Suenter passa 50 onns cun la gulivaziun da finanzas grischuna existenta è ina renovaziun fundamentala indispensabla. Incontestads èn il basegn da refurma, las finamiras principalas e la concepziun da basa da la nova gulivaziun da finanzas. Svelt da vesair èsi plinavant che la dotaziun previsa dals instruments da gulivaziun è raschunaivla e che sia concepziun è vegnida adattada dal tuttafatg a las relaziuns grischunas. 
 
La nova gulivaziun da finanzas è da princip renconuschida, ha in volumen equilibrà ed ina concepziun madira.
 
La refurma da la gulivaziun da finanzas grischuna (refurma da la GF) serva cunzunt a rinforzar las vischnancas e procura per ina gulivaziun equilibrada ed efficazia tranter las vischnancas. Da nov na ston las vischnancas betg pli tegnair lur pe da taglia sin in aut nivel per survegnir pajaments da gulivaziun. Uschia vegnan ils meds publics impundids en moda pli confurma als basegns. La refurma da la GF persequitescha consequentamain l'interess general da tut las vischnancas e dal chantun. Ella ha clers avantatgs e gida a dumagnar las sfidas futuras. 

Ina basa renconuschida
Il chantun e las vischnancas dovran ina gulivaziun da finanzas moderna. Quai tut che sa. La nova gulivaziun da finanzas na sto betg vegnir inventada da nov. Gia l'onn 2008 ha la confederaziun introducì ina gulivaziun da finanzas che sa cumprova. Blers chantuns han en il fratemp adattà lur gulivaziun da finanzas al model da la confederaziun. Igl è nairas uras ch'er il chantun Grischun fetschia quai. Ils avantatgs da la gulivaziun da finanzas federala sa manifesteschan pir lura per propi. Il Grischun perdess uschiglio adina dapli da sia credibladad envers la confederaziun ed envers ils chantuns donaturs. Ins na po strusch pretender ina solidaritad interchantunala senza far valair ina tscherta solidaritad tranter las vischnancas entaifer il chantun e senza renovar structuras antiquadas. Evidentamain datti in basegn d'agir. 

Dimensiun equilibrada
La gulivaziun da las resursas è concepida e dotada uschia ch'ella è bain supportabla er per las vischnancas finanzialmain fermas, en spezial per las fermas vischnancas turisticas e da tschains d'aua. Ellas pajan ina quota ch'è cleramain limitada per lescha da quellas resursas che surpassan la media da tut las vischnancas. La contribuziun vegn calculada mintga onn da nov e vegn drizzada uschia mintgamai tenor las relaziuns effectivas. La gulivaziun da las grevezzas geografic-topograficas e da scola che vegn finanziada exclusivamain dal chantun mitigescha las grevezzas spezialas che resultan pervia da las structuras. Da quai profitan cunzunt las vischnancas periferas cun bleras fracziuns e cun abitadis sparpagliads. 

Concepziun madira
Gia l'anteriura cussegliera guvernativa Eveline Widmer-Schlumpf ha preschentà l'onn 2007 ina nova gulivaziun da finanzas grischuna. 7 onns a la lunga èsi ussa vegnì lavurà vidlonder. Tut ils giavischs che las represchentanzas da las vischnancas, las partidas e las gruppas d'interess han exprimì èn vegnids resguardads uschenavant ch'els èn stads cumpatibels cun las finamiras principalas da la refurma. Il project è madir e pront per la realisaziun. Ils effects vegnan examinads permanentamain. Sch'igl è necessari da far adattaziuns pli tard, vegn quai fatg. 

Graficas da survista
Vischnancas donaturas e retschavidras en la nova gulivaziun da finanzas