Ils ultims onns ha il turissem grischun fatg in svilup pauc allegraivel. Il studi "Benchmarking dal turissem – L'economia da turissem grischuna en la cumparegliaziun internaziunala", ch'è vegnì publitgà dacurt, examinescha pli detagliadamain intgins dals motivs per quest svilup e resumescha ils resultats ils pli impurtants ch'èn vegnids elavurads per il Grischun en il rom d'in program da benchmark da plirs onns.

Dapi passa 10 onns sa participescha il chantun Grischun al project Innotour "Program internaziunal da benchmarking per il turissem svizzer" che vegn realisà da l'institut da perscrutaziun economica BAKBASEL per incumbensa dal secretariat da stadi per l'economia SECO e da tut las regiuns da vacanzas svizras impurtantas. La participaziun dal chantun permetta da registrar e d'analisar cuntinuadamain e sistematicamain la capacitad economica dal turissem grischun en cumparegliaziun cun regiuns da vacanzas e cun destinaziuns svizras ed estras. Las infurmaziuns centralas vegnan reunidas en in unic lieu, vegnan analisadas e messas a disposiziun als acturs turistics.

Il rapport ch'è ussa avant maun dat in sguard sin la performance dal turissem grischun dapi l'onn 2007 ch'è tut en tut pauc allegraivla. El mussa detagliadamain, tge consequenzas che la crisa economica e finanziala sco er il ferm franc svizzer han per la dumonda dals differents martgads. Preschentads na vegnan betg mo ils deficits ch'èn puspè daventads pli gronds ils ultims onns cunzunt en la cumpetitivitad dals pretschs, mabain per exempel er la structura da la purschida d'alloschament e sia occupaziun stagiunala.

Occupaziun da las capacitads da letgs
La dumonda da l'Europa dal vest ed en spezial da la Germania – ch'è la gruppa da giasts lunschor la pli impurtanta en il Grischun suenter las Svizras ed ils Svizzers – è crudada ensemen en il vair senn dal pled durant il temp d'observaziun. Il regress sin quests martgads impurtants n'ha betg anc pudì vegnir cumpensà tras martgads lontans e creschents. Consequenzas negativas ha er vinavant il fatg ch'ils letgs grischuns èn occupads sut la media cunzunt durant la stad. Percunter dastgass la midada structurala cuntinuanta vers unitads d'alloschament pli grondas avair a media fin a lunga vista effects positivs per il success da las interpresas en il Grischun. Cun ina quota da letgs d'hotel da 18 pertschient da tut las capacitads turisticas da letgs è il Grischun bain posiziunà amez la rangaziun dal territori alpin, dentant cleramain davos las regiuns vischinas Tirol dal sid, Tirol u Vorarlberg, che han quotas bler pli pitschnas d'abitaziuns da vacanzas betg dadas en locaziun.

Stimaziun da las quotas dals letgs tenor geners d'alloschi en pertschient
Funtauna: divers uffizis statistics, BAKBASEL

Svilup da las singulas destinaziuns
Per mesirar e per cumparegliar sin plaun internaziunal il success da singulas destinaziuns dovra il program il "BAK TOPIndex". Quest index sa cumpona da trais facturs centrals: dal svilup da las quotas dal martgà (valitaziun a 20 pertschient), da l'occupaziun da las capacitads d'alloschament (valitaziun a 50 pertschient) e da la productivitad d'ina destinaziun (valitaziun a 30 pertschient). Il "BAK TOPIndex" po vegnir calculà per l'entir onn turistic, ma er separadamain per la stagiun da stad e per la stagiun d'enviern.

Cumparegliond il svilup dal temp da quest index ha Scuol – sco unica destinaziun grischuna – pudì meglierar vinavant tant la stad sco er l'enviern sia posiziun ch'era gia sur la media, e quai cunzunt perquai ch'ils letgs èn stads occupads relativamain bain durant l'entir onn. Tut las autras destinaziuns grischunas han gì perditas durant almain ina stagiun – envers la concurrenza ha almain Lai pudì meglierar sia buna posiziun durant l'enviern, e Flem Laax ha pudì sa meglierar in pau la stad.


"BAK TOPIndex": stagiun da stad e d'enviern 2013 (blau stgir) e 2007 (verd), valur media dal territori alpin mintgamai = 3.5
Funtauna: BAKBASEL

Cumparegliaziuns d'ulteriurs indicaturs e da facturs da concurrenza relevants, sco per exempel las purschidas da stad e d'enviern en las singulas destinaziuns, cumpletteschan las retschertgas.

Tras las activitads voluminusas da benchmarking survegnan ils furniturs da prestaziuns turisticas meglras enconuschientschas da lur situaziun da concurrenza, quai che po facilitar l'agen posiziunament. Tras l'analisa da las fermezzas e da las deblezzas resultan plinavant puncts da partenza per eventualas mesiras d'optimaziun. Tras las enconuschientschas obtegnidas duain ils purtaders da decisiuns en il turissem grischun pudair prender mesiras che sa basan sin ils fatgs.

Rapport cumplet: uffizi per economia e turissem


Infurmaziuns:
Eugen Arpagaus, manader da l'uffizi per economia e turissem, tel. 081 257 23 77, telefon mobil 079 256 93 94, e-mail Eugen.Arpagaus@awt.gr.ch


Gremi: uffizi per economia e turissem dal Grischun
Funtauna: rg uffizi per economia e turissem dal Grischun