria biologica e tras la gruppa da lavur per l'ensemnada dals auts mussan che l'uffizi da construcziun bassa dal Grischun ha realisà in project da via zunt reussì al pass dal Güglia, e quai areguard ils interess da la tecnica da traffic sco er areguard l'ecologia.

La gruppa da lavur per l'ensemnada dals auts da l'uniun per l'inschigneria biologica s'engascha dapi l'onn 1996 per ina renatiralisaziun cun quità e confurma al lieu dal territori alpin. Per distinguer ils projects d'ensemnada che han in caracter da model surdat la gruppa mintga 2 onns in premi d'ensemnada per renatiralisaziuns reussidas che sa chattan al e sur il cunfin dal guaud. Distinguids vegnan mesiras e projects zunt reussids che promovan la qualitad e la durabilitad da las ensemnadas dals auts. 


Infurmaziuns:
Peter Stirnimann, incumbensà per l'infurmaziun da l'uffizi da construcziun bassa dal Grischun, tel. 079 291 72 75 


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun