La campagna da l'uffizi da sanadad dal Grischun "mintga di 10 000 pass per tia sanadad" ha success e vegn cuntinuada. Cun "Il Grischun senta la primavaira" stattan fin mez zercladur 2015 il moviment ed ils sentiments da primavaira en il center. 

A dunnas ed ad umens en la vegliadetgna da l'abilitad da lavurar vegni recumandà da sa mover durant almain duas e mez uras per emna en furma d'activitads da mintgadi u da sport cun ina intensitad mesauna. En il Grischun na cuntanscha mintga quarta persuna betg questa valur. Passa 40 pertschient da las Grischunas e dals Grischuns han ultra da quai surpais u èn corpulents. In zic dapli moviment en il mintgadi po mussar gronds effects. L'uffizi da sanadad dal Grischun vuless perquai motivar la populaziun dal Grischun per dapli moviment ed uschia gidar a promover la sanadad. 

10 000 pass per di
En il mintgadi normal en biro fa ina persuna che lavura maximalmain 5000 pass. Cun "Il Grischun senta la primavaira" vul l'uffizi da sanadad dal Grischun dublegiar questa valur, ed el rimna fin ils 14 da zercladur 2015 uschè blers pass sco pussaivel. Durant almain in mais ston las participantas ed ils participants rimnar tschintg giadas per emna 10 000 pass ed uschia cuntanscher tut en tut 200 000 pass per l'agen conto da sanadad. Sa participar pon tut las Grischunas e tut ils Grischuns a partir da 16 onns. 

Dumbrapass ed app gratuita
A rimnar ils pass gida in dumbrapass. Quel po vegnir cumprà per 5 francs en mintga filiala da la banca chantunala grischuna u tar Somedia. Ils pass ch'ins ha fatg vegnan registrads ed administrads en l'app gratuita "Es ti fit". L'app quinta enturn en pass ils moviments dal mintgadi sco per exempel las lavurs dal tegnairchasa. E quai fa ella er, sch'ins va p.ex. en il studio da fitness. Ultra da quai na pon ins betg mo s'infurmar davart l'activitad da moviment da persunalitads dal Grischun sco er da las atgnas amias e dals agens amis, mabain er gist als envidar ad in duel. Tgi che ha fatg 10 000 pass e che registrescha quels en l'app, po gudagnar premis attractivs. 

 
Engaschament da la banca chantunala grischuna
La partenaria principala da "Il Grischun senta la primavaira" è puspè la banca chantunala grischuna che s'engascha tant per il moviment da la populaziun grischuna sco er per il moviment da sias collavuraturas e da ses collavuraturs. La banca dat paisa ad ina work-life-balance equilibrada tar sias emploiadas e tar ses emploiads. Tenor l'index da stress da la Promoziun Sanadad Svizra promova l'equiliber tranter la lavur ed il temp liber numnadamain la cuntentientscha, procura per pli pauc temp d'absenza ed augmenta la productivitad da las collavuraturas e dals collavuraturs. 
 

Infurmaziuns:
- Christian Rathgeb, cusseglier guvernativ, schef dal departament da giustia, segirezza e sanadad, tel. 081 257 25 13, e-mail Christian.Rathgeb@djsg.gr.ch  
- Denise Rudin, manadra da la partiziun "promoziun da la sanadad e prevenziun", uffizi da sanadad dal Grischun, tel. 081 257 64 02, e-mail Denise.Rudin@san.gr.ch  
 

Gremi: uffizi da sanadad dal Grischun
Funtauna: rg uffizi da sanadad dal Grischun