En sia ultima sesida ha la regenza grischuna prendì posiziun tar la lescha federala davart la furmaziun professiunala e tar la cuntraproposta da la confederaziun tar l'iniziativa dal pievel "Per la segirezza da nutriment". Ultra da quai ha ella deliberà ina contribuziun finanziala per l'avertura dal guaud dal chantun Grischun. 

La regenza grischuna refusa la cuntraproposta da la confederaziun tar l'iniziativa dal pievel "Per la segirezza da nutriment"
La regenza grischuna prenda posiziun tar la cuntraproposta da la confederaziun tar l'iniziativa dal pievel "Per la segirezza da nutriment". La regenza resguarda la cuntraproposta sco betg necessaria. Da princip na tracta ella nagut da nov envers l'iniziativa dal pievel, mabain formulescha il cuntegn simplamain pli precis e pli detagliadamain. Las incumbensas che vegnan deducidas da quai pon er vegnir realisadas en il rom da la lescha vertenta. Perquai che la necessitad n'è betg dada, stuessi vegnir renunzià da far ina cuntraproposta.
L'iniziativa dal pievel vul rinforzar il provediment da la populaziun cun victualias d'ina producziun indigena diversifitgada e persistenta. Per quest intent propona ella da cumplettar la constituziun federala cun in nov artitgel "Segirezza da nutriment" che pretenda mesiras per minimisar la perdita da terren cultivabel e per realisar ina strategia da qualitad.
La cuntraproposta directa da la confederaziun tematisescha il giavisch da la segirezza da nutriment, renconuscha la contribuziun da la producziun indigena ed integrescha quella en in concept general cumplessiv. 

La regenza grischuna beneventa la midada da la lescha federala davart la furmaziun professiunala
La regenza grischuna prenda posiziun tar las midadas da la lescha davart la furmaziun professiunala. Il chantun Grischun sustegna las stentas da la confederaziun da posiziunar meglier la furmaziun professiunala superiura en il rom dal project strategic "Rinforz da la furmaziun professiunala superiura". En quest connex è el da l'avis che la direcziun dals trais projects parzials "finanziaziun", "posiziunament" e "basas" saja buna e prosperaivla. La regenza spetga dentant ch'il cussegl federal dettia en il rapport explicativ ses pled ch'il rinforz da la furmaziun professiunala superiura n'indebleschia betg l'ulteriura furmaziun professiunala.
L'object da la consultaziun è in sustegn federal d'absolventas e d'absolvents dals examens federals da la furmaziun professiunala superiura a partir da l'onn 2017. Cun subvenziunar ils curs preparatorics d'examens professiunals federalas e d'examens professiunals federalas superiurs duai vegnir augmentada tut en tut l'attractivitad dals examens. 
 
Ulteriuras infurmaziuns: text da la consultaziun 

Nagin agid social per persunas cun permissiun da dimora curta
La regenza grischuna ha approvà la revisiun parziala da las disposiziuns executivas tar la lescha chantunala davart il sustegn da persunas basegnusas. Burgaisas e burgais da la UE/AECL ch'èn vegnids en Svizra per tschertgar ina plazza, duain vegnir exclus da l'agid social. Cun la revisiun parziala da las disposiziuns executivas vegn stgaffida ina basa giuridica correspundenta sin plaun chantunal. Fin ussa n'han persunas cun ina permissiun da dimora curta betg stuì cumprovar ch'ellas disponian d'avunda meds finanzials per sa trategnair en Svizra. 

Sustegn finanzial per l'avertura dal guaud en il Grischun
La regenza ha deliberà passa 8 milliuns francs per renovar vias da guaud en tut las regiuns dal Grischun. Cun questa contribuziun investescha il chantun en il mantegniment da l'avertura dal guaud necessaria ed en vias da maschinas. Tut en tut vegnan renovads circa 57 kilometers vias da guaud e vias da maschinas e meglierada uschia l'avertura dad 8700 hectaras guaud. 
 
La regenza approvescha il plan directiv da la corporaziun regiunala Surselva
Il plan directiv regiunal "Actualisaziun 2014", ch'è vegnì concludì da la corporaziun regiunala Surselva ils 20 da favrer 2014, vegn approvà cun duas resalvas. Las novas deponias da material sco er la plazza per rimnar e zavrar rument Trun/Zignau na vegnan betg approvadas.
Cun quest plan directiv general regiunal ha la regiun Surselva actualisà ils cuntegns dal plan directiv vertent cun ils temas natira e cuntrada, turissem e temp liber sco er cun las ulteriuras utilisaziuns dal spazi. 

La approvescha la revisiun parziala da la planisaziun locala da Scuol
La revisiun parziala da la planisaziun locala, concludida da la vischnanca da Scuol ils 30 da november 2014, vegn approvada. Ella cumpiglia la revisiun parziala da la lescha da construcziun sco er il plan da zonas e plan general da furmaziun 1:1000 "Manaröl".
Il motiv per questa revisiun parziala è quel ch'il project da l'onn 2010 per in center da sport cun indrizs da vendita e cun emprimas abitaziuns integrads na po betg vegnir realisà. Da nov duain vegnir domiciliads là – ultra d'in center da passlung – affars da sport e manaschis commerzials pli pitschens en colliaziun cun plazzas da parcar per visitadras e visitaders. 

La regenza deliberescha ina contribuziun per l'instituziun Polo Poschiavo
L'instituziun Polo Poschiavo survegn ina contribuziun chantunala annuala da 200 000 francs per ils onns 2015-2018. L'essenza da Polo Poschiavo è in center da cumpetenza per la furmaziun supplementara e per l'accumpagnament da projects da svilup. Polo Poschiavo dat ad ina gronda part da la populaziun access a novas tecnologias sco per exempel e-learning e meglierescha uschia la cumpetitivitad da tut la regiun. Il sustegn finanzial duai servir oravant tut a la furmaziun supplementara professiunala da persunas che abitan e che lavuran en il Grischun. 
 

Gremi: regenza
Funtauna: rg chanzlia chantunala dal Grischun