En sia ultima sesida dispona la regenza grischuna la sanaziun da l'aua restanta da las Ovras electricas Alvra-Landwasser SA. Ultra da quai metta ella en vigur la lescha per promover il sport sco er la revisiun parziala da la lescha davart las scolas medias.

La sanaziun da l'aua restanta da las Ovras electricas Alvra-Landwasser SA è disponida
La regenza ha disponì la sanaziun da l'aua restanta da las Ovras electricas Alvra-Landwasser SA (OEAL) sco ch'ella vegn prescritta da la lescha. Tras quai vegnan las OEAL obligadas da dotar da nov – tut tenor la stagiun – las tschiffadas d'aua da la Landwasser a Glaris, la tschiffada da l'Ava da Tuors a Bravuogn sco er las prelevaziuns d'aua da l'Alvra a Bravuogn ed a Filisur. Tar las tschiffadas main impurtantas ord vista ecologica da l'Aual da Monstein, da l'Ava da Tisch e da l'Ava da Stugl vegni desistì da prender mesiras da sanaziun, e quai en il rom da la consideraziun cumplessiva.
Las mesiras da sanaziun ch'èn vegnidas fixadas uschia dattan ina impurtanza prioritara als aspects da la pestga. La proposta da sanaziun è vegnida sviluppada tras ina vasta gruppa da lavur (maisa radunda), da la quala han fatg part tut ils posts spezialisads chantunals pertutgads, las vischnancas concessiunaras, la gestiunaria da las ovras electricas sco er represchentants da pliras organisaziuns per la protecziun da l'ambient.
La disposiziun da sanaziun per las OEAL permetta da far in ulteriur pass impurtant en connex cun las sanaziuns da l'aua restanta en il Grischun. Per 155 da totalmain 224 tschiffadas d'aua è la sanaziun da l'aua restanta ussa liquidada ubain datti soluziuns da princip. Las ovras electricas respectivas cumpiglian passa 75 pertschient da la producziun totala dal chantun.
Ulteriuras infurmaziuns sut: Uffizi d'energia e da traffic dal Grischun

Adattaziun dal plan directiv regiunal e chantunal da l'Engiadin'ota
La regenza grischuna approvescha cun ina resalva l'adattaziun e la cumplettaziun dal plan directiv regiunal "cuntrada e turissem" concludidas dal cussegl cirquital da l'Engiadin'ota. La regenza beneventa ch'il plan directiv qua avant maun tracta il tema "cuntrada" en ina moda che surpassa il sectur parzial classic da la protecziun da la cuntrada.
A medem temp concluda la regenza grischuna l'adattaziun dal plan directiv chantunal pertutgant il sectur dal turissem en l'Engiadin'ota. In accent furma qua la teleferica previsa al Lai dals Chöds che permettess da colliar directamain ils territoris da skis Corvatsch e Corviglia. L'adattaziun qua avant maun vegn dentant integrada en il plan directiv regiunal e chantunal mo sco resultat intermediar. Quai pervia dal conflict current cun l'inventari federal da las cuntradas e dals monuments natirals d'impurtanza naziunala (IFC). Ord vista da la regenza stoi vegnir accentuà ch'il project fiss da gronda impurtanza per il svilup turistic da l'Engiadin'ota.

La lescha per promover il sport vegn messa en vigur
La lescha davart la promoziun dal sport e dal moviment (lescha per promover il sport) vegn messa en vigur per il 1. d'avust 2015. Ultra da quai vegn relaschada l'ordinaziun davart la promoziun dal sport e dal moviment. L'ordinaziun per promover il sport regla tranter auter la surdada da contribuziuns finanzialas a purschidas dal sport da scola voluntar. I vegn medemamain francà en l'ordinaziun, en tge furma ed a tge gruppas da persunas ch'il premi da sport grischun vegn surdà.
En in ulteriur pass vegn elavurà in concept per promover il sport. Quest concept è la basa per futuras decisiuns da la politica da sport e regla per exempel la collavuraziun tranter il chantun, las vischnancas e persunas privatas. Il concept per promover il sport vegn fatg en moda interdepartamentala ed integrond las organisaziuns da sport grischunas.

Revisiun parziala da la lescha davart las scolas medias en il chantun Grischun
La revisiun parziala da la lescha davart las scolas medias en il chantun Grischun dals 22 d'october 2014 vegn messa en vigur per il 1. d'avust 2015. La revisiun parziala rinforza finanzialmain las scolas medias privatas. Principalmain vegn reglada da nov la finanziaziun da las scolas medias privatas sin fundament dals custs d'ina scolara u d'in scolar da la scola chantunala grischuna. I vegnan introducidas diversas pauschalas sco per exempel ina pauschala da talent. En consequenza da questa revisiun parziala relascha la regenza differentas ordinaziuns.

Il plan da pandemia per il chantun Grischun è vegnì repassà
La regenza grischuna approvescha la versiun actualisada dal plan da pandemia per il chantun Grischun. Il nov plan da pandemia sa basa sin ils plans federals repassads.
Il plan da pandemia per il chantun Grischun tracta en emprima lingia quels secturs, nua ch'il chantun ha la cumpetenza da decisiun e d'execuziun. En il center stattan en quest connex la structura chantunala da direcziun en cas d'ina situaziun d'urgenza, la planisaziun dals letgs d'ospital e la distribuziun da medicaments. Reglada vegn er l'organisaziun d'ina eventuala vaccinaziun collectiva da la populaziun.
Plan da pandemia 2015

Il program da vaccinaziun cunter cancer dal culiez da la madra vegn cuntinuà
La regenza grischuna prolunghescha il program da vaccinaziun cunter cancer dal culiez da la madra (vaccinaziun da HPV) en il chantun Grischun. En il program pon vegnir vaccinadas vinavant mattas e dunnas giuvnas dad 11 fin 26 onns che han lur domicil legal en il chantun Grischun il mument da la vaccinaziun. Dunnas giuvnas che n'han anc betg cumplenì lur 16avel onn da vegliadetgna ston preschentar il consentiment en scrit da lur geniturs respectivamain da las persunas cun la pussanza dals geniturs.
Da nov recumonda il plan da vaccinaziun svizzer 2015 la vaccinaziun da HPV er per mats ed umens giuvens. Uschespert che la confederaziun mida l'ordinaziun davart las prestaziuns per la tgira da malsauns en quel senn, pon els vegnir vaccinads en il program chantunal a las medemas cundiziuns sco las mattas e las dunnas giuvnas. Cun la realisaziun dal program da vaccinaziun è incumbensà l'uffizi da sanadad.
Ulteriuras infurmaziuns sut: Uffizi da sanadad dal Grischun

La regenza surdat ina incarica da perscrutaziun davart las "mesiras repressivas per motivs da provediment"
La regenza grischuna surdat l'incarica da perscrutaziun per il studi "Basas per valitar las mesiras repressivas per motivs da provediment en il chantun Grischun" al center interdisciplinar per la perscrutaziun da las schlattainas da l'universitad da Berna. Il studi ch'è vegnì annunzià il december 2014 duai dar scleriment davart ina pratica da las autoritads d'avant l'onn 1981 – ina pratica che signifitgava savens ina gronda miseria. Da las persunas pertutgadas fan part per exempel uffants plazzads, uffants collocads u uffants adoptads sut sforz.
Il studi da 220 000 francs vegn finanzià mintgamai per la mesadad tras il fond da l'agid social e da la finanziaziun speziala "lottaria naziunala". L'elavuraziun dal studi vegn accumpagnada d'ina gruppa da project sut il presidi da l'archiv dal stadi dal Grischun. Il studi vegn fatg en il rom da l'analisa naziunala da l'istorgia pertutgant mesiras repressivas per motivs da provediment e duai vegnir publitgà durant l'emprim quartal da l'onn 2017.

La revisiun totala da la planisaziun locala da Samignun vegn approvada
La regenza approvescha cun diversas resalvas la revisiun totala da la planisaziun locala da la vischnanca da Samignun, che consista da la lescha da construcziun, dals plans da zonas e plans generals da furmaziun sco er dals plans generals d'avertura. La resalva la pli impurtanta concerna la planisaziun da las zonas da privel. Qua èn vegnids mess en vigur – empè da las zonas da privel concludidas da la vischnanca – sco cumpensaziun plans chantunals pli restrictivs da las zonas da privel. Las zonas da construcziun ch'èn pertutgadas da quai èn vegnidas munidas cun in scumond da construcziun, e quai fin ch'ellas vegnan relaschadas or da la zona da grond privel, perquai ch'i èn vegnidas prendidas mesiras architectonicas da protecziun sco rempars da lavinas, rempars da deviaziun e.u.v. Ils stabiliments che la vischnanca ha installà ils onns passads per siglientar artifizialmain lavinas n'han – tenor la regenza – nagina influenza per la delimitaziun da las zonas da privel.


Gremi: regenza
Funtauna: rg chanzlia chantunala dal Grischun