Mesemna, ils 3 da favrer 2016, ha lieu en tut la Svizra il test annual da las sirenas "alarm general" a las 13.30 ed a las 13.45 sco er il "alarm d'aua" a las 14.15 ed a las 14.50. Quests tests da las sirenas servan d'ina vart a controllar la prontezza da funcziun da las sirenas, e da l'autra vart po la populaziun emprender d'enconuscher ils differents signals d'alarm, cun ils quals ella vegn alarmada en cas da privel acut.

1. Alarm general
Il "alarm general" vegn dà a las 13.30. Las sirenas vegnan messas en funcziun tras in telecumond davent da la centrala d'acziuns da la polizia chantunala a Cuira. A las 13.45 vegnan tut las sirenas messas en funcziun anc ina giada a maun davent da las vischnancas al lieu.

Il "alarm general" è in tun urlant che va regularmain si e giu e che dura ina minuta. Quest alarm sa repeta entaifer 5 minutas ina segunda giada. I na ston betg vegnir prendidas mesiras da cumportament e da protecziun.

Sch'il signal "alarm general" resuna però ordaifer il test da las sirenas annunzià, vul quai dir ch'ina periclitaziun da la populaziun è pussaivla. En quest cas duai la populaziun tadlar radio, suandar las instrucziuns da cumportament da las autoritads ed infurmar las vischinas ed ils vischins.

2. Alarm d'aua
Il "alarm d'aua" vegn mess en funcziun en l'intschess da stabiliments d'accumulaziun a las 14.15 ed a las 14.50. I sa tracta d'in tun bass interrut regularmain che dura 6 minutas. I na ston betg vegnir prendidas mesiras da cumportament e da protecziun. Ils plans da fugia en cas d'in alarm d'aua pon vegnir consultads tar las vischnancas che sa chattan en il territori da deflussiun dals stabiliments d'accumulaziun.

Sch'il signal "alarm d'aua" resuna però ordaifer il test da las sirenas annunzià, vul quai dir ch'ina periclitaziun da la populaziun è pussaivla. En quest cas duai la populaziun bandunar immediatamain il territori periclità.

Ulteriuras infurmaziuns e reglas da cumportament chattais Vus sin teletext, pagina 680, e sin la pagina d'internet www.sirenentest.ch.

La populaziun vegn supplitgada d'avair chapientscha per las malempernaivladads en connex cun las controllas da las sirenas.


Infurmaziuns:
Hans Gasser, manader da l'uffizi da militar e da protecziun civila, tel. 081 257 35 22, e-mail Hans.Gasser@amz.gr.ch.


Gremi: uffizi da militar e da protecziun civila
Funtauna: rg uffizi da militar e da protecziun civila