En sia ultima sesida ha la regenza prendì posiziun tar la midada d'ina lescha federala en quai che reguarda il lieu da taxaziun da las provisiuns d'agents d'immobiglias. Plinavant ha ella approvà il plan d'areal "Pardieni" da la vischnanca da Tumleastga.
La regenza beneventa la midada dal lieu da taxaziun da las provisiuns d'agents d'immobiglias
La regenza grischuna ha prendì posiziun tar la midada da la lescha federala davart l'armonisaziun da la taglia directa dals chantuns e da las vischnancas (LATD). Il project da consultaziun per la realisaziun da la moziun Pelli prevesa da midar la LATD, uschia che las provisiuns d'agents d'immobiglias da persunas natiralas e giuridicas vegnian taxadas en l'avegnir adina al domicil resp. a la sedia da l'agent.
Ord vista da la regenza grischuna è la regulaziun proponida in pass indispensabel ch'ella sustegna cumplainamain. La regenza va d'accord cun las finamiras dal project e cun la formulaziun dal sboz da la lescha ed è da l'avis ch'ella saja exequibla. Las consequenzas finanzialas per il chantun na pon betg vegnir eruidas cumplainamain, cunquai che la situaziun giuridica è oz intscherta. I n'è dentant betg da far quint cun bler dapli u bler damain entradas.
Unicamain il proceder proponì areguard l'entrada en vigur para pauc cunvegnent per la regenza. Perquai propona ella che la lescha giaja en vigur directamain suenter la scadenza dal termin da referendum. La situaziun giuridica intscherta actuala sto vegnir eliminada svelt per cuntanscher segirezza giuridica.
Approvà il plan d'areal "Pardieni" da la vischnanca da Tumleastga
La regenza ha approvà il plan d'areal "Pardieni" che la suprastanza da l'anteriura vischnanca d'Almen (dapi il 1. da schaner 2015 fracziun da la nova vischnanca da Tumleastga) aveva concludì ils 8 da december 2014.
Quest plan d'areal concerna il territori "Pardieni" ch'è situà al nord d'Almen. Sin basa d'in concept da furmaziun duai il territori vegnir duvrà per construir in abitadi modern ed attractiv che dispona d'in stabiliment da parcar sutterran central. Tras il plan d'areal "Pardieni" na vegn betg engrondida la zona da construcziun, mabain vegn sviluppada vinavant ina zona d'abitar valaivla da l'anteriura vischnanca d'Almen. Il plan d'areal correspunda a la nova legislaziun chantunala davart la planisaziun dal territori. Ils dus recurs da planisaziun inoltrads cunter il plan d'areal ha la regenza refusà.
© Comet Photoshopping GmbH / Dieter Enz
Gremi: regenza
Funtauna: rg chanzlia chantunala dal Grischun