A sia ultima sesida ha la regenza ordinà la sanaziun da duas ovras electricas grischunas e dà la permissiun per construir ina nova ovra electrica. Ultra da quai ha ella concedì il premi grischun da cultura ed approvà la revisiun parziala da la planisaziun locala da Valragn.

Premi grischun da cultura 2016 per Domenic Janett
Domenic Janett survegn il premi grischun da cultura 2016. La regenza grischuna al surdat il premi en appreziaziun da sia ovra da la vita sco musicist, magister da musica, dirigent, cumponist ed arranschader en il mund da la musica populara. Il premi è dotà cun 30 000 francs.

Plinavant ha la regenza concedì set premis da renconuschientscha ed otg premis da promoziun da mintgamai 20 000 francs. Ils premis vegnan surdads en il rom d'ina festa che ha lieu il zercladur 2016.

Glista da tut las persunas premiadas

La regenza pretenda adattaziuns tar ils meds finanzials per l'agricultura
La regenza grischuna prenda posiziun tar il conclus federal davart ils meds finanzials per l'agricultura ils onns 2018–2021.
La limita d'expensas da l'agricultura è pertutgada da las mesiras da spargn tenor il program da stabilisaziun 2017–2019. Quai ha consequenzas economicas per il chantun Grischun. Perquai dumonda la regenza d'examinar e da repassar las mesiras en il senn da la proporziunalitad. En spezial duai vegnir desistì da las reducziuns en ils secturs da las meglieraziuns da la basa, da las mesiras socialas e da la promoziun da la vendita regiunala.
Il chantun Grischun è dependent d'ina ferma agricultura per tgirar la cuntrada cultivada, per mantegnair la biodiversitad indigena, sco contribuziun a favur d'ina urbanisaziun decentrala e per mantegnair l'identitad ch'ils numerus products agriculs da las bleras valladas dattan al chantun. In'agricultura che lavura en moda persistenta ed orientada al martgà sto vegnir mantegnida e promovida cun ils meds finanzials disponibels da la confederaziun e dal chantun.

Posiziun da la regenza grischuna

Approvà il project per in'ovra electrica Farbtobel
La regenza grischuna approvescha il project "Construcziun d'ina nova ovra electrica Farbtobel". Ultra da quai vegn la concessiun dals dretgs da las auas che la vischnanca dad Arosa ha surdà ils 30 da settember 2014 approvada cun intginas midadas.
L'Ovra idraulica Peist SA (en fundaziun) ha l'intenziun da trair a niz la forza idraulica da l'aual dal Farbtobel sin il territori communal dad Arosa per producir electricitad. L'ovra electrica duai avair ina producziun annuala dad 840 000 uras da kilowatt (kWh). Quella cuvra il basegn d'electricitad da var 200 chasadas. La concessiunaria quinta cun investiziuns da circa 2,11 milliuns francs.

Sanaziun da las ovras electricas Clemgia e Glion SA
La regenza ordinescha la sanaziun da duas ovras electricas grischunas. Ella dispona la sanaziun da l'aua restanta prescritta da la lescha per l'ovra electrica Clemgia da la vischnanca da Scuol. Tras quai vegn la vischnanca da Scuol obligada da dotar la tschiffada d'aua da l'ovra electrica communala tut tenor la stagiun. Questa disposiziun da sanaziun permetta da far in ulteriur pass impurtant en connex cun las sanaziuns da l'aua restanta en il Grischun. Per 156 da totalmain 224 tschiffadas d'aua è la sanaziun da l'aua restanta ussa liquidada ubain datti soluziuns da princip. Las ovras electricas respectivas cumpiglian passa 75 pertschient da la producziun totala dal chantun.
Ultra da quai ordinescha la regenza in'obligaziun da sanaziun per las Ovras electricas Glion SA areguard l'accessibladad dals peschs. La serra existenta d'ina autezza da sis meters a Tavanasa cun ina tschiffada d'aua laterala è equipada cun in agid d'ascensiun per ils peschs concepì en moda suboptimala e n'ha nagin agid da descensiun per ils peschs. Tenor la lescha èn ils chantuns obligads da planisar – tar ovras idraulicas existentas – mesiras che las societads d'ovras electricas ston realisar.

La regenza ha approvà la revisiun parziala da la planisaziun locala da Valragn
La revisiun parziala da la planisaziun locala, concludida da la vischnanca da Valragn ils 29 da matg 2015, vegn approvada da la regenza. Sco singuls meds da planisaziun èn vegnids approvads il plan da zonas e plan general da furmaziun 1:1000 "Revisiun parziala (chava da crappa Marscholegg)" sco er il plan general d'avertura 1:1000 "Revisiun parziala (chava da crappa Marscholegg)".
Questa revisiun parziala stgaffescha las premissas da la planisaziun d'utilisaziun per engrondir la chava da crappa existenta Marscholegg. En quest connex duai vegnir augmentà il volumen d'explotaziun dal paragnais tschertgà ("argient da San Bernardin") dad oz var 95 000 meters cubic a da nov circa 160 000 meters cubic. A medem temp duai la chava da crappa puspè vegnir emplenida cun var 90 000 meters cubic material da stgavament, da demoliziun e da rumida nunsmerdà. Ultra da quai ha la vischnanca fixà tras il dretg da planisaziun l'avertura da la chava da crappa Marscholegg cun ina via, per ch'i possia vegnir realisada ina via da maschinas planisada nà da la via chantunala.


Gremi: regenza
Funtauna: rg chanzlia chantunala dal Grischun