La regenza grischuna ha relaschà l'ordinaziun chantunala davart la maturitad professiunala. Plinavant ha ella approvà il plan directiv regiunal "Val Müstair". 
 
Relaschà l'ordinaziun davart la maturitad professiunala
La regenza grischuna ha approvà l'ordinaziun chantunala davart la maturitad professiunala. Questas disposiziuns chantunalas reglan l'execuziun da l'ordinaziun federala davart la maturitad professiunala. L'ordinaziun chantunala vala per las scolas ch'èn renconuschidas da la confederaziun e che porschan ina maturitad professiunala federala en il chantun Grischun.
Da nov vegnan regladas en moda unitara las premissas e las proceduras d'admissiun a l'instrucziun per la maturitad professiunala. En tut il chantun valan plinavant las medemas disposiziuns d'examen, independentamain dal tip da maturitad professiunala. Las emprimas scolaziuns tenor il nov plan d'instrucziun general cumenzan en il chantun Grischun la stad 2015. 

Revisiun parziala da la lescha davart ils registers d'abitantas e d'abitants
La regenza grischuna ha concludì da metter en vigur la revisiun parziala da la lescha davart ils registers d'abitantas e d'abitants per il 1. da mars 2015.
L'onn 2010 ha il cussegl grond decidì ch'il chantun possia manar ina plattafurma da datas cun in register da persunas ed in register d'objects. Cun il register central da persunas po l'administraziun vegnir concepida meglier tenor ils basegns da las burgaisas e dals burgais, ed er la circulaziun da las infurmaziuns tranter l'administraziun chantunala e las vischnancas po vegnir simplifitgada considerablamain. Il register chantunal da persunas cuntegna las datas dals registers communals d'abitantas e d'abitants. Per pudair manar in tal register han stuì vegnir adattadas las basas legalas correspundentas cunzunt pervia da la protecziun da datas. Ultra da la lescha davart ils registers d'abitantas e d'abitants ha er l'ordinaziun respectiva stuì vegnir revedida parzialmain. 

Approvà il plan directiv regiunal "Val Müstair"
Il plan directiv regiunal, che la corporaziun regiunala Cumün da Val Müstair ha concludì ils 7 d'avust 2013, è vegnì approvà da la regenza cun cundiziuns. La vischnanca da Val Müstair ha unì ils documents dal vegl plan directiv da la corporaziun regiunala en in plan directiv cumplessiv survesaivel. En quest connex èn ils cuntegns dal plan directiv vegnids actualisads ed extendids en secturs tematics impurtants. Sco cumplettaziun cuntegna il plan directiv regiunal ussa in concept regiunal dal territori sco er il tema "abitadi".
En il rom da la procedura d'approvaziun sto la regenza garantir ch'ils cuntegns dal plan directiv regiunal na cuntradian betg a la legislaziun surordinada. Da resguardar èn pia ils svilups actuals sin plaun federal. Per l'ina han las cundiziuns generalas midadas concernent la construcziun d'abitaziuns secundaras consequenzas per l'areal d'abitadi e per il basegn futur da zonas da construcziun. Uschespert che las disposiziuns definitivas da la lescha federala davart las abitaziuns secundaras èn avant maun, sto il plan directiv regiunal "Val Müstair" vegnir repassà sut l'aspect da la tematica da las abitaziuns secundaras. Per l'autra èn las cundiziuns generalas per dimensiunar las zonas d'edifizis d'abitar sa midadas considerablamain en consequenza da la revisiun da la lescha federala davart la planisaziun dal territori. Cunquai ch'il plan directiv chantunal sto vegnir cumplettà e repassà correspundentamain en il sectur da l'abitadi, ha quai danovamain consequenzas per il plan directiv regiunal "Val Müstair". Ils proxims onns sto er el vegnir examinà, vegnir sviluppà vinavant e vegnir adattà a las novas cundiziuns generalas. 
  
Contribuziuns or dal fond da sport
La regenza grischuna garantescha a l'associaziun grischuna da sport (AGS) ina contribuziun or dal fond da sport. Per l'onn 2015 survegn l'associaziun 38 000 francs dal chantun. La contribuziun serva tranter auter a manar in post per infurmaziuns da dretg ed a surdar il premi da sport grischun.
Cun daners dal fond da sport vegn sustegnida er l'uniun da battasendas Cuira. Per sanar e per midar la chasa da battasendas Rosenhügel survegn l'uniun maximalmain 50 000 francs. Cun passa 110 commembras e commembers activs è l'uniun da battasendas Cuira l'organisaziun da battasendas la pli gronda en il Grischun. Actualmain han bleras da las activitads dals battasendas Cuira lieu en la chasa da battasendas a la Calandastrasse a Cuira. L'entir areal vegn surbajegià l'atun 2015, uschia ch'ils battasendas Cuira han stuì tschertgar ina nova chasa. In object correspundent ha pudì vegnir chattà en furma d'ina immobiglia sin il Rosenhügel, la quala è en possess da la vischnanca burgaisa da Cuira. Per che l'edifizi correspundia a las pretensiuns da las activitads dals battasendas, sto l'uniun sanar ina gronda part da quest edifizi. 


Gremi: regenza
Funtauna: rg chanzlia chantunala dal Grischun