Sin invitaziun dal cusseglier guvernativ Jon Domenic Parolini ha gì lieu ils 4 da favrer in emprim inscunter tranter represchentantas e represchentants da l'economia grischuna e da las autoritads. En il focus è stada la decisiun da la banca naziunala svizra (BNS) d'abolir il curs minimal da l'euro. Discutadas èn vegnidas tant las consequenzas per l'economia grischuna sco er las strategias pussaivlas. 

En ses referat d'entrada ha Urs Schönholzer, represchentant da la BNS, menziunà ils motivs per la decisiun dals 15 da schaner 2015 d'abolir il curs minimal da l'euro. En quest connex ha el suttastritgà ils avantatgs ch'in sistem da curs da stgomi flexibel porta a vista mesauna fin a lunga vista per la Svizra cumpareglià cun in sistem nua ch'il franc è quasi lià a l'euro. Er senza avair en mira in curs minimal explicit vegn la BNS ad intervegnir en cas a basegn er vinavant sin il martgà da devisas, per uschia ademplir sia incumbensa constituziunala da far ina politica monetara en l'interess da l'entir pajais.

Eugen Arpagaus, manader da l'uffizi per economia e turissem dal Grischun, ha menziunà en ina curta retrospectiva che la segirezza da planisaziun, ch'il curs minimal da l'euro deva a las interpresas grischunas, saja crudada davent. Effects externs, sco l'aboliziun dal curs minimal, mussian las pussaivladads limitadas da la politica economica chantunala. Per il chantun na resultia ina libertad d'agir betg cun far ina politica conjuncturala activa, mabain en emprima lingia cun concepir las cundiziuns generalas ch'èn decisivas a vista mesauna fin a lunga vista per meglierar l'attractivitad economica dal Grischun. Il rapport davart l'economia ch'il cussegl grond ha tractà en la sessiun da december 2014 prescrivia il rom respectiv.

En la discussiun che ha lura gì lieu èn las represchentantas ed ils represchentants da las organisaziuns grischunas dals patruns, dals lavurants e dal turissem stads senza excepziun da l'avis che acziuns precipitadas e lamentims sajan il fauss recept. En emprima lingia sajan las interpresas dumandadas da s'adattar svelt a las novas cundiziuns dal martgà. En sia resumaziun ha il cusseglier guvernativ Jon Domenic Parolini menziunà ch'ins haja – en il rom da l'emprima runda da discussiun – pudì sclerir la situaziun mumentana e ch'ins stoppia ussa spetgar, co ch'ils martgads da finanzas sa sviluppian las proximas emnas. Pir lura vegnia a sa mussar, sin tge nivel ch'il curs dal franc svizzer sa stabiliseschia a vista mesauna. Cun agid d'ina revisiun speditiva da la lescha davart il svilup economic duai vegnir garantì ch'il credit d'impegn general dad 80 milliuns francs, ch'è gia vegnì discutà en il cussegl grond, vegnia concedì. Uschia stettian a disposiziun meds finanzials chantunals per sustegnair investiziuns en infrastructuras turisticas centralas.

Ord vista da las represchentantas e dals represchentants da l'economia na dovri betg subvenziuns, mabain cundiziuns generalas pli favuraivlas per l'economia che permettan da far pli svelt las investiziuns. En differents secturs sajan necessarias deregulaziuns, ed i dovria ina flexibilisaziun essenziala dals temps da lavur. En quest reguard han er ils partenaris socials signalisà ch'els sajan pronts da discurrer. Las organisaziuns da tetg da l'economia grischuna vegnan a concretisar il basegn d'agir ord vista da las participantas e dals participants interessads da la maisa radunda. Propostas e basegns da vart da las represchentantas e dals represchentants da las branschas vegnan inoltrads al chantun Grischun pli tard en scrit. 


Infurmaziuns:
cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail jondomenic.parolini@dvs.gr.ch  
 

Gremi: departament d'economia publica e fatgs socials
Funtauna: rg departament d'economia publica e fatgs socials