En sia ultima sesida ha la regenza grischuna prendì posiziun tar duas consultaziuns da la confederaziun. Plinavant è ella s'exprimida a favur da la nova basa per l'uffizi da construcziun bassa sin il pass dal Bernina. Ultra da quai ha ella concedì la permissiun da prelevar aua sutterrana per il stabiliment per l'allevament da peschs a Giuvaulta.

Votaziun dals 28 da favrer 2016
Ils 28 da favrer 2016 vegni votà tranter auter davart ils projects federals "iniziativa per il repatriament effectiv" e "sanaziun dal tunnel da via tras il Gottard". Entant che la regenza refusa l'iniziativa per il repatriament effectiv, approvescha ella la sanaziun dal tunnel da via tras il Gottard. Tenor sia pratica constanta sa participescha ella activamain a la discussiun da votaziun pertutgant la sanaziun dal tunnel da via tras il Gottard. Tut tenor il resultat da la votaziun pertutga quest project en moda speziala il chantun Grischun sco chantun da transit cun il tunnel dal San Bernardin. Da l'iniziativa per il repatriament effectiv n'è il chantun Grischun percunter betg pertutgà dapli che auters chantuns. Perquai renunzia la regenza da sa participar a campagnas da votaziun concernent l'iniziativa da repatriament.

Consultaziun tar la convenziun dal cussegl da l'Europa concernent la prevenziun ed il cumbat da violenza cunter dunnas e violenza a chasa
La regenza ha prendì posiziun davart l'approvaziun e davart la realisaziun da la convenziun dal cussegl da l'Europa concernent la prevenziun ed il cumbat da violenza cunter dunnas e violenza a chasa (convenziun d'Istanbul). La Svizra ha suttascrit questa convenziun ils 11 da settember 2013. Ella sto anc vegnir ratifitgada da las duas chombras federalas. Concernent la dumonda da l'approvaziun sto ultra da quai vegnir fatga ordavant ina consultaziun tar ils chantuns.
La regenza dal chantun Grischun beneventa la convenziun d'Istanbul. L'intent da la convenziun è quel da stgaffir sin plaun europeic in rom legal per proteger dunnas cunter mintga furma da violenza, inclusiv violenza a chasa. Quai è d'ina gronda impurtanza per la politica sociala e sto perquai vegnir sustegnì correspundentamain. Gia oz èn las mesiras obligantas ch'èn previsas en la convenziun d'Istanbul, sco per exempel ina cussegliaziun naziunala per telefon u programs d'intervenziun e da tractament per persunas violentas, instruments raschunaivels per proteger victimas cunter violenza.

Fegl sgulant da la convenziun d'Istanbul

Posiziun tar la revisiun parziala da l'ordinaziun federala davart il guaud
La regenza grischuna ha prendì posiziun tar la revisiun parziala da l'ordinaziun federala davart il guaud.
L'audiziun qua avant maun è vegnida fatga en il rom da la cumplettaziun da la lescha dal guaud. La finamira da las novas disposiziuns è quella da proteger meglier il guaud cunter organissems nuschaivels, da l'adattar a la midada dal clima e da promover l'explotaziun da laina.
La regenza beneventa per gronda part il sboz da l'ordinaziun qua avant maun. Resalvas ha ella però en quai che concerna la pauschala da surfatscha previsa. En quest connex s'exprima la regenza per ina simplificaziun da las regulaziuns da subvenziun. Refusads cleramain vegnan agids finanzials per acquistar implants da cranas a cabel. Quests acquists duain vegnir sustegnids sco fin ussa cun credits d'investiziun forestals rembursabels. Ultra da quai ston singulas disposiziuns vegnir precisadas.

Concurrenza da planisaziun per ina basa da l'uffizi da construcziun bassa sin il pass dal Bernina
La regenza è s'exprimida a favur d'ina nova basa per l'uffizi da construcziun bassa sin il pass dal Bernina. Ella ha incumbensà l'uffizi da construcziun auta da far ensemen cun l'uffizi da construcziun bassa ina concurrenza da planisaziun per il nov edifizi.
Dapi l'onn 2007 è l'uffizi da construcziun bassa responsabel per l'entir mantegniment da la via dal pass dal Bernina. Per pudair garantir il mantegniment da la via durant l'enviern sto esser avant maun ina basa sin il pass che pussibilitescha da metter a susta ils vehichels, las iseglias ed il material e che ha er localitads per il persunal. Las relaziuns da spazi actualas na bastan però betg pli per in servetsch d'enviern modern.
Il nov edifizi projectà duai vegnir integrà bain en la cuntrada e duai esser construì en moda uschè duraivla sco pussaivel. La moda e maniera da construir e la tscherna da las materialias ston tegnair quint da las relaziuns climaticas extremas che regnan sin in'autezza da 2300 meters sur mar. Ils custs totals per l'edifizi nov importan probablamain var 10 milliuns francs.

Permissiun da prelevar aua sutterrana per il stabiliment per l'allevament da peschs a Giuvaulta
La vischnanca da Giuvaulta ha concedì ils 23 da fanadur 2015 al chantun Grischun, represchentà da l'uffizi da construcziun auta, il dretg da prelevar aua sutterrana per il stabiliment chantunal per l'allevament da peschs. La concessiun è limitada a 50 onns.
Il stabiliment per l'allevament da peschs a Giuvaulta è en funcziun dapi l'onn 1971 ed è il pli grond en il chantun Grischun. Perquai ch'il stabiliment vegn engrondì cun trais ulteriurs batschigls, na basta la productivitad dal bigl da prelevaziun vertent betg pli per far funcziunar il stabiliment per l'allevament da peschs. Pervia da quai è vegnida construida ina segunda tschiffada. Da nov dastgan vegnir prelevads 450 liters per minuta. Mo en cas excepziunals, per exempel dis da stad fitg chauds, vegnan las pumpas da tuts dus bigls prendidas en funcziun a medem temp durant in pèr uras al di, e quai cun ina quantitad da prelevaziun da totalmain 730 liters per minuta.

Stabiliment chantunal per l'allevament da peschs a Giuvaulta


Gremi: regenza
Funtauna: rg chanzlia chantunala dal Grischun