La cumissiun per ambient, traffic ed energia ha predeliberà la missiva da la regenza concernent la revisiun parziala da la lescha davart las vias. La cumissiun propona al cussegl grond d'approvar questa revisiun parziala. 

Sut la direcziun dal president da la cumissiun Andreas Felix ed en preschientscha dal cusseglier guvernativ Mario Cavigelli ha la cumissiun per ambient, traffic ed energia (CATE) predeliberà la missiva tar la revisiun parziala da la lescha davart las vias dal chantun Grischun (LVias). La lescha che datescha da l'onn 2006 duai vegnir adattada sin fundament da las experientschas ch'èn vegnidas fatgas dapi lura en il sectur da la projectaziun, da la construcziun, dal mantegniment, da l'utilisaziun e da la finanziaziun da vias chantunalas.

La CATE vesa il basegn d'agir ed è perquai entrada unanimamain sin il project. En la tractativa detagliada ha ella acceptà la gronda part da las propostas. Cuntrari a la regenza na vuless ina gronda maioritad da la cumissiun però betg che la contribuziun minimala a favur dal quint da las vias po vegnir reducida, sche la facultad da las vias surpassa 50 milliuns francs, e che la limitaziun da la facultad da las vias vegn reducida a 100 milliuns francs. La gronda maioritad da la cumissiun propona perquai al cussegl grond da mantegnair las regulaziuns vertentas. Dal rest propona la cumissiun al cussegl grond d'approvar questa revisiun parziala.

Il cussegl grond vegn a tractar questa fatschenta en la sessiun da zercladur 2015. 
 
 
Infurmaziuns:
president da la cumissiun Andreas Felix, tel. 079 445 50 71


Gremi: cumissiun per ambient, traffic ed energia
Funtauna: rg cumissiun per ambient, traffic ed energia